Nong Pwony Ki I Lok Pa Lubanga

Pingo Lukricitayo Ginongo Batija?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Batija pa Lukricitayo te lokke ngo?

Batija aye kwac me bedo ki wat maber ki Lubanga. Dong pi meno, Lakricitayo myero onong batija ma nongo en dong dit ma romo pwonyo lok i kom Lubanga ci dong bedo lapwonnye pa Yecu ento pe ma nongo en latin lakere. (Tic pa Lukwena 8:12; 1 Petero 3:21) Wadoko lupwonnye pa Yecu ka wapwonyo dok watimo jami ma en ocikowa kwede.​—Kwan Matayo 28:19, 20.

I kare pa lukwena pa Yecu, jo mapol gupwonyo lok i kom Lubanga ki Yecu labongo galle. Me laporre, i kare ma laco mo acel opwonyo kit ma nicer pa Yecu oyabo kwede yo me nongo larre, en odoko lapwonnye pa Yecu cutcut. I kare-ni bene, jo ma cwinygi atir guyero me doko lulub kor Yecu.​—Kwan Tic pa Lukwena 8:26-31, 35-38.

2. Pingo kibatija Yecu?

Yecu onongo dong mwakane tye i kine ka 30 i kare ma Jon Labatija oluto en i te pii i Kulu Jordan. Batija pa Yecu onyuto mitine me tiyo miti pa Lubanga kun ye ticce macalo Meciya. (Jo Ibru 10:7) Man bene kwako miyo kwone macalo ginkok me kwanyo bal pa dano. Ma peya Yecu obino i lobo, en onongo dong maro dok winyo dog Wonne, Jehovah.​—Kwan Marako 1:9-11; Jon 8:29; 17:5.

  3. Pingo Lakricitayo omyero onong batija?

Kit ma kinywalowa kwede pat ki pa Yecu​—wan kinywalowa ki bal. Ento, ginkok pa Yecu-ni omiyo wabedo ki wat maber ki Lubanga. (Jo Roma 5:10, 12; 12:1, 2) Twere botwa me bedo lutinone. (2 Jo Korint 6:18) Watwero bedo ki mot man nining? I lega ma walego i mung, wadyere bot Jehovah dok wakwonge me tiyo mitine pi kwowa lung. I nge lega me dyere ma kit man, wanyuto ka maleng bot lwak ki nongo batija.​—Kwan Matayo 16:24; 1 Petero 4:2.

4. Itwero yubbe nining me nongo batija?

Lucaden pa Jehovah gikwano Baibul ki ngat mo keken ma mito nyikke cok bot Lubanga. Kwano Baibul ki dong bedo tye i cokke bijingo marri ki niyeni pi Lubanga. Bikonyi bene me bedo ki cwiny matir kacel ki kit mabeco. Dongo mar, niye, ki kit mukene pa Lubanga bikonyi me cobo kwongeni me tiyo miti pa Jehovah pi kwoni ducu.​—Kwan Jon 17:3; Jo Ibru 10:24, 25.

Pi ngec mukene, nen dul me 18 i buk me, Baibul Mono Ada Pwonyo Gin Ango? ma Lucaden pa Jehovah aye gucoyo.