Me tyelo kor woro me ada, kiciko Luicrael ni gumi dul acel me apar mwaka ki mwaka. Lubanga owaco botgi ni: “Wubimiyo dul acel me apar me jami ma wuceko i poto, ma a i poto mwaka ki mwaka.”—Nwoyo Cik 14:22.

 Cik me miyo dul acel me apar-ri obedo i kin cik ma Lubanga omiyo bot jo Icrael. Lukricitayo pe gitye i te Cik pa Moses, pi meno pe mitte ni gumi dul acel me apar-ri. (Jo Kolocai 2:13, 14) Ma ka meno, Lakricitayo acel acel myero omi motte me cente “kit macalo cwinye mito, labongo wang cwiny mo nyo dic mo. Pien Lubanga maro ngat ma miyo jamine ki yomcwiny.”—2 Jo Korint 9:7.

•  Miyo Dul Acel me Apar i Baibul—“Cik Macon”

•  Miyo Dul Acel me Apar i Baibul—“Cik Manyen”

 Miyo dul acel me apar kiloko iye tyen mapol i but Baibul ma pol kare kilwongo ni Cik Macon. Kiloko iye tyen mapol loyo i nge kare ma Lubanga omiyo Cik bot Luicrael kun wok ki bot Moses. Ento, Baibul bene loko i kom dul acel me apar-ri ma peya kimiyo Cik pa Moses.

Ma peya kimiyo Cik pa Moses

 Ngat mukwongo ma kiloko i kome ni omiyo dul acel me apar obedo Abram (Abraim). (Acakki 14:18-20; Jo Ibru 7:4) Dul acel me apat ma Abram omiyo-ni nen calo obedo mic mo ma en omiyo kicel keken bot kabaka ki lalamdog me Calem. Baibul pe nyuto ni Abraim nyo lutinone dok gumiyo dul acel me apar lacen.

 Ngat me aryo ma Baibul nyuto ni omiyo dul acel me apar obedo lakwar Abraim, ma nyinge Yakobo. En ocikke ni ka Lubanga ogoyo laa i kome, ci ebimiyo bot Lubanga ‘dul acel me apar’ me gin ma enongo. (Acakki 28:20-22) Ma lubbe ki lukwan mogo me Baibul, Yakobo nen calo omiyo dul acel me apar-ri macalo lee ma kityero bot Lubanga. Kadi bed Yakobo ocobo kwonge man, ento en pe odiyo jo gange me miyo dul acel me apar bene.

I te Cik pa Moses

 Kiciko jo Icrael ni gumi dul acel me apar me tyelo kor worogi bot Lubanga.

•   Dul acel me apar-ri onongo konyo jo ma onongo gidyero cawagi ducu i tic pi Lubanga, ma i kine onongo tye iye Lulevi, ki lulamdog ma onongo pe gitye ki ngomgi me apura. (Wel 18:20, 21) Lulevi onongo ginongo dul acel me apar ki bot Luicrael, dok gin bene onongo myero gumi “dul acel me apar i kom dul acel me apar” bot lulamdog.—Wel 18:26-29.

•   Nen calo onongo mitte ni Luicrael dok gumi dul acel me apar mukene mwaka ki mwaka me konyo Lulevi ki jo ma pe gubedo Lulevi. (Nwoyo Cik 14:22, 23) Luicrael onongo gitiyo ki mic meno i kare me kwergi, dok i mwaka mogo onongo kinywako ki jo ma lucan adada me konyogi ki jami ma mitte.—Nwoyo Cik 14:28, 29; 26:12.

 Onongo kikwano dul acel me apar-ri nining? Mwaka ki mwaka Luicrael onongo gimiyo acel me apar me kodi ma ocek i poto. (Lulevi 27:30) Ka onongo guyero me miyo dul acel me apar man macalo cente, ci onongo myero gumed wiye ki dul acel me abic. (Lulevi 27:31) Bene kicikogi ni gumi “dul acel me apar pa dyangi ki romi ki dyegi ducu.”—Lulevi 27:32.

 Me yero lee, Luicrael onongo gikwanyo lee me aparre ma okato woko ki i dwol. Cik pa Lubanga onongo waco ni onongo pe myero gungi nyo gulok lee magi ma kiyerogi-ni, dok onongo pe myero kicatgi me miyo dul acel me apar-ri macalo cente. (Leviticus 27:32, 33) Ento, dul acel me apar me aryone-ni ma onongo kitiyo kwede i kwer pa Luicrael onongo kitwero lokone doko cente. Yub man okonyo Luicrael ma onongo giwoto i kabedo maboco pi kwero kwer me woro Jehovah.—Nwoyo Cik 14:25, 26.

 Awene ma Luicrael onongo gimiyo iye dul acel me apar? Luicrael onongo gimiyo dul acel me apar mwaka ki mwaka. (Nwoyo Cik 14:22) Ento, i mwaka me abiro onongo pe gimiyo. Mwaka meno onongo obedo mwaka me Cabat, nyo mwaka me yweyo, ma Luicrael onongo pe gipuro pur. (Lulevi 25:4, 5) Pi tyen lok man, onongo pe kicoko dul acel me apar i kare me kac. I mwaka me adek ki abicel, Luicrael onongo ginywako dul acel me apar me aryone-ni ki lucan ki dong Lulevi.—Nwoyo Cik 14:28, 29.

 Pwod ango ma onongo kimiyo ki ngat ma pe omiyo dul acel me apar-ri? I Cik pa Moses, onongo pe tye pwod mo ma kimiyo ki ngat ma pe omiyo dul acel me apar-ri. Luicrael onongo gimiyo dul acel me apar-ri pien onongo gingeyo ni obedo gin matir me atima, ento pe ni pien kibiminigi pwod ka pe gumiyo. Luicrael onongo myero guwac ki Lubanga ni gityeko miyo dul acel me apar-ri ci guleg Lubanga ni ogo laa i komgi pi timo meno. (Nwoyo Cik 26:12-15) Lubanga onongo neno kwero miyo dul acel me apar-ri calo kwalo gin mo ki bote.—Malaki 3:8, 9.

 Tika dul acel me apar-ri onongo diyo Luicrael? Ku. Lubanga ocikke bot jo Icrael ni gukelo dul acel me apar i ode, ci ebionyo gum i komgi dok gin mo keken pe birem botgi. (Malaki 3:10) Ki tungcel, Luicrael gudeno can ka pe gukelo dul acel me apar bot Lubanga. Gurwenyo cwak pa Lubanga dok pe gunongo adwogi maber ki i tic pa lulamdog ki Lulevi ma guweko ticgi ci gucito ka yenyo kwo.—Nekemia 13:10; Malaki 3:7.

 I kare ma Yecu tye i lobo, onongo pud mitte ni jo ma woro Lubanga gumi dul acel me apar. Ento i nge to pa Yecu, onongo dong pe mitte ni kilub cik man.

I kare pa Yecu

 I Cik Manyen, Baibul nyuto ni Luicrael gumedde ki miyo dul acel me apar i kare ma Yecu onongo pud tye i lobo. Yecu owaco ni onongo mitte ni gumi dul acel me apar, ento en bene okok i kom lutela dini ma onongo gimiyo dul acel me apar ento ‘gitenyo lok ma pigi tego me cik woko, gin macalo ngolo kop atir, timo kica ki bedo jo ma tye ki niye.’—Matayo 23:23.

I nge to pa Yecu

 I nge to pa Yecu, onongo dong pe mitte ni kimi dul acel me apar. Gityer pa Yecu ogiko Cik pa Moses, ma i kine tye iye cik me “jogo dul acel me apar.”—Jo Ibru 7:5, 18; Jo Epeco 2:13-15; Jo Kolocai 2:13, 14.