Baiblo Tsɔɔmihi A He Videohi
Video kpiti nɛ ɔmɛ haa Baiblo mi sane bimihi nɛ a he hia nɛ ngɛ Sane Kpakpa Nɛ Je Mawu Ngɔ! womiyo ɔ mi ɔ a heto.
Anɛ Mawu Ngɛ Nitsɛnitsɛ Lo?
Hla níhi nɛ ma ha nɛ o na kaa sisi numi ngɛ he kaa o ma he Mawu ye ɔ.
Anɛ Mawu Ngɛ Biɛ Lo?
Wa tsɛɔ Mawu ke Ope, Bɔlɔ, Nyɔmtsɛ kɛ ekpahi. Se Mawu biɛ nitsɛnitsɛ je kpo pe si 7,000 ngɛ Baiblo ɔ mi.
Anɛ Huɛ Bɔmi Ma Nyɛ Maa Hi Waa Kɛ Mawu Wa Kpɛti Lo?
Jeha babauu ji nɛ ɔ nɛ nihi suɔ kaa a maa le a Bɔlɔ ɔ. Baiblo ɔ ma nyɛ maa ye bua mo nɛ o kɛ Mawu nɛ pee huɛ. Huɛ bɔmi nɛ ɔ jeɔ sisi ke o ba le Mawu biɛ.
Mɛnɔ Ji Baiblo ɔ Ngmalɔ?
Ke adesahi lɛ a ngma Baiblo ɔ, anɛ e da blɔ kaa a tsɛɔ Baiblo ɔ ke Mawu Munyu lo? Mɛnɔ munyu lɛ ngɛ Baiblo ɔ mi?
Anɛ Munyuhi Nɛ Ngɛ Baiblo ɔ Mi ɔ Ji Anɔkuale Lo?
Ke Baiblo ɔ je Mawu ngɔ ɔ, lɛɛ e sa nɛ Baiblo ɔ nɛ hi slɔɔto kulaa ngɛ womi kpahi a he.
Mɛni Yi Mi Tomi He Je Nɛ Wa Ngɛ Wami Mi?
Moo hyɛ nɔ́ titli nɛ ma ha nɛ o ná bua jɔmi nitsɛnitsɛ kɛ yi mi tomi nɛ ngɛ si himi he.
Mɛni Si Fɔfɔɛ Mi Gbogboehi Ngɛ?
Baiblo ɔ wo si kaa be maa ba nɛ a ma tle nihi babauu si kɛ je gbeje kaa bɔ nɛ e ba ngɛ Lazaro blɔ fami ɔ.
Anɛ Hɛl Ji He Ko Nɛ A Piiɔ Nihi Ngɛ Niinɛ Lo?
Baiblo ɔ tsɔɔ kaa “Mawu ji suɔmi,” enɛ ɔ he ɔ, e be nihi piie ngɛ tɔmihi nɛ a tɔ̃ kɛ be ɔ a he.
Anɛ Yesu Kristo Ji Mawu Lo?
Anɛ Yesu Kristo nɔuu kɛ̃ ji Mawu Ope ɔ lo? Aloo a ji nihi ekpaekpahi?
Mɛni He Je Nɛ Yesu Gbo?
Baiblo ɔ tsɔɔ kaa Yesu gbenɔ ɔ he ngɛ se nami wawɛɛ. Anɛ yi mi tomi ko ngɛ e gbenɔ ɔ he lo?
Mɛni Ji Mawu Matsɛ Yemi ɔ?
Yesu tu Mawu Matsɛ Yemi ɔ he munyu wawɛɛ pe ní kpahi ngɛ e fiɛɛmi ní tsumi ɔ mi. E se nyɛɛli ɔmɛ kɛ jeha babauu sɔle konɛ Matsɛ Yemi ɔ nɛ ɔ nɛ ba.
Mawu Matsɛ Yemi ɔ Bɔni Nɔ Yemi Kɛ Je Jeha 1914 ɔ
Maa pee jeha 2,500 kɛ se ji nɛ ɔ, Mawu ha nɛ matsɛ ko nɛ ngɛ he wami ɔ nla nlami ko nɛ́ e ji gbami, nɛ e ngɛ mi bae mwɔnɛ ɔ.
Níhi Tsake Kulaa Ngɛ Je ɔ Mi Kɛ Je Jeha 1914 ɔ
Níhi nɛ a ngɛ nɔ yae ngɛ je ɔ mi, kɛ suhi nɛ nihi jeɔ kpo kɛ je jeha 1914 ɔ maa nɔ mi kaa Baiblo gbamihi nɛ kɔɔ “nyagbe ligbi ɔmɛ” a he ɔ ngɛ mi bae.
Anɛ Mawu Lɛ Haa Nɛ Adebɔ Mi Oslaahi Baa Lo?
Nihi enyɔ komɛ nɛ a kɛ adebɔ mi oslaahi kpe ɔ tsɔɔ nɔ́ nɛ a kase ngɛ Baiblo ɔ mi.
Mɛni he je nɛ Mawu Ngmɛ Nɔ́ Nami blɔ?
Nihi fuu biɔ nɔ́ he je nɛ je ɔ mi hyi tɔ kɛ ninyɛ, kɛ nɔ́ nami ɔ he sane. Baiblo ɔ kɛ sane bimi nɛ ɔ heto nɛ haa nɔ tsui nɔ ɔ e mi ɔ ha.
Anɛ Mawu Kplɛɛ Amagahi Nɛ A Kɛ Tsuɔ Ní Ngɛ Jami Mi ɔ Nɔ Lo?
Anɛ a ma nyɛ maa ye bua wɔ nɛ waa hɛ kɛ su Mawu nɛ wa nɛ́ lɛ ɔ he lo?
Mɛni Ji Mawu Susumi Ngɛ Gba Si Himi He?
Mawu suɔ nɛ o gba si himi ɔ nɛ e ye manye. Ga womi kpakpa nɛ ngɛ Baiblo ɔ mi ɔ ye bua gba si himi he piɛɛli fuu.
Anɛ Mawu Naa Ajuama Bɔmi He Fonihi Kaa E Ji Yayami Lo?
Anɛ munyunguhi nɛ ji “ajuama bɔmi he fonihi kɛ videohi” ɔ ngɛ Baiblo ɔ mi lo? Kɛ wa ma plɛ kɛ le bɔ nɛ Mawu naa ajuama bɔmi he fonihi kɛ videohi ha kɛɛ?