Yesu he adesahi anɔkualetsɛmɛ a yi wami kɛ gu e wami nɛ e kɛ ha kaa kpɔmi nɔ́ ɔ nɔ. (Mateo 20:28) Enɛ ɔ he ɔ, Baiblo ɔ tsɛɔ Yesu ke “je ɔ yi wami helɔ.” (1 Yohane 4:14) Baiblo ɔ hu de ke: “Yi wami hemi be nɔ kpa ko mi, ejakaa biɛ kpa ko be hiɔwe sisi nɛ a ngɔ kɛ ha ngɛ nimli a kpɛti nɛ e sa kaa a gu nɔ kɛ he wa yi wami.”​—Ní Tsumi 4:12.

 Yesu ‘sa e nya gbenɔ kɛ ha nɔ fɛɛ nɔ’ nɛ heɔ lɛ yeɔ ɔ. (Hebri Bi 2:9; Yohane 3:​16) Lɔ ɔ se ɔ, “Mawu tle lɛ si kɛ je gbeje,” nɛ Yesu kpale kɛ ho hiɔwe ya kaa mumi mi nɔmlɔ. (Ní Tsumi 3:​15) Ngɛ hiɔwe ɔ, Yesu “ma nyɛ ma he nihi nɛ a guɔ e nɔ kɛ hɛɛ mɛ kɛ suɔ Mawu he ɔmɛ a yi wami kɛ pi si hulɔ, ejakaa e ngɛ wami mi be fɛɛ be konɛ e kpa pɛɛ kɛ ha mɛ.”​—Hebri Bi 7:​25.

Mɛni he je nɛ e he hia nɛ Yesu nɛ kpa pɛɛ ha wɔ ɔ?

 Yayami peeli ji wɔ tsuo. (Roma Bi 3:​23) Yayami ji blɔ tsimi nɔ́ ngɛ waa kɛ Mawu wa kpɛti, nɛ e kɛ nɔ yaa gbenɔ mi. (Roma Bi 6:​23) Se Yesu ngɛ sɔmɔe kaa “mi dalɔ” kɛ ha nihi nɛ a ma ná hemi kɛ yemi ngɛ e kpɔmi afɔle sami ɔ mi ɔ. (1 Yohane 2:1, sisi ningma) Kɛ gu e kpɔmi afɔle sami ɔ nɔ ɔ, Yesu kpaa Mawu pɛɛ kɛ haa mɛ, nɛ e biɔ lɛ konɛ e bu a sɔlemihi tue nɛ e ngɔ a yayamihi kɛ ke mɛ. (Mateo 1:​21; Roma Bi 8:​34) Ke Yesu kɛ ní bimihi kaa jã a fɔ Mawu hɛ mi ɔ, e buɔ tue ejakaa a kɛ E suɔmi nya ní kɔ. Mawu tsɔ Yesu kɛ ba zugba a nɔ “konɛ a gu e nɔ kɛ he je ɔ yi wami”.​—Yohane 3:​17.

Anɛ hemi kɛ yemi nɛ wa ma ná ngɛ Yesu mi ɔ pɛ lɛ ma ha nɛ wa ná yi wami hemi lo?

 Dɛbi. Loko wa ma ná neneene wami ɔ, e sa nɛ wa ná hemi kɛ yemi ngɛ Yesu mi, se e biɔ babauu pe jã. (Ní Tsumi 16:30, 31) Baiblo ɔ de ke: “Kaa bɔ nɛ nɔmlɔ tso nɛ mumi be mi ɔ gbo ɔ, jã nɔuu kɛ̃ nɛ hemi kɛ yemi nɛ ní tsumi piɛɛ we he ɔ hu gbo.” (Yakobo 2:​26) Loko a ma he wa yi wami ɔ, e sa nɛ:

•   Waa kase Yesu kɛ e Tsɛ, Yehowa a he ní.​— Yohane 17:3.

•   Wa ná hemi kɛ yemi nɛ mi wa ngɛ a mi.​—Yohane 12:44; 14:1.

•   Waa ye a mlaa amɛ a nɔ kɛ tsɔɔ kaa wa ngɛ a mi hemi kɛ yemi. (Luka 6:​46; 1 Yohane 2:​17) Yesu tsɔɔ kaa pi nɔ fɛɛ nɔ nɛ ma tsɛ lɛ “Nyɔmtsɛ” ɔ nɛ a ma he e yi wami, mohu ɔ, nihi nɛ a “peeɔ [e] Tsɛ nɛ e ngɛ hiɔwe ɔ suɔmi nya ní ɔ” pɛ​—Mateo 7:​21.

•   Ke waa kɛ nyagbahi ngɛ kpee po ɔ, e sa nɛ waa ya nɔ nɛ wa je hemi kɛ yemi kpo. Yesu ma enɛ ɔ nɔ mi benɛ e de ke: “Nɔ nɛ e ma fĩ si kɛ ya si nyagbe ɔ, a ma he e yi wami” ɔ.​—Mateo 24:13.