La 119:1-176
-
Hɛsa kɛ ha Mawu munyu ɔ nɛ e se be ɔ
-
‘Mɛni nihewi kɛ yihewi maa pee konɛ a je mi bami he nɛ tsɔ?’ (9)
-
“Ye bua jɔɔ o kaimi ɔmɛ a he” (24)
-
“Hyɛ bɔ nɛ i suɔ o mlaa a ha!” (97)
-
“I kɔɔ nɔ́ se pe ye tsɔɔli ɔmɛ tsuo” (99)
-
“O munyu ɔ ji kane nɛ i kɛ hyɛɛ ye nane nya” (105)
-
“O munyu ɔ tsuo ji anɔkuale” (160)
-
Nihi nɛ a suɔ o mlaa a ngɛ tue mi jɔmi (165)
-
א [Alef]
119 Nihi nɛ piami ko be a he,*Nɛ́ a nyɛɛɔ ngɛ Yehowa mlaa a nya a ngɛ bua jɔmi.
2 Nihi nɛ a yeɔ e kaimi ɔmɛ a nɔ,Nɛ́ a hlaa e se blɔ kɛ a tsui tsuo ɔ ngɛ bua jɔmi.
3 A pee we nɔ́ nɛ dɛ;A nyɛɛɔ e blɔ ɔmɛ a nɔ.
4 O fã keÁ ye o fami ɔmɛ a nɔ sisiisi.
5 I ná nɛ i fĩ si kpɛii*Nɛ i ye o blɔ tsɔɔmi ɔmɛ a nɔ!
6 Kɛkɛ ɔ, ke i susu o mlaa amɛ tsuo a he ɔ,Zo be mi gbee.
7 Ke i kase o dami kojomi ɔmɛ ɔ,I kɛ tsui nɛ da ma je o yi
8 Ma ye o blɔ tsɔɔmi ɔmɛ a nɔ.
O kɛ mi nɛ ko po tako mi gblegbleegble.
ב [Bet]
9 Kɛ niheyo ma plɛ kɛ ha nɛ e je mi bami he nɛ tsɔ kɛɛ?
Nɔ́ nɛ e maa pee ji, e maa hyɛ e he nɔ saminya, nɛ e maa ye o munyu ɔ nɔ.
10 I kɛ ye tsui tsuo hlaa o se blɔ.
Ko ha nɛ ma gba kɛ je o mlaa amɛ a he.
11 I ngɔɔ o munyu ɔ kɛ toɔ ye tsui miKonɛ ma ko pee yayami kɛ si mo.
12 Oo Yehowa, a je o yi;Moo tsɔɔ mi o blɔ tsɔɔmi ɔmɛ.
13 I kɛ ye nya jajeɔKojomihi tsuo nɛ je o nya a.
14 I nyaa ngɛ o kaimi ɔmɛ a hePe ní kpahi tsuo nɛ a he jua wa a.
15 Ma susu o fami ɔmɛ a he,*Nɛ ye hɛngmɛ maa hi o blɔ ɔmɛ a nɔ.
16 Ye bua jɔɔ o mlaa amɛ a he.
Ye hɛ be o munyu ɔ nɔ jee.
ג [Gimel]
17 O kɛ o sɔmɔlɔ ɔ nɛ hi si saminya,Konɛ ma hi wami mi nɛ ma ye o munyu ɔ nɔ.
18 Mo bli ye hɛngmɛ konɛ ma naNyakpɛ níhi nɛ ngɛ o mlaa a mi ɔ heii.
19 Nubwɔ ji mi ngɛ zugba a nɔ.
Koo ngɔ o mlaa amɛ kɛ laa mi.
20 Ye* hɛ jaaNgɛ o kojomi ɔmɛ a he be fɛɛ be.
21 O kãã he nɔ woli a hɛ mi,Nihi nɛ a gbiɛ mɛ, nɛ a gba kɛ je o mlaa amɛ a he ɔ.
22 Mo je* he fɛu yemi kɛ hɛ mi si puemi kɛ je ye nɔ,Ejakaa i ye o kaimi ɔmɛ a nɔ.
23 Ke ma nikɔtɔmahi bua a he nya, nɛ a tu munyu kɛ si mi po ɔ,Imi o sɔmɔlɔ ɔ, i susuɔ o blɔ tsɔɔmi ɔmɛ a he.*
24 Ye bua jɔɔ o kaimi ɔmɛ a he;O kaimi ɔmɛ nɔuu lɛ woɔ mi ga.
ד [Dalet]
25 I* hwɔɔ si ngɛ zu mi.
Moo baa ye yi ngɛ o munyu ɔ nya.
26 I jaje níhi nɛ i pee ɔ tsuo kɛ tsɔɔ mo, nɛ o he mi nɔ;Moo tsɔɔ mi o blɔ tsɔɔmi ɔmɛ.
27 Mo ha nɛ ma nu nɔ́ nɛ o fami ɔmɛ tsɔɔ* ɔ sisi,Konɛ ma susu o ní tsumihi nɛ a ngɛ nyakpɛ ɔ he.*
28 Aywilɛho yemi ha nɛ i* hwɔ we mahe.
Moo wo mi he wami ngɛ o munyu ɔ nya.
29 Ko ha nɛ ma nyɛɛ sisimi blɔ nɔ,Moo tsɔɔ mi o mlaa a.
30 I wo anɔkuale blɔ ɔ.
I yɔse kaa o kojomi ɔmɛ da.
31 I mɛtɛ o kaimi ɔmɛ a he.
Oo Yehowa, ko ha nɛ ye nine nɛ nyɛ si.*
32 Ma di o mlaa amɛ a se wawɛɛ,*Ejakaa o bli ye tsui mi konɛ ma nu o mlaa amɛ a sisi.*
ה [He]
33 Oo Yehowa, moo tsɔɔ mi ní, konɛ ma nyɛɛ ngɛ o blɔ tsɔɔmi ɔmɛ a nya,Nɛ ma nyɛɛ se kɛ ya si nyagbe.
34 Mo ha mi nɔ́ sisi numi,Konɛ ma ye o mlaa a nɔ,Nɛ́ ma nyɛɛ ngɛ nya kɛ ye tsui tsuo.
35 Mo kudɔ mi* ngɛ o mlaa amɛ a nya,Ejakaa ye bua jɔ he.
36 Moo dɔ ye tsui kɛ ya o kaimi ɔmɛ a he,Konɛ ma ko fo imi pɛ ye nɔ́ mi.
37 Ko ha nɛ ma hyɛ níhi nɛ se nami be a he;Moo baa ye yi ngɛ o blɔ ɔ nɔ.
38 Moo ye si nɛ o wo* o sɔmɔlɔ ɔ nɔ,Konɛ a ye mo gbeye.*
39 Mo je hɛ mi si puemi nɛ i ngɛ gbeye yee kaa e maa ba ye nɔ ɔ kɛ je,Ejakaa o kojomi ɔmɛ hi.
40 Hyɛ bɔ nɛ ye hɛ ngɛ jae ngɛ o blɔ tsɔɔmi ɔmɛ a he ha.
Moo baa ye yi ngɛ o dami ɔ mi.
ו [Waw]
41 Oo Yehowa, ha nɛ ma na o suɔmi nɛ se pui ɔ,Ha nɛ ma na o yi wami hemi ɔ ngɛ́ o si womi* ɔ nya;
42 Kɛkɛ ɔ, ma na heto kɛ ha nɔ nɛ bɔɔ mi ahlua a,Ejakaa i ngɔ ye hɛ kɛ fɔ o munyu ɔ nɔ.
43 Ko je anɔkuale munyu ɔ kɛ je ye nya,Ejakaa i kɛ ye hɛ fɔ o kojomi ɔ nɔ.*
44 Ma ye o mlaa a nɔ be fɛɛ be,Kɛ ya neneene.
45 Nɛ ma nyɛɛ ngɛ he ko nɛ ngɛ slɔkee,*Ejakaa i hlaa o fami ɔmɛ a se blɔ.
46 Ma tu o kaimi ɔmɛ a he munyu ngɛ matsɛmɛ a hɛ mi,Nɛ i be zo gboe.
47 Ye bua jɔɔ o mlaa amɛ a he,Ee, i suɔ o mlaa amɛ.
48 Akɛnɛ i suɔ o mlaa amɛ he je ɔ, ma wo ye nine nɔ kɛ tsɔɔ mo,Nɛ ma susu o blɔ tsɔɔmi ɔmɛ a he.*
ז [Zayin]
49 Mo kai munyu nɛ o tu kɛ tsɔɔ o sɔmɔlɔ ɔ,*Nɔ́ nɛ o gu nɔ kɛ ha mi hɛnɔkami ɔ.*
50 Enɛ ɔ ji nɔ́ nɛ woɔ ye bua ngɛ ye haomi mi,Ejakaa o munyu ɔ baa ye yi.
51 He nɔ woli yeɔ ye he fɛu wawɛɛ nitsɛ,Se i gba we kɛ ji o mlaa a he.
52 Oo Yehowa, i kaiɔ o kojomi ɔmɛ kɛ je blema lokoo,Nɛ i náa bua womi ngɛ a mi.
53 I ná abofu wawɛɛ nitsɛ ngɛ yiwutsotsɛmɛ a he je,Nihi nɛ a kuaa o mlaa a.
54 O blɔ tsɔɔmi ɔmɛ ji lahi nɛ i laaNgɛ he fɛɛ he nɛ i ngɛ.*
55 Oo Yehowa, nyɔ mi ɔ, i kaiɔ o biɛ ɔ,Konɛ ma nyɛ nɛ ma ye o mlaa a nɔ.
56 Jã lɛ i peeɔ be fɛɛ be,Ejakaa i yeɔ o fami ɔmɛ a nɔ.
ח [Het]
57 Yehowa ji ye blɔ fa mi nɔ́;I wo si kaa ma ye o munyu ɔmɛ a nɔ.
58 I kɛ ye tsui tsuo ngɛ mo pɛɛ kpae;*Naa mi mɔbɔ ngɛ o si womi* ɔ nya.
59 I susu ye blɔ ɔmɛ a heBɔ nɛ pee nɛ ma kpale ba nyɛɛ o kaimi ɔmɛ a se.
60 I yeɔ oya, nɛ i tui tsleKaa ma ye o mlaa amɛ a nɔ.
61 Yiwutsotsɛmɛ a kpã amɛ bɔle mi kɛ kpe,Se ye hɛ ji o mlaa a nɔ.
62 Nyɔ mi kpɛti ɔ, i teɔ si nɛ i naa mo siNgɛ o dami kojomi ɔmɛ a he je.
63 Ye huɛmɛ ji nihi tsuo nɛ yeɔ mo gbeye,Kɛ nihi nɛ yeɔ o fami ɔmɛ a nɔ ɔ.
64 Oo Yehowa, o suɔmi nɛ se pui ɔ hyi zugba a nɔ tɔ;Moo tsɔɔ mi ní, konɛ ma le o blɔ tsɔɔmi ɔmɛ.
ט [Tet]
65 Oo Yehowa, o kɛ o sɔmɔlɔ ɔ hi si saminyaNgɛ o munyu ɔ nya.
66 Mo ha mi juɛmi nɛ mi kuɔ kɛ nile,Ejakaa i ngɔ ye hɛ kɛ fɔ o mlaa amɛ a nɔ.
67 Loko ma ya je haomi mi ɔ, jinɛ i pɔɔ blɔ tlami,*Se amlɔ nɛ ɔ, i yeɔ o munyu ɔ nɔ.
68 O hi, nɛ o ní tsumi ɔmɛ hu hi.
Moo tsɔɔ mi o blɔ tsɔɔmi ɔmɛ.
69 He nɔ woli tuɔ lakpa munyuhi ngɛ ye he,Se i yeɔ o fami ɔmɛ a nɔ kɛ ye tsui tsuo.
70 A tsui kplii,*Se imi lɛɛ, ye bua jɔɔ o mlaa a he.
71 E hi kaa i ya je haomi mi,Konɛ ma kase o blɔ tsɔɔmi ɔmɛ.
72 Mlaa nɛ o wo ɔ hi ha mi,E hi ha mi pe sika tsu kɛ sika hiɔ akpehi abɔ.
י [Yod]
73 O nine lɛ pee mi, nɛ e bɔ mi.
Mo ha mi nɔ́ sisi numi,Konɛ ma nyɛ nɛ ma kase o mlaa amɛ.
74 Nihi nɛ a yeɔ mo gbeye ɔ naa mi nɛ a nyaa,Ejakaa o munyu ɔ nɔ lɛ i ngɔ ye hɛ kɛ fɔ.*
75 Oo Yehowa, i le kaa o kojomi ɔmɛ da,Nɛ o tsɔse mi ngɛ o we anɔkuale yemi ɔ mi.
76 I kpa mo pɛɛ nɛ o ha nɛ o suɔmi nɛ se pui ɔ nɛ wo ye bua,Ngɛ si nɛ o wo* o sɔmɔlɔ ɔ nya.
77 Naa mi mɔbɔ konɛ ma ya nɔ nɛ ma hi wami mi,Ejakaa i suɔ o mlaa a.
78 Zo nɛ gbe he nɔ woli,Ejakaa a tɔ̃ɔ̃ ye nɔ yaka gu.*
Se ma susu o fami ɔmɛ a he.*
79 Ha nɛ nihi nɛ a yeɔ mo gbeye ɔ nɛ a kpale kɛ ba ye ngɔ,Nihi nɛ a le o kaimi ɔmɛ ɔ.
80 Ha nɛ ma ngɔ ye tsui tsuo kɛ ye o blɔ tsɔɔmi ɔmɛ a nɔ,Konɛ zo nɛ ko gbe mi.
כ [Kaf]
81 Ye hɛ jaa* ngɛ o yi wami hemi ɔ he,Ejakaa o munyu ɔ nɔ lɛ i ngɔ ye hɛ kɛ fɔ.*
82 I hyɛ o si womi ɔ blɔ hluu,Nɛ i bi ke: “Mɛni be nɛ o maa wo ye bua?”
83 Ejakaa i pee kaa lohwe he womi tɔ nɛ a kɛ kpla si ngɛ lasuku mi nɛ e gbli,Se ye hɛ ji o blɔ tsɔɔmi ɔmɛ a nɔ.
84 O sɔmɔlɔ ɔ maa mlɛ kɛ ya si mɛni be?
Mɛni be nɛ o maa kojo nihi nɛ a waa mi yi mi ɔ?
85 He nɔ woli kɛ nihi nɛ a bui o mlaa a,Tsua muɔhi konɛ ma nɔ mi.
86 O mlaa amɛ tsuo ɔ, a ma nyɛ maa fĩa kɛ fɔ a nɔ.
Adesahi waa mi yi mi yaka gu; moo ye bua mi!
87 E piɛ nguɛ nya nɛ a tane ye yi ngɛ zugba a nɔ,Se i kua we o fami ɔmɛ.
88 Moo baa ye yi ngɛ o suɔmi nɛ se pui ɔ he je,Konɛ ma ye kaimihi nɛ o kɛ ha a nɔ.
ל [Lamed]
89 Oo Yehowa,O munyu ɔ maa hi si kɛ maa ya neneene ngɛ hiɔwe.
90 O we anɔkuale yemi ɔ ngɛ kɛ yaa yi nɔhi tsuo.
O ngɔ zugba a kɛ ma si kpɛii, nɛ e ya nɔ nɛ e maa si.
91 A ngɛ kɛ ba si mwɔnɛ ɔ ngɛ o kojomi ɔmɛ a nya,*Ejakaa mɛ tsuo a ji o sɔmɔli.
92 Ke pi nɛ i suɔ o mlaa a,Jinɛ ye hɛ mi ko kpata ngɛ ye haomi ɔ mi.
93 Ye hɛ be o fami ɔmɛ a nɔ jee gblegbleegble,Ejakaa lɔ ɔmɛ o kɛ baa ye yi.
94 O nɔ́ ji mi; mo he ye yi wami,Ejakaa i hla o fami ɔmɛ a se blɔ.
95 Yiwutsotsɛmɛ mlɛɔ konɛ a kpata ye hɛ mi,Se i susuɔ o kaimi ɔmɛ a he wawɛɛ.
96 I na kaa nɔ́ fɛɛ nɔ́ nɛ hi kɛ pi si ɔ huzu ngɛ he,Se huzu be o mlaa a he.*
מ [Mem]
97 Hyɛ bɔ nɛ i suɔ o mlaa a ha!
I susuɔ he* ligbi ɔ tsuo.
98 O mlaa a ha nɛ i ngɛ juɛmi pe ye he nyɛli ɔmɛ,Ejakaa e tsɔɔ mi blɔ daa.
99 I kɔɔ nɔ́ se pe ye tsɔɔli ɔmɛ tsuo,Ejakaa i susuɔ o kaimi ɔmɛ a he.*
100 Ye ní peepee tsɔɔ kaa i kɔɔ nɔ́ se pe nikɔtɔmahi,Ejakaa i yeɔ o fami ɔmɛ a nɔ.
101 I nyɛɛ we blɔ yaya ko nɔ,Bɔ nɛ pee nɛ ma ye o munyu ɔ nɔ.
102 I gba we kɛ ji o kojomi ɔmɛ a he,Ejakaa o tsɔɔ mi ní.
103 Hyɛ bɔ nɛ o munyu ɔmɛ ngɔɔ ngɛ ye nya mi ha,A ngɔɔ pe hwo ngɛ ye nya mi!
104 O fami ɔmɛ haa nɛ i kɛ nɔ́ sisi numi peeɔ ye ní.
Lɔ ɔ he je nɛ i hiɔ nɔ́ yaya fɛɛ nɔ́ yaya a nɛ.
נ [Nun]
105 O munyu ɔ ji kane nɛ i kɛ hyɛɛ ye nane nya,Kɛ la nɛ haa ye blɔ mi tɛ̃ɔ.
106 I kã kita kaa ma ye o dami kojomi ɔmɛ a nɔ,Nɛ ma ye nɔ hulɔ.
107 I hao wawɛɛ.
Oo Yehowa, moo baa ye yi ngɛ o munyu ɔ nya.
108 Oo Yehowa, i kpa mo pɛɛ, o bua nɛ jɔ ye yi jemi* afɔle nɛ je tsui mi faa a he,Nɛ́ o tsɔɔ mi o kojomi ɔmɛ.
109 Be fɛɛ be ɔ, ye wami ngɛ oslaa mi,*Se ye hɛ ji o mlaa a nɔ.
110 Yiwutsotsɛmɛ tsɔ̃ mi klama,Se i gba we kɛ ji o fami ɔmɛ a he.
111 I ngɔ o kaimi ɔmɛ kaa ye weto ní* kɛ yaa neneene,Ejakaa lɔ ɔmɛ lɛ a haa nɛ ye tsui nyaa.
112 I ma ye juɛmi nya si* kaa ma bu o blɔ tsɔɔmi ɔmɛ tueBe fɛɛ be, kɛ ya si nyagbe.
ס [Samek]
113 I hiɔ nihi nɛ a kɛ a tsui tsuo yi mo anɔkuale ɔ,*Se i suɔ o mlaa a.
114 Mo ji ye laami he kɛ ye tsɛ̃i,Ejakaa o munyu ɔ nɔ lɛ i ngɔ ye hɛ kɛ fɔ.*
115 Nyɛ nimli yayamihi, nyɛɛ je ye kasa nya kɛ ya se,Konɛ ma nyɛ nɛ ma ye ye Mawu ɔ mlaa amɛ a nɔ.
116 Moo ye bua mi kaa bɔ nɛ o wo si ɔ,*Konɛ ma ya nɔ nɛ ma hi wami mi;Ko ha nɛ ye hɛnɔkami ɔ nɛ pee yaka.*
117 Moo ye bua mi konɛ a he ye yi wami;Kɛkɛ ɔ, i kɛ ye juɛmi maa ma o blɔ tsɔɔmi ɔmɛ a nɔ be fɛɛ be.
118 O kuaa nihi tsuo nɛ a gbaa kɛ jeɔ o blɔ tsɔɔmi ɔmɛ a he ɔ,Ejakaa a ji lakpatsɛmɛ kɛ nɔ sisili.
119 O tsɛ̃ɔ yiwutsotsɛmɛ tsuo nɛ a ngɛ zugba a nɔ ɔ kɛ pueɔ he kaa mu.*
Lɔ ɔ he je nɛ i suɔ o kaimi ɔmɛ ɔ nɛ.
120 O he gbeye haa nɛ ye he* doɔ blibliibli;I yeɔ o kojomi ɔmɛ gbeye.
ע [Ayin]
121 I pee nɔ́ nɛ da kɛ nɔ́ nɛ sa.
Koo ngmɛɛ ye he kɛ ha nihi nɛ a waa mi yi mi ɔ!
122 Mo ha nɛ o sɔmɔlɔ ɔ nɛ ná nɔ mi mami kaa níhi a mi maa hi ha lɛ;Ko ha nɛ he nɔ woli nɛ a wa mi yi mi.
123 I hyɛ o yi wami hemi ɔKɛ o si womi* nɛ da a blɔ hluu nɛ pɔ tɔ ye hɛngmɛ he.
124 Mo je o suɔmi nɛ se pui ɔ kpo kɛ tsɔɔ o sɔmɔlɔ ɔ,Nɛ́ o tsɔɔ mi o blɔ tsɔɔmi ɔmɛ.
125 O sɔmɔlɔ ji mi; mo ha mi nɔ́ sisi numi,Konɛ ma le o kaimi ɔmɛ.
126 Be su nɛ Yehowa ma tsu sane ɔ he ní,Ejakaa a tɔ̃ o mlaa a nɔ.
127 Enɛ ɔ he je nɛ i suɔ o mlaa amɛPe sika tsu, pe sika tsu ngmingmiingmi* po ɔ nɛ.
128 Enɛ ɔ he ɔ, i buɔ blɔ tsɔɔmi fɛɛ blɔ tsɔɔmi* nɛ jeɔ o ngɔ ɔ kaa e da;I hiɔ nɔ́ yaya fɛɛ nɔ́ yaya.
פ [Pe]
129 O kaimi ɔmɛ ngɛ nyakpɛ.
Lɔ ɔ he je nɛ i* yeɔ a nɔ ɔ nɛ.
130 Ke a tsɔɔ o munyu ɔmɛ a sisi ɔ, e ngɔɔ la kɛ ba a,Nɛ e haa nɔ nɛ be níhi a si kpami náa nɔ́ sisi numi.
131 Ye hɛ ngɛ jae ngɛ o mlaa amɛ a he,Lɔ ɔ he ɔ, i pa ye nya mi hatoo kɛ ngɛ mumi woɔ,*
132 Mo plɛ kɛ hyɛ mi nɛ o na mi mɔbɔ,Nɛ o kojo mi kaa bɔ nɛ o kojoɔ nihi nɛ a suɔ o biɛ ɔ.
133 Mo kudɔ ye nane hiami slɔkee* ngɛ o munyu ɔ nya;Ko ha nɛ nɔ́ yayami ko nɛ ye ye nɔ.
134 Mo kpɔ̃ mi ngɛ yi mi wali a dɛ,Nɛ ma ye o fami ɔmɛ a nɔ.
135 Ha nɛ o hɛ mi nɛ kpɛ ngɛ o sɔmɔlɔ ɔ nɔ,Nɛ́ o tsɔɔ mi o blɔ tsɔɔmi ɔmɛ.
136 Vonyu beɔ ngɛ ye hɛ mi kaa pa,Ejakaa nihi yi o mlaa a nɔ.
צ [Tsade]
137 Oo Yehowa, dalɔ ji mo,Nɛ o kojomi ɔmɛ da.
138 Kaimihi nɛ o kɛ haa a da,Nɛ a ma nyɛ maa fĩa kɛ fɔ a nɔ kulaa.
139 Suɔmi nɛ i ngɛ kɛ ha mo ɔ ngɛ kaa la nɛ ngɛ tsoe ngɛ ye mi,Ejakaa ye he nyɛli ɔmɛ a hɛ je o munyu ɔmɛ a nɔ.
140 O munyu ɔ, a tsu he nyaii,Nɛ o sɔmɔlɔ ɔ bua jɔ he.
141 I ji nɔ nyafii nɛ a bui lɛ;Se kɛ̃ ɔ, ye hɛ ji o fami ɔmɛ a nɔ.
142 O dami ɔ ngɛ kɛ yaa neneene,Nɛ o mlaa a ji anɔkuale.
143 E ngɛ mi kaa haomi kɛ nyagba baa ye nɔ mohu lɛɛ,Se loloolo ɔ, i suɔ o mlaa amɛ.
144 O kaimi ɔmɛ da nɛ a ngɛ kɛ yaa neneene.
Mo ha mi nɔ́ sisi numi konɛ ma ya nɔ nɛ ma hi wami mi.
ק [Kof]
145 I tsɛɔ mo kɛ ye tsui tsuo. Oo Yehowa, mo he mi nɔ.
Ma ye o blɔ tsɔɔmi ɔmɛ a nɔ.
146 I ngɛ mo tsɛe; mo he ye yi wami!
Ma ye o kaimi ɔmɛ a nɔ.
147 Ye hɛ tsɛ̃ɔ loko e suɔ makɛ,* nɛ i foɔ ya kɛ biɔ yemi kɛ buami,Ejakaa o munyu ɔmɛ a nɔ lɛ i ngɔ ye hɛ kɛ fɔ.*
148 I teɔ si nyɔ mi kpɛti,*Konɛ ma nyɛ nɛ ma susu o munyu ɔ he.*
149 Moo bu ye gbi tue ngɛ o suɔmi nɛ se pui ɔ he je.
Oo Yehowa, moo baa ye yi ngɛ o dami sane yemi ɔ nya.
150 Nihi nɛ a tsuɔ zo ní ɔ* ngɛ hɛe kɛ ngɛ ye he sue;A kɛ o mlaa a he kɛ.
151 Oo Yehowa, o ngɛ ye kasa nya haa,Nɛ o mlaa amɛ tsuo ji anɔkuale.
152 I kase o kaimi ɔmɛ a he ní blema lokoo,Kaa o ngɔ mɛ kɛ ma si konɛ a hi si kɛ ya neneene.
ר [Resh]
153 Moo hyɛ ye nɔ́ nami ɔ nɛ o kpɔ̃ mi,Ejakaa ye hɛ ji o mlaa a nɔ.
154 Moo fã ye he nɛ o kpɔ̃ mi;Moo baa ye yi ngɛ o si womi* ɔ nya.
155 Yi wami hemi kɛ yiwutsotsɛmɛ a kpɛti kɛ,Ejakaa a hla we o blɔ tsɔɔmi ɔmɛ a se blɔ.
156 Oo Yehowa, o mɔbɔ nami ɔ hiɛ babauu.
Moo baa ye yi ngɛ o dami sane yemi ɔ nya.
157 Nihi nɛ a waa mi yi mi kɛ ye he nyɛli a he hiɛ babauu;Se i gba we kɛ ji o kaimi ɔmɛ a he.
158 Nɔ sisili a he peeɔ mi tai,Ejakaa a yi o munyu ɔ nɔ.
159 Hyɛ bɔ nɛ i suɔ o fami ɔmɛ ha!
Oo Yehowa, moo baa ye yi ngɛ o suɔmi nɛ se pui ɔ he je.
160 O munyu ɔ tsuo ji anɔkuale,Nɛ o dami kojomi ɔmɛ ngɛ kɛ yaa neneene.
ש [Sin] aloo [Shin]
161 Ma nikɔtɔmahi waa mi yi mi yaka gu,Se i ngɛ bu nɛ mi kuɔ kɛ ha o munyu ɔmɛ.
162 I nyaa o munyu ɔ heKaa nɔ ko nɛ e nine su ta yibu ní babauu nɔ.
163 I sume lakpa kulaa, i hieɔ,Se i suɔ o mlaa a.
164 I jeɔ o yi si kpaago daa ligbiNgɛ o dami kojomi ɔmɛ a he je.
165 Nihi nɛ a suɔ o mlaa a ngɛ tue mi jɔmi babauu;Nɔ́ ko nɔ́ ko be nyɛe maa tɔ̃tɔ̃ a nane.*
166 Oo Yehowa, níhi nɛ o peeɔ kɛ heɔ nɔ yi wami ɔ nɔ lɛ i ngɔ ye hɛ kɛ fɔ,Nɛ i yeɔ o mlaa amɛ a nɔ.
167 I* yeɔ o kaimi ɔmɛ a nɔ,Nɛ i suɔ o kaimi ɔmɛ wawɛɛ.
168 I yeɔ o fami ɔmɛ kɛ o kaimi ɔmɛ a nɔ,Ejakaa o le níhi tsuo nɛ i peeɔ ɔ.
ת [Taw]
169 Oo Yehowa, ha nɛ ya nɛ i foɔ kɛ biɔ yemi kɛ buami ɔ nɛ su o ngɔ.
Ha nɛ ma nu nɔ́ sisi ngɛ o munyu ɔ nya.
170 Ha nɛ pɛɛ nɛ i kpaa kaa o na mi mɔbɔ ɔ nɛ su o hɛ mi.
Mo he ye yi wami kaa bɔ nɛ o wo si ɔ.*
171 Ha nɛ ma je o yi wawɛɛ,Ejakaa o tsɔɔ mi o blɔ tsɔɔmi ɔmɛ.
172 Ye lilɛ maa ngɔ munyuhi nɛ je o nya a kɛ la,Ejakaa o mlaa amɛ tsuo da.
173 O nine nɛ́ pee klaalo kaa e maa ye bua mi,Ejakaa i ma nya si kaa ma ye o fami ɔmɛ a nɔ.
174 Oo Yehowa, ye hɛ jaa ngɛ o yi wami hemi ɔ he,Nɛ i suɔ o mlaa a.
175 Mo ha nɛ ma* hi wami mi konɛ ma nyɛ ma je o yi;O kojomi ɔmɛ nɛ a ye bua mi.
176 I tla blɔ kaa jijɔ nɛ laa. Mo hla o sɔmɔlɔ ɔ,Ejakaa ye hɛ ji o mlaa amɛ a nɔ.
Sisi Ningmahi
^ Aloo “Nihi nɛ a hɛɛ a we anɔkuale yemi mi.”
^ Ngɛ Hebri gbi mi ɔ, “I ná nɛ ye blɔ ɔmɛ ma si kpɛii.”
^ Aloo “Ma kase o fami ɔmɛ.”
^ Aloo “Ye klaa.”
^ Ngɛ Hebri gbi mi ɔ, “Mo kpɛne.”
^ Aloo “O sɔmɔlɔ ɔ kaseɔ o blɔ tsɔɔmi ɔmɛ.”
^ Aloo “Ye klaa.”
^ Aloo “Konɛ ma kase o ní tsumihi nɛ a ngɛ nyakpɛ ɔ he ní.”
^ Ngɛ Hebri gbi mi ɔ, “ma nu o fami ɔmɛ a blɔ.”
^ Aloo “ye klaa.”
^ Aloo “ko ha nɛ zo nɛ gbe mi.”
^ Ngɛ Hebri gbi mi ɔ, “Ma tu fo ngɛ o mlaa amɛ a blɔ ɔ nɔ.”
^ Baiblo komɛ de ke “o ha nɛ ye tsui ná kã.”
^ Aloo “Ha nɛ ma nyɛɛ.”
^ Aloo “Moo ye nɔ́ nɛ o de.”
^ Baiblo komɛ de ke “Moo ye si nɛ o wo nihi nɛ a yeɔ mo gbeye ɔ nɔ.”
^ Aloo “ngɛ́ o munyu.”
^ Aloo “Ejakaa i mlɛɔ o kojomi ɔ.”
^ Aloo “he ko nɛ ngɛ gbajaa.”
^ Aloo “Nɛ ma kase o blɔ tsɔɔmi ɔmɛ.”
^ Aloo “kai si nɛ o wo o sɔmɔlɔ ɔ.”
^ Aloo “Nɔ nɛ ha nɛ i mlɛ ɔ.”
^ Aloo “Ngɛ we nɛ i ngɛ mi kaa nubwɔ ɔ mi.”
^ Aloo “ngɛ o munyu.”
^ Aloo “ngɛ hlae nɛ o bua nɛ jɔ ye he.”
^ Aloo “jinɛ i peeɔ yayami nɛ i ji blɔ.”
^ Ngɛ Hebri gbi mi ɔ, “A tsui ma kaa zɔ.”
^ Aloo “Ejakaa i mlɛɔ o munyu ɔ.”
^ Aloo “Ngɛ nɔ́ nɛ o de.”
^ Baiblo komɛ de ke “a tɔ̃ɔ ye nɔ kɛ gu lakpa munyuhi nɛ a tuɔ ɔ nɔ.”
^ Aloo “ma kase o fami ɔmɛ a he ní.”
^ Aloo “Ejakaa i mlɛɔ o munyu ɔ.”
^ Aloo “Ye klaa peeɔ gbedee.”
^ Nɛ ji e nibɔ ní ɔmɛ tsuo.
^ Ngɛ Hebri gbi mi ɔ, “Se o mlaa a mi bli wawɛɛ.”
^ Aloo “I kaseɔ.”
^ Aloo “Ejakaa i kaseɔ o kaimi ɔmɛ.”
^ Ngɛ Hebri gbi mi ɔ, “ye nya mi.”
^ Aloo “Ye klaa ngɛ ye dɛ mi.”
^ Aloo “ye gbosi ní.”
^ Ngɛ Hebri gbi mi ɔ, “I ma nya si ngɛ ye tsui mi.”
^ Aloo “nihi nɛ a tsui mi gba enyɔ.”
^ Aloo “Ejakaa i mlɛɔ o munyu ɔ.”
^ Aloo “ye bua mi ngɛ o munyu ɔ nya.”
^ Aloo “nɛ ba plɛ pee hɛ mi si puemi.”
^ Hebri munyu nɛ ɔ tsɔɔ mu nɛ a jeɔ ngɛ sika tsu loo sika hiɔ nɛ a sile mi.
^ Ngɛ Hebri gbi mi ɔ, “ye he lo.”
^ Aloo “o munyu.”
^ Aloo “sika tsu nɛ a tsu he.”
^ Aloo “fami fɛɛ fami.”
^ Aloo “ye klaa.”
^ Ngɛ Hebri gbi mi ɔ, “nɛ ye mumi nya taa.”
^ Aloo “Mo ha nɛ ke i hia ye nane ɔ, ma ma si kpɛii.”
^ Aloo “loko e suɔ makɛ futɛfutɛ.”
^ Aloo “Ejakaa i mlɛɔ o munyu ɔmɛ.”
^ Aloo “nɛ ma kase o munyu ɔ.”
^ Ngɛ Hebri gbi mi ɔ, “I bliɔ ye hɛngmɛ loko e suɔ nyɔ mi hwɔɔmi be”
^ Aloo “Nihi nɛ a je mi bami hí ɔ.”
^ Aloo “o munyu.”
^ Aloo “Tɛmi tɛ ko be ha mɛ.”
^ Aloo “Ye klaa.”
^ Aloo “he ye yi wami ngɛ o munyu ɔ nya.”
^ Aloo “ye klaa nɛ.”
