Ke O Ba Le Mawu ɔ, Kɛ O Ma Ná He Se Ha Kɛɛ?
Kɛ ba si amlɔ nɛ ɔ, wa bɔ wa he mɔde nɛ bɔɔbɔɔbɔɔ ɔ, wa ná sane bimi nɛ ji, Mɛnɔ ji Mawu? ɔ heto. Benɛ wa je sisi ɔ, wa na ngɛ Baiblo ɔ mi kaa e biɛ ji Yehowa nɛ e su titli ji suɔmi. Wa susu nɔ́ nɛ e pee momo kɛ nɔ́ nɛ e maa pee hwɔɔ se konɛ adesahi nɛ a ná bua jɔmi ɔ he. Níhi babauu ngɛ nɛ o ma nyɛ maa kase kɛ kɔ Mawu he, se eko ɔ, o ngɛ susue kaa ke o kase Mawu he ní babauu ɔ, mɛni se o ma ná?
Yehowa wo si kaa “Ke o hla e se blɔ ɔ, e ma he mo.” (1 Kronika 28:9) Mo susu nike ní nɛ he jua wa nɛ o ma ná ke o ba le Mawu ɔ he nɛ o hyɛ—o kɛ ‘Yehowa maa pee huɛ”! (La 25:14) Kɛ o ma ná huɛ bɔmi nɛ ɔ he se ha kɛɛ?
O ma ná Bua jɔmi nitsɛnitsɛ. A kale Yehowa kaa e ji “bua jɔmi Mawu.” (1 Timoteo 1:11) Ke o hɛ mo kɛ su Mawu he nɛ o kɛ níhi nɛ o kase ngɛ e he ɔ tsu ní ɔ, o ma ná bua jɔmi nitsɛnitsɛ, nɛ enɛ ɔ maa ye bua mo ngɛ o si himi mi. (La 33:12) O ma nyɛ ma ná si himi nɛ bua jɔmi ngɛ mi hulɔ kɛ gu su yayahi nɛ o ma kua, su kpakpahi nɛ o ma ná, kɛ tue mi jɔmi nɛ maa hi o kɛ ni kpahi nyɛ kpɛti ɔ nɔ. Kɛkɛ ɔ, o kɛ la polɔ ɔ ma ba kpa gbi ngɛ nɔ́ nɛ e de ɔ he. E de ke: “E hi kaa ma hɛ kɛ su Mawu he.”—La 73:28.
Lɛ nitsɛ e maa ye bua mo. Yehowa wo e sɔmɔli si ke: “Ma wo mo ga nɛ ye hɛ ngmɛ maa hi o he.” (La 32:8, NW) Enɛ ɔ tsɔɔ kaa Yehowa susuɔ e sɔmɔli a kpɛti nɔ fɛɛ nɔ he kaa ni kakaaka nɛ e haa a kpɛti nɔ fɛɛ nɔ e hiami níhi. (La 139:1, 2) Ke huɛ bɔmi kpakpa ngɛ o kɛ Yehowa nyɛ kpɛti ɔ, o maa na kaa e pee klaalo kaa e maa ye bua mo be fɛɛ be.
O ma ná si himi kpakpa hwɔɔ se. Yehowa tsɔɔ mo níhi nɛ maa ye bua mo konɛ o ná bua jɔmi kɛ si himi kpakpa amlɔ nɛ ɔ, se pi lɔ ɔ pɛ, e kpale ha mo he blɔ kaa o ma nyɛ ma ná si himi kpakpa hwɔɔ se. (Yesaya 48:17, 18) Baiblo ɔ de ke: “Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee, kɛ nɔ nɛ o tsɔ ɔ, Yesu Kristo.” (Yohane 17:3) Ngɛ behi nɛ waa kɛ nyagbahi ngɛ kpee nɛ ɔ mi ɔ, hɛ kɛ nɔ fɔmi nɛ “e ngɛ gbugbuugbu nɛ e pi si kpɛii” nɛ Mawu kɛ ha a ma nyɛ maa pee kaa osɛkɛ kɛ ha wɔ.—Hebri Bi 6:19.
Mawu ngɛ yi mi tomi kpakpahi fuu kɛ ha wɔ, se e sa nɛ bɔɔ nɛ ɔ nɛ wa susu he ɔ nɛ wo mo he wami konɛ o ya nɔ nɛ o le Mawu saminya nɛ o kɛ lɛ nɛ pee o huɛ. Wa ngɛ mo he wami woe kaa o kɛ Yehowa Odasefo ɔmɛ eko nɛ sɛɛ ní aloo yaa jw.org/ada konɛ o na munyuhi babauu nɛ maa ye bua mo lejɛ ɔ.
Eko ɔ, O Bua Maa Jɔ Enɛ ɔ Hu He
BAIBLO TSƆƆMIHI NƐ A HE HIA
Anɛ Huɛ Bɔmi Ma Nyɛ Maa Hi Waa Kɛ Mawu Wa Kpɛti Lo?
Jeha babauu ji nɛ ɔ nɛ nihi suɔ kaa a maa le a Bɔlɔ ɔ. Baiblo ɔ ma nyɛ maa ye bua mo nɛ o kɛ Mawu nɛ pee huɛ. Huɛ bɔmi nɛ ɔ jeɔ sisi ke o ba le Mawu biɛ.
