WA TI mɛnɔ lɛ e pee we yeyeeye ngɛ si himi mi hyɛ, nɛ́ e susuu we kaa e sa nɛ e hla yemi kɛ buami kɛ je nɔ ko ngɔ? Eko ɔ, nɔ́ nɛ wa peeɔ ji, wa hyɛɛ haomi nɛ waa kɛ kpe ɔ, nɛ wa yaa wa huɛ nɛ e ngɛ mi mi jɔmi nɛ e le bɔnɛ wa ma plɛ kɛ tsu haomi ɔ he ní saminya ha a ngɔ konɛ e ye bua wɔ. Ke wa huɛ ko ngɛ mi mi jɔmi nɛ e le bɔnɛ wa ma plɛ tsu wa haomi ko he ní ha a, wa bua jɔɔ e he wawɛɛ.

Eko ɔ, ngɛ sɔlemi blɔ fa mi hu ɔ, jã ji bɔnɛ ni komɛ susuɔ. Ngɛ be mi nɛ e sa kaa a sɔle kɛ ha Mawu ɔ, a susuɔ kaa Mawu nɔ kuɔ tsɔ nɛ e he ngɛ gbeye, enɛ ɔ he ɔ, a suɔ kaa a ma bi yemi kɛ buami kɛ je he tsɔli ɔmɛ a ti nɔ ko dɛ mohu. A susuɔ kaa akɛnɛ he tsɔli ɔmɛ hu a kɛ kahi kɛ si himihi nɛ a mi wa nɛ adesahi kɛ kpeɔ ɔ kpe hyɛ heje ɔ, a mi mi ma nyɛ maa sã mɛ ngɛ adesahi a he wawɛɛ. Kaa nɔ hyɛmi nɔ́ ɔ, eko ɔ, nihi nɛ a nɔ́ ko nɛ he hia mɛ wawɛɛ laa a, maa sɔle nɛ a bi yemi kɛ buami kɛ je “He Tsɔlɔ” Anthony nɛ je Padua a ngɔ. A susuɔ kaa e nyɛɔ naa níhi nɛ laa kɛ níhi nɛ nihi ju. Ke nɔ ko lohwe be he wami nɛ nɔ ɔ maa sɔle ha lɛ ɔ, e sɔleɔ nɛ e biɔ yemi kɛ buami kɛ jeɔ “He Tsɔlɔ” Francis nɛ je Assisi ɔ dɛ, aloo ke nihi hao nɛ a kɔni mi ngɛ hlae maa wo nyu ɔ, a sɔleɔ kɛ biɔ yemi kɛ buami kɛ jeɔ “He Tsɔlɔ” Jude Thaddeus dɛ.

Se mɛni blɔ nɔ wa maa gu kɛ le kaa Ngmami ɔ kplɛɛ sɔlemi nɛ a sɔleɔ kɛ biɔ yemi kɛ buami kɛ jeɔ he tsɔli a dɛ ɔ nɔ aloo e kplɛɛ we nɔ? Akɛnɛ Mawu ji nɔ nɛ wa sɔleɔ kɛ haa heje ɔ, e sa nɛ wa bi wa he ke: Anɛ e buɔ wa sɔlemi tue lo? Nɛ kɛ Mawu buɔ sɔlemi nɛ nihi sɔleɔ kɛ biɔ yemi kɛ buami kɛ jeɔ he tsɔli a dɛ ɔ ha kɛɛ?

Nihi sɔleɔ kɛ biɔ yemi kɛ buami kɛ jeɔ he tsɔli a dɛ, ejakaa Katoliki Sɔlemi ɔ tsɔɔ kaa he tsɔli daa mi haa nihi. Womi ko nɛ a tsɛɛ ke New Catholic Encyclopedia a tsɔɔ kaa e he hia nɛ “he tsɔlɔ ko nɛ da Mawu hɛ mi, nɛ e kpa Mawu pɛɛ konɛ Mawu nɛ na nɔ ko nɛ e hia yemi kɛ buami ɔ mɔbɔ.” Enɛ ɔ he ɔ, nihi nɛ a sɔleɔ kɛ biɔ yemi kɛ buami kɛ jeɔ he tsɔli a dɛ ɔ he ye kaa he tsɔli ngɛ si dami kpakpa ngɛ Mawu hɛ mi. Lɔɔ he ɔ, a susu kaa a ma nyɛ maa gu he tsɔli a nɔ kɛ ná Mawu hɛ mi dloomi.

Anɛ jã ji bɔnɛ Baiblo ɔ tsɔɔ lo? Ni komɛ deɔ ke bɔfo Paulo tsɔɔ ngɛ womihi nɛ e ngma a a mi kaa e sa nɛ a sɔle nɛ a bi yemi kɛ buami kɛ je he tsɔli a dɛ. Kaa nɔ hyɛmi nɔ́ ɔ, Paulo ngma ya ha Kristofoli nɛ a ngɛ Roma a ke: “Ye nyɛmimɛ, i ngɔ Nyɔmtsɛ Yesu Kristo, kɛ suɔmi nɛ Mumi Klɔuklɔu ɔ haa nɔ ɔ kɛ ngɛ nyɛ pɛɛ kpae nɛ nyɛɛ piɛɛ ye he kɛ sɔle wawɛɛ nɛ Mawu nɛ ye bua mi.” (Romabi 15:30) Anɛ Paulo ngɛ e nyɛmimɛ Kristofoli dee kaa a da mi ha lɛ ngɛ Mawu hɛ mi lo? Dɛbi. Ke e ma bi kaa nɔ ko nɛ e pee jã po ɔ, jinɛ Paulo, nɛ ji Kristo bɔfo ɔ mohu nɛ a ko bi kaa e da mi ha mɛ. Paulo ngɛ tsɔɔe kaa  tɔmi ko be he kaa wa ma de wa nyɛmimɛ Kristofoli kaa a sɔle ha wɔ. Enɛ ɔ ngɛ ekpa kulaa ngɛ sɔlemi nɛ nihi sɔleɔ kɛ biɔ yemi kɛ buami kɛ jeɔ nɔ ko nɛ a susu kaa e ngɛ hiɔwe nɛ e kɛ a ní bimi maa fɔ Mawu hɛ mi ɔ he. Mɛni heje?

Yesu de ngɛ bɔfo Yohane Sane Kpakpa a mi ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko yɛ Tsɛ ɔ ngɔ kaa ja e gu ye nɔ.” (Yohane 14:6) E de hu ke: “Nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, Tsɛ ɔ ma ha nyɛ.” (Yohane 15:16) Yesu de we kaa waa sɔle kɛ bi yemi kɛ buami kɛ je e ngɔ konɛ e kɛ wa hiami ní ɔmɛ nɛ ya fɔ Mawu hɛ mi ha wɔ. Mohu ɔ, loko Mawu maa bu wa sɔlemi tue ɔ, e sa nɛ waa sɔle kɛ ha Mawu kɛ gu Yesu nɔ. E sɛ nɛ waa sɔle kɛ ha nɔ kpa ko.

Benɛ Yesu kaseli ɔmɛ de Yesu kaa e tsɔɔ mɛ bɔnɛ a sɔleɔ ha a, Yesu de mɛ ke: “Ke nyɛ ngɛ sɔlee ɔ, nyɛ de ke, ‘Wa Tsɛ, o biɛ ɔ he nɛ tsɔ.’” (Luka 11:2) Niinɛ, ‘ke wa ngɛ sɔlee,’ aloo be tsuaa be nɛ wa maa sɔle ɔ, e sɛ nɛ waa sɔle nɛ wa bi nɔ́ ko kɛ je Yesu aloo nɔ kpa ko dɛ. E sa nɛ waa sɔle kɛ ha Mawu nitsɛ. Ngɛ nɔ́ nɛ Yesu tsɔɔ wɔ nɛ e mi tɛ̃ nɛ ɔ nya a, anɛ sisi numi be he kaa wa ma de ke e sa nɛ waa sɔle kɛ ha Mawu kɛ gu Yesu Kristo nɔ, se pi kɛ gu “he tsɔlɔ” ko nɔ lo?

Sɔlemi he hia wawɛɛ ngɛ wa Mawu jami mi. Baiblo ɔ tsɔɔ kaa e sa nɛ wa ja Mawu pɛ, e sɛ nɛ wa ja nɔ kpa ko. (Yohane 4:23, 24; Kpojemi 19:9, 10) Enɛ ɔ heje nɛ e sa nɛ waa sɔle kɛ ha Mawu pɛ ɔ nɛ.

Ngɛ Yesu Yoku ɔ Nɔ Fiɛɛmi ɔ mi ɔ, Yesu pee nɔ hyɛmi nɔ́ ko nɛ tsɔɔ jokuɛ ko nɛ e bi e papaa niye ní. Anɛ tsɛ ko ngɛ nɛ ke e bi bi lɛ blodo ɔ, e ma ha e bi ɔ tɛ lo? Aloo tsɛ ko ngɛ nɛ ke e bi bi lɛ lo ɔ, e ma ha e bi ɔ sinɔ duɔtsɛ lo? (Mateo 7:9, 10) Tsɛ nɛ ngɛ suɔmi ko be nɛ e maa pee jã!

Mo susu nɔ́ hetomi nɔ́ ko nɛ kɔɔ fɔli a he, nɛ ngɛ kaa Yesu nɔ́ ɔ he nɛ o hyɛ. Ngɔɔ lɛ kaa o bi ko ngɛ hlae nɛ e ba bi mo nɔ́ ko nɛ he hia lɛ wawɛɛ. Suɔmi ngɛ o kɛ lɛ nyɛ kpɛti, nɛ e nyɛɔ suɔ o he faa. Se akɛnɛ e li bɔnɛ o maa pee o ní ha heje ɔ, e ya tsɔ nɔ ko ke e ba de mo nɔ́ nɛ ngɛ lɛ hiae ɔ. Anɛ o bua maa jɔ he lo? Nɛ ke e kɛ pee e su kaa be tsuaa be nɛ nɔ́ ko hia lɛ ɔ, e ma de nɔ ɔ nɛ e ba de mo hu nɛɛ? Anɛ o bua maa jɔ e ní peepee ɔ he lo? Ngɛ anɔkuale mi ɔ, o bua be he jɔe! Fɔli nɛ a ngɛ suɔmi ɔ suɔ kaa ke a bimɛ hia nɔ́ ko ɔ, a ba a ngɔ tɛ̃ɛ nɛ a ba de mɛ.

Benɛ Yesu ngɛ nɔ́ nɛ nihi ma nyɛ maa kase ngɛ nɔ́ hetomi nɔ́ nɛ kɔɔ jokuɛ ɔ nɛ ya bi e papaa niye ní ɔ he ɔ mi ɔ tsɔɔe ɔ, e de nimli asafo ɔ ke: “Nyɛ nɛ nyɛ peeɔ yayami po, tse nyɛ le bɔ nɛ nyɛ haa nyɛ bimɛ ní kpakpahi! Nyɛ Tsɛ nɛ ngɛ hiɔwe ɔ, anɛ lɛɛ e be nyɛe ma ha nihi nɛ biɔ lɛ ɔ ní kpakpahi nɛ pe enɛ ɔmɛ lo?” (Mateo 7:11) Atsinyɛ jemi ko be he kaa fɔli suɔ wawɛɛ kaa a ma ha a bimɛ ní kpakpahi. Wa hiɔwe Tsɛ ɔ suɔ wawɛɛ nitsɛ kaa e maa bu wa sɔlemi tue nɛ e ma ha heto.

Ke wa fã tɔmihi ha nɛ wa kɔni mi jɔ po ɔ, Mawu suɔ nɛ waa sɔle kɛ ha lɛ tɛ̃ɛ. E ha we nɔ kpa ko he blɔ kaa e bu wa sɔlemi tue. Baiblo ɔ woɔ wɔ he wami ke: ‘Ngɔɔ o haomi ɔmɛ kɛ ha Yehowa, nɛ e maa bu o he.’ (La 55:22) E sa nɛ wa ha nɛ huɛ bɔmi kpakpa nɛ hi waa kɛ Yehowa Mawu wa kpɛti mohu pe nɛ wa ma ha nɛ he tsɔli aloo ni komɛ nɛ a dami ha wɔ.

Wa hiɔwe Tsɛ ɔ susuɔ wa ti nɔ tsuaa nɔ he. E suɔ kaa e maa ye bua wɔ kɛ tsu wa haomi ɔmɛ a he ní, nɛ e deɔ wɔ kaa waa hɛ wɔ kɛ su e he. (Yakobo 4:8) Wa bua jɔ wawɛɛ kaa wa ngɛ he blɔ nɛ waa kɛ ma nyɛ maa sɔle kɛ ha wa Mawu kɛ wa Tsɛ nɛ “buɔ kue fami tue” ɔ!—La 65:2.