Estelle * ngɛ bimɛ fuu nɛ e kɛ mɛ yaa sɔlemi daa. E de ke: “I de ye osɔfo ɔ ke i suɔ nɛ ma le níhi fuu ngɛ Baiblo ɔ mi.” Se osɔfo ɔ tsɔɔ we lɛ nɔ́ ko ngɛ Baiblo ɔ mi gblee. Nyagbe ɔ, e kpa sɔlemi yami. Estelle tsa e munyu ɔ nɔ ke: “Sɔlemi ɔ mi nikɔtɔma amɛ ngma sɛ womi ba ha mi kaa, ke i be nyɛe ma ba sɔlemi ɔ po ɔ, ma nyɛ ma mane sika. Nɔ́ nɛ i susu ji, ‘Sɔlemi ɔ nɛ ma ya a he hia we mɛ; ye sika pɛ nɛ a ngɛ hlae.’”

Angelina nɛ be tsuaa be ɔ, e kɛ sɔlemi yami fiɛ we ɔ de ke: “Ngɛ jami nɛ i ngɛ mi ɔ mi ɔ, be tsuaa be nɛ wa maa ya sɔlemi ɔ, a kɛ tsesi ba beɔ ngɛ wa hɛ mi si etɛ kaa waa wo mi sika, nɛ a hyɛɛ blɔ kaa e sa nɛ waa pee jã. Be tsuaa be ɔ, a ngɛ sika bae. I de ye he ke, ‘Mawu mumi ɔ be a nɔ.’”

Anɛ jamihi nɛ a ngɛ o kpɔ ɔ mi ɔ guɔ blɔ slɔɔtohi a nɔ kɛ kpɔɔ sika ngɛ nihi a dɛ lo? Anɛ lɔɔ kɛ nɔ́ nɛ Baiblo ɔ de ɔ kpa gbi lo?

Yesu nɛ ji nɔ nɛ je Kristofoli a jami ɔ sisi ɔ de ke: “Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.” (Mateo 10:8) A kɛ sika be nyɛe ma he Baiblo ɔ mi sɛ gbi ɔ, enɛ ɔ he ɔ, e sa kaa nɔ tsuaa nɔ nɛ e suɔ kaa e nu Baiblo ɔ mi sɛ gbi ɔ nine nɛ su nɔ.

Mɛni blɔ nɔ Kristofoli nɛ a hi si ngɛ kaseli ɔmɛ a be ɔ mi ɔ guɔ kɛ woɔ hiɔhi nɛ a yeɔ ngɛ asafo ɔ mi ɔ?

A ti nɔ tsuaa nɔ haa ‘bɔnɛ e to kaa e ma ha. E haa kɛ bua jɔmi, se pi kaa a ngɛ e nɔ nyɛe ke e pee; ejakaa Mawu suɔ nɔ nɛ haa nɔ́ kɛ tsui mi jɔmi.’ (2 Korintobi 9:7) Bɔfo Paulo de ke: “Benɛ wa ngɛ Mawu sane kpakpa a fiɛɛe kɛ ngɛ nyɛ hae ɔ, wa ngɛ ní tsue nyɔ kɛ pia, konɛ wa ko pee tlomi ngɔ ha nyɛ ti nɔ ko.” (1 Tesalonikabi 2:9) Paulo tsu ní kaa bo tsu peelɔ konɛ e nyɛ nɛ e hyɛ e he, nɛ e nyɛ nɛ e tsu e sɔmɔmi nítsumi ɔ.​—Bɔfo Ɔmɛ A Nítsumi 18:2, 3.

Yehowa Odasefoli kpeɔ ngɛ tsu kpokploohi a mi. A tsɛɛ tsu nɛ ɔmɛ ke Matsɛ Yemi Asahi. Mɛni blɔ nɔ a guu kɛ náa sika kɛ woɔ hiɔhi nɛ a yeɔ ɔ? A kɛ tsesi bi ngɛ nihi a hɛ mi, nɛ jã kɛ̃ nɛ a gba we envelope ha nihi konɛ a kɛ ba sika. Mohu ɔ, nɔ tsuaa nɔ nɛ e bua jɔ Baiblo mi tsɔsemi nɛ a kɛ haa a he ɔ, ngɔɔ sika kɛ woɔ yemi kɛ buami daka mi ngɛ Matsɛ Yemi Asa a nɔ nɛ nɔ ko nɛ.

E ngɛ heii kaa womi tɛtlɛɛ nɛ ɔ peemi kɛ e manemi biɔ sika fuu. Se kɛ̃ ɔ, a ngmɛ ngɛ womi tɛtlɛɛ nɛ ɔ he ko kaa a ngɛ juae, nɛ jã kɛ̃ nɛ a kɛ bɛ sika hulɔ. Nɔ́ titli heje nɛ a pee womi nɛ ɔ ji, konɛ a kɛ ha nɛ nihi nɛ le Baiblo ɔ mi anɔkuale ɔ.

Kɛ o susu kɛɛ: Anɛ blɔ nɛ ɔ nɔ nɛ Odasefoli guu kɛ woɔ hiɔhi nɛ a yeɔ ɔ, kɛ munyu nɛ Yesu tu, kɛ jehanɛ se hu nɔ́ nɛ Kristofoli nɛ a hi si ngɛ kaseli ɔmɛ a be ɔ mi ɔ pee ɔ kɔ lo?