NÍ KASEMI 5
Noa Daka a
Bɔɔbɔɔbɔɔ ɔ, nimli a he ba hiɛ ngɛ zugba a nɔ. A kpɛti nihi fuu peeɔ ní yayahi. Bɔfohi nɛ a ngɛ hiɔwe ɔ po a kpɛti ni komɛ pee ní yayahi. A je hiɔwe nɛ a ba hi zugba a nɔ. Anɛ o le nɔ́ he je nɛ a pee jã lo? A pee jã konɛ a nyɛ nɛ a tsake a he kɛ pee nimli, nɛ a ngɔ yihi.
Bɔfo ɔmɛ kɛ yi ɔmɛ fɔ binyumuhi. A bimɛ ɔmɛ ba pee nimli nɛ a ngɛ he wami. A he ngɛ gbeye, nɛ a yeɔ nihi awi. Yehowa bua jɔɛ níhi nɛ ngɛ nɔ yae ɔ he. Enɛ ɔ he ɔ, e pee e juɛmi kaa e maa ngɔ nyu kpekpemi kɛ kpata nimli yayami ɔmɛ a hɛ mi.
Se nyumu ko ngɛ nɛ lɛɛ e pee we ní yayahi. E suɔ Yehowa. A tsɛɛ lɛ ke Noa. E ngɛ yo, kɛ bimɛ nyumuhi etɛ. A tsɛɛ e bimɛ ɔmɛ ke, Shɛm, Ham, kɛ Yafɛt. E bimɛ ɔmɛ hu ngɛ yihi. Yehowa de Noa ke e kpɛ daka agbo nɛ ma nyɛ maa da nyu hɛ mi, konɛ ke Nyu Kpekpemi ɔ ba a, e kɛ e weku ɔ a hɛ mi nɛ ko kpata. Yehowa de Noa ke e ngɔ lohwehi fuu kɛ wo daka a mi, konɛ mɛ hu a hɛ mi nɛ ko kpata.
Noa bɔni daka a kpɛmi nɔuu. Noa kɛ e weku ɔ ngɔ maa pee jeha 50 kɛ kpɛ daka a. A kpɛ daka a kaa bɔ nɛ Yehowa ngɛ hlae ɔ pɛpɛɛpɛ. Jamɛ a be ɔ mi ɔ, Noa bɔ ni ɔmɛ kɔkɔ kaa Nyu Kpekpemi ko maa ba. Se a ti nɔ ko bui lɛ tue.
Nyagbe kulaa a, be nɛ e sa kaa a sɛ daka a mi ɔ ba su. Ha nɛ waa hyɛ nɔ́ nɛ ba.
‘Kaa bɔ nɛ níhi ya nɔ ngɛ Noa be ɔ mi ɔ, jã kɛ̃ nɛ níhi maa ya nɔ ke nɔmlɔ Bi ɔ ba.’—Mateo 24:37
Eko ɔ, O Bua Maa Jɔ Enɛ ɔ Hu He
VIDEOHI
Noa
Noa ná Mawu mi hemi kɛ yemi nɛ mi wa ngɛ je nɛ a peeɔ yi wu tso ní ngɛ mi ɔ mi loko nyu kpekpemi ɔ ba, nɛ e kɛ pee nɔ hyɛmi nɔ́ kɛ ha wɔ. Moo hyɛ bɔ nɛ wa ná e ní peepee ɔ he se ha mwɔnɛ ɔ.
