Yesu kpla nu amɛwo mɔ wo le nɔ fafa mɛ koɖo wowo kpenawo. Vɔ hweɖekanuɔ, énu nɔ apotru yitɔwo mɔ: “Mí ŋgbe bu mɔ gotu fafa yí Ŋ hɛn va nyigban ji o. Ŋ de va yí a hɛn gotu fafa vɛ o, vɔ ahwawawi yí Ŋ hɛn vɛ. Ðo, Ŋ va nɔ wana cɛwo a va jɔ: Amɛ ŋtɔ hɛnnuviwo a va nyi yi ketɔwo. Evi a fɔngu do edalɔ ji. Evi nyɔlunvi a fɔngu do enɔ̀lɔ ji. Evishi a fɔngu do asuɔnɔ̀ ji.” (Mt. 10:34, 35) Enyɔ ci yí Yesu jikɔ anuɔ?

Deji Yesu jikɔ mɔ yeado mama xomumɛtɔwo mɛ yɔ o, vɔ énya mɔ ye nukplakplawo atɛnŋ ahɛn mama va xomu ɖewo mɛ. Nɔ mɛɖe jikɔ mɔ yeanyi Yesu nukplavi keŋ awa ʒinʒindoshimɛɔ, éɖo anya mɔ gbeta cɛ ci yejikɔ asɔ tɛnŋ hɛn cukaɖawo vɛ. Nɔ mɛ ci eɖe alo yi xomumɛtɔ ɖe ci yí denyi Yesu nukplavi o cikɔ yumɛ niɔ, atɛnŋ agbɔnnu ni mɔ akpɔtɔ awakɔ do Yesu nukplakplawo ji.

Bibla do ŋsɛn Kristotɔwo mɔ wo le “nɔ̀ vofamɛ koɖo amɛwo pleŋ.” (Rɔm. 12:18) Vɔ Yesu nukplakplawo tɛnŋ le shigbe “ahwawawi” nɛ le xomu ɖewo mɛ. Ecɛ jɔnɔ nɔ xomu lɔ mɛ tɔ ɖe lɔn mɔ yeawa do Yesu nukplakplawo ji, vɔ yí mɛ kpɛtɛwo gbe. Nɔ ejɔ ahan ɔ, xomu lɔ mɛ tɔwo vanyinɔ “ketɔwo” nɔ mɛ ci yí kplakɔ nyɔnɔnwi lɔ.—Mt. 10:36.

Kristo dokplɔtɔ ciwo xomumɛtɔwo le sɛnsɛn bu mɛ tɛnŋ do go cukaɖa ciwo yí ado lɔnlɔn ci woɖo nɔ Yehowa koɖo Yesu kpɔ. Le kpɔwɛ mɛ, wowo mɛɖe tɛnŋ tɛ do wo ji nɔ woaɖu ŋsusɛnsɛnwo xwe ɖe. Nɔ evajɔ ahan ɖe, mi yí woamɔ yewoado jijɔ nɔɔ? Yesu nu mɔ: “Amɛ ɖekpokpwi ci yí lɔn edalɔ alo enɔ̀lɔ sɔwu Enyɛ ɔ, amɛ lɔ nu de jeji nɔ Ŋ o.” (Mt. 10:37) Yesu denukɔ mɔ gbɔxwe mɛɖe nu aje ji nɔ yeɔ, yɛaɖe lɔnlɔn ci eɖo nɔ yi jilawo kpɔtɔ yɔ o. Vɔ ékplakɔ yi dokplɔtɔwo mɔ woɖo anya enu ci yí nyi enuvevitɔ nɔ wo le agbe mɛ. Nɔ mìwo xomumɛtɔ ciwo yí dele nyɔnɔnwi lɔ mɛ cikɔ yumɛ nɔ mì mɔ mìwo le mi Yehowa sɛnsɛn ɔ, mìakpɔtɔ alɔn wo vɔ mìɖo anya mɔ lɔnlɔn ci mìɖo nɔ Yehowa yí le veviɖe wu.

Nɔ mìwo xomumɛtɔwo cikɔ yumɛ nɔ mìɔ, etɛnŋ na mìale ŋshishi mɛ. Vɔ Yesu nukplaviwo kpɔtɔ ɖonɔ ŋwi yi nyɔ cɛwo: “Amɛ ɖekpokpwi ci yí de sɔ [efuntrenamɛci] yitɔ yí kplɔ Ŋ do ɔ, amɛ lɔ nu de jeji nɔ Ŋ o.” (Mt. 10:38) Eyi taɖo Kristotɔwo ɖo akpɔnɔ wowo xomumɛtɔwo yumɛcici mɔ yinyi akpaxwe ɖe nɔ efunkpekpe ciwo mɛ Kristotɔwo ɖo alɔn ado ji le. Vɔ wokpɔnɔ emɔ mɔ yewo wana nywiwo akpedo yewo xomumɛtɔwo nu woatrɔ susu yí aji mɔ yewoakpla Bibla mɛ nyɔnɔnwi lɔ.—1 Piɛ 3:1, 2.