ENUKPLAKPLA 14

Lé mìasɛn Mawu do yí ajɔ ji niɔ?

Xui

Shigbe lé mìkpɔɛ le enukplakpla ci yí vayi mɛ nɛɔ, de sɛnsɛnwo pleŋ nu yí jɔnɔ ji nɔ Mawu o. Ele ahan gan, mìatɛnŋ asɛn mìwo Watɔ lɔ yí ajɔ ji ni. “Mawu sɛnsɛn [alo sɛnsɛnha]” ci yí jɔnɔ ji nɔ Mawuɔ? (Ʒaki 1:27) Mìakpɔ nyɔ ci Bibla nu.

1. Lé mìawɛ anya lé mìasɛn Mawu do nɔ ajɔ ji niɔ?

Mìwo sɛnsɛn ɖo asɔgbe koɖo Bibla mɛ nyɔwo. Yesu nu nɔ Mawu mɔ: “Ao nyɔ yí nyi nyɔnɔnwi.” (Ʒan 17:17, NWT) Sɛnsɛnha ɖewo dejeshi nyɔnɔnwi ciwo yí le Bibla, Mawu Nyɔ ci yí so gbɔngbɔnmɛ mɛ kpetii o. Wosɔ agbetɔwo nukplamuwo koɖo kɔnuwo ɖɔ li Mawu Nyɔ. Vɔ mɛ ciwo yí “tashi Mawu sewo” nu dekpenɔ nɔ Yehowa o. (Hlɛn Maki 7:9.) Ci mɛ ŋtɔ́wo nu dekpenɔ ni can ɔ, mìwo nu ajɔnɔ ji ni nɔ mìwawa do ekpla ciwo Bibla nanɔ ji.

2. Lé mìɖo asɛn Yehowa doɔ?

Ci Yehowa nyi mìwo Watɔɔ, yiɖekɛ kpaŋ mìɖo asɛn. (Enyɔdasɛ 4:11) Enyɔ cɛ gɔnmɛ yí nyi mɔ, mìɖo aluin yí asɛn yiɖekɛ kpaŋ. Mìdeɖo azan enutata, enumɛmɛ, acikpakpɛ alo enu ŋtɔ́ hanwo ɖe le yi sɛnsɛn mɛ o.—Hlɛn Ezai 42:8.

Mìwo sɛnsɛn ɖo anɔ “kɔkwɛ yí a nya kpɔkpɔ” gbɔxwe Yehowa axɔɛ. (Rɔmatɔwo 12:1) Yi gɔnmɛ yí nyi mɔ, mìɖo anɔ agbe asɔ koɖo agbenywinɔnɔ se yi tɔwo. Le kpɔwɛ, mɛ ciwo yí lɔn Yehowa ɖo alɔn gɔnmɛɖose ciwo yí kudo alɔlele nu yí awanɔ do wo ji. Yí wodewanɔ enu ciwo yí adahɛn nu le wo nu shigbe tabayɔyɔ, geeyɔyɔ alo ahanumu nɛ o. a

3. Nyi yí taɖo mìɖo asɛn Yehowa doju koɖo mìwo kpena xɔsetɔwoɔ?

Le bɔbɔ ciwo mìwanɔ kwɛshila ɖeka duu mɛɔ, emɔ hunnɔ nɔ mì yí ‘mìkannɔfu Yehowa . . . nɔ mìdo go le hamɛ lɔ mɛ.’ (Ehajiji Wema 111:1, 2) Emɔ ɖeka ci ji mìto yí wɛni yí nyi mɔ, mìjinɔ kanfukanfuhawo nɔ Mawu. (Hlɛn Ehajiji Wema 104:33.) Yehowa nu nɔ mì mɔ mìwo le yinɔ bɔbɔwo, ɖo élɔn mì yí gbenya mɔ bɔbɔ lɔwo akpedo mì nu mìase vivi nɔ agbe lɔ sɔyi mavɔ. Nɔ mìyi bɔbɔ mɔ mìado ŋsɛn mɛbuwoɔ, wowo can donɔ ŋsɛn mì.

JI DWI NI KPƆ DOJI

Ji dwi nɔ ŋci yí taɖo enutatawo zanzan le sɛnsɛn mɛ dejɔnɔ ji nɔ Yehowa o. Gbekpɔ emɔ vevi ciwo ji mìato keŋ akanfu Mawu.

4. Mìdeɖo azan enutatawo le mìwo sɛnsɛn mɛ o

Lé mìwɛ yí nya mɔ, enutatawo zanzan le sɛnsɛn mɛ dajɔnɔ ji nɔ Mawuɔ? Xo VIDEO lɔ, keŋ agbeje biɔse ci yí gbɔgbɔ mɛ.

VIDEO: Mawu lɔn mɔ wo le zan enutatawo le yi sɛnsɛn mɛa? (3:26)

Ci Mawu sɛntɔ ɖewo ciwo yí ni le blema ti kpɔ mɔ yewoazan enutata asɔ sin ɖe, nyi yí jɔɔ?

Mɛɖewo zannɔ enutatawo le wowo sɛnsɛn mɛ yí bunɔ mɔ eyi adɔ yewoagogo Mawu doji. Vɔ nɔ wowɛwɛ ahan ɖe, Mawu dashi nɔ wo ba? Hlɛn Hunhun Wema 20:4-6 koɖo Ehajiji Wema 106:35, 36, keŋ agbeje biɔse ciwo yí gbɔgbɔ mɛ:

Enutata alo nyi hanwo èkpɔ amɛwo zannɔ le wowo sɛnsɛn mɛɔ?
Lé enutatawo zanzan le sɛnsɛn mɛ wanɔ nɔ Yehowaɔ?
Lé enutatawo zanzan wanɔ nɔ eɔ yɛɔ?

5. Yehowa ɖekɛ kpaŋ sɛnsɛn adɔ mɛɖe dagbeble mì o

Kpɔ lé Yehowa sɛnsɛn shigbe lé eji do nɛ adɔ yí mɛɖe dagbeble mì ɖa. Xo VIDEO lɔ.

VIDEO: Nyɔnɔnwi lɔ na vovoŋ (5:16)

Hlɛn Ehajiji Wema 91:14, keŋ agbeje biɔse ci yí gbɔgbɔ mɛ:

Nyi Yehowa ɖo gbe mɔ yeawa nɔ mì nɔ mìsɛn yiɖekɛ kpaŋ keŋ yí sɔ dasɛ mɔ mìluin ɔ?

6. Mìsɛnnɔ Mawu le hamɛ lɔ bɔbɔwo mɛ

Mìkannɔfu Yehowa yí gbedonɔ ŋsɛn mìwonɔnɔwo nɔ mìjinɔ ha yí nanɔ ɖoŋciwo le hamɛ lɔ bɔbɔwo. Hlɛn Ehajiji Wema 22:22, keŋ agbeje biɔse ciwo yí gbɔgbɔ mɛ:

Ðoŋciwo sese le bɔbɔwo mɛ jɔnɔ ji nɔ eoa?
Èji mɔ yeadra ɖoŋci ɖe do yí ana le bɔbɔa?

7. Eji jɔnɔ Yehowa nɔ mìxoxoɔ nuxu so ŋciwo mìkpla nu nɔ mɛbuwo

Alɔkpa sugbɔ li ci ji mìatɛnŋ ato anu Bibla mɛ nyɔnɔnwi lɔ nɔ mɛbuwo. Hlɛn Ehajiji Wema 9:1 koɖo 34:1, keŋ agbeje biɔse ci yí gbɔgbɔ mɛ: