Эйе. Кудай улусты ого бажырарга кожо јуулышсын деп кӱӱнзейт. «Сӱӱрге ле јакшы керектер эдерге кӧкӱдижип, бой-бойыбыска ајарыҥкай бололы. Јуундарыстаҥ туура артпайлыктар» (Еврейлерге 10:24, 25).

 Иисус Христостыҥ сӧстӧриле болзо, оныҥ ӱренчиктери бир кудай јаҥга кирер керек. Ол айткан: «Ортогордо сӱӱш болзо, слерди Мениҥ ӱренчиктерим деп, ончозы танып ийер» (Иоанн 13:35). Мындый сӱӱш недеҥ кӧрӱнет? Христостыҥ ӱренчиктери кожо јуулыжып, бой-бойыла куучындажып турза кӧрӱнет. Анайда ок олор Кудайга јаҥыскан бойы бажырар эмес, је улусла кожо јуундарга јуулыжып, јаантайын јуунныҥ туштажуларын ӧткӱрер учурлу (1 Коринфтегилерге 16:19). А бу јуундарды бириктирип ийзе, олор телекейлик карындаштык болот (1 Пётр 2:17).

Кудайга јараарга, јӱк ле кандый бир кудай јаҥга кирип алганы једер бе?

 Агару Бичикле болзо, улус Кудайга бажырарга кожо јуулыжар учурлу. Је Кудайга јараарга база ӧскӧ неме эдер керек. Айдарда, кижиниҥ Кудайга бӱдӱп турганы бастыра јӱрӱминеҥ кӧрӱнип турар учурлу. Оныҥ да учун Агару Бичикте айдылат: «Ада Кудай алдында ару ла јек јок кудайзак болоры ол: ӧскӱс-јабыстарга ла тул ӱй улуска ачу-коронында килемји эдери, бу телекейдеги јаманнаҥ бойыгарды чеберлеери» (Иаков 1:27).