Иегованыҥ Керечилериниҥ бӱгӱнги кӱндеги организациязы XIX чактыҥ учында башталган. Ол ӧйдӧ, Питтсбургтыҥ кырында јадып (Пенсильвания штат, США), Агару Бичик шиҥдеп турган бир кичинек бӧлӱк Агару Бичикти јаантайын шиҥдегилеп баштаган. Ол шиҥдеечилер церковьтыҥ ӱредӱлерин дезе, Агару Бичик чынынча неге ӱредип турганыла тӱҥдештиргендер. Олор бойлорыныҥ шиҥдеп тапкан једимдерин газеттерде ле бичиктерде, анайда ок бӱгӱнги кӱнде «Каруулчы шибее Иегованыҥ Каандыгын јарлайт» деп адалып турган журналда чыгарып туратандар.

 Бу, ак санаалу Агару Бичиктиҥ шиҥдеечилериниҥ ортозында Чарлз Тейз Расселл деп атту кижи болгон. Ол ӧйдӧ Расселл «Каруулчы шибеениҥ» баштапкы редакторы болуп, библиялык ӱредӱлӱ керекле башкаратан јаҥды колына алган да болзо, ол јаҥы религияныҥ тӧзӧӧчизи болбогон. Расселлдиҥ амадузы ла ол тушта Агару Бичиктиҥ Шиҥдеечилери деп адалып турган бӧлӱктиҥ амадузы Иисус Христостыҥ ӱредӱлерин таркадары болгон. Анайда ок баштапкы чактагы христиан јуундардыҥ темин бастыразын бӱдӱрери болгон. Нениҥ учун дезе, христианствоны Иисус тӧзӧгӧн, мынаҥ улам бистиҥ организацияныҥ тӧзӧӧчизи Иисус деп бодойдыс (Колоссыдагыларга 1:18—20).