INU NKWEEN̄ 32

Ama Ubọọn̄ Awaji Okikpulu Me Mgbọ Keyi!

FIT

Ama Ubọọn̄ Awaji ibene ikikpulu me emen inyọn̄ me acha 1914. Ire mgbọ ya si ke ota mgbọ mkpulu ebilene obene. Ike owa ke eji esa iriọọn̄ eyi? Kpọ-nu ubọk nriran Baibul, eru ebi ene mè inu okibọkọ irek karake 1914 osa ikijeen̄ eyi.

1. Keke ke nriran Baibul okijeen̄?

Ikpa Danien ijeen̄ ibe ke Ama Ubọọn̄ Awaji ibobene ikikpulu me ota “ibot mgbọ jaaba.” (Danien 4:16, 17, kpọ agan̄ ijọn̄) Mgbọ efit efit acha orakabe, Jisọs igwen mgbọ ya si “mgbọ Awaji osun̄be ibe ebi ekarege ebi Ju ekpulu ebi Ju,” mè ijeen̄ si ibe ke mgbọ ya ikatata. (Luk 21:24) Ike eji ebemun̄, ibot mgbọ jaaba yi ita me acha 1914.

2. Kpasi eru ke ebi ene ekijeen̄, mè keke si okibọkọ irek karake 1914?

Ebi udun̄ kè Jisọs edo ọmọ ibe: “Kpasi inu ijejeen̄ ke ebesa iriọọn̄ mgbọ owu oboyaka inu mè mgbọ linyọn̄ keyi oboraka?” (Matiyu 24:3) Jisọs ifọọk ema otu sa me itutumu owuwa mkpọ echi obokibọkọ irek ọmọ isibene ikikpulu me emen inyọn̄ kubọk Ogwu Ubọọn̄ Ama Ubọọn̄ Awaji. Usini me lek mkpọ chi ire akọn̄, akan̄, mè sikisik-ijọn̄. (Fuk Matiyu 24:7) Baibul ikpa si ibe ke eru ebi ene ebekijeen̄ me “mgburudun̄ mgbọ” morọ ibe “ufialek òmimin enenen” ikup. (Timọti Eyi Òso Iba 3:1-5) Inu chi okibọkọ irek, ebi ene mekijeen̄ eru chi si, ogak ge karake 1914.

3. Keke orọ inu okpọkpọk ikisak karake Ama Ubọọn̄ Awaji obenebe ikikpulu ni?

Jisọs itim akọn̄ me lek Setan mè ebi ijo ekwukwu me emen inyọn̄ mè ikafiin̄ge eyi ikanabe Ogwu Ubọọn̄ Ama Ubọọn̄ Awaji. Jisọs itim igak Setan me akọn̄ ya. Baibul ibe: “Sa me ikeya ke elap . . . [Setan] melek ebi osat kan̄ isibi me emen inyọn̄ igwook me linyọn̄.” (Ichichili 12:9, 12) Setan ikinanaan̄ ejit mije iriọọn̄be ibe ke ebefafiat ọmọ. Eya orọ, ikitap unaan̄ mè ukwook me otutuuk linyọn̄ yi. Ọmọ orọ inu okpọkpọk ikisak me linyọn̄ yi! Ama Ubọọn̄ Awaji mosan̄a otutuuk ufialek chi.

KWEEN̄ GBAALEK

Kween̄ ubọk eji esabe iriọọn̄ ibe ke Ama ubọọn̄ Awaji ibene ikikpulu me acha 1914 mè inu eyi obosibi inyi eji.

4. Mfufuk Baibul itọ ubọk ifo lek 1914

Fit FIDIO yi.

FIDIO: Ama Ubọọn̄ Awaji Ibene Ikikpulu me 1914 (5:02)

Awaji irọ ibe Nebukadineja Ogwu Ubọọn̄ Babilọn ukot ikaan̄ imun̄ ilaak ge. Ilaak ya mè ibot kan̄ ike Danien okpabe, ijeen̄ ibe ke nrọ-nso kan̄ ikaan̄ mgbaan̄ me lek mkpulu Nebukadineja mè Ama Ubọọn̄ Awaji.—Fuk Danien 4:17. a

Fuk Danien 4:20-26, mè sa chart yi sa fọọk idodo chi ogọgọọk:

(A) Keke ke Nebukadineja omun̄ me emen ilaak kan̄?—Kpọ agba eyi 20 mè 21.
(B) Keke oborọ uti ya?—Kpọ agba eyi 23.
(C) Keke obobọkọ irek me ota “ibot mgbọ jaaba” ya?—Kpọ agba eyi 26.

Ubọk Ilaak Yi Osabe Ikaan̄ Mgbaan̄ Me Lek Ama Ubọọn̄ Awaji

NRIRAN (Danien 4:20-36)

Mkpulu

(A) Uti ile ge

Ema kpeyaka ikpulu

(B) “Cho uti ya to,” mè tele ibe “ibot mgbọ jaaba” iraka”

Ema miyaka ibene ikikpulu

(C) “Mêyaka ama ubọọn̄ kwun̄ inyi owu”

Me adasi nrọ-nso nriran yi . . .

(D) Ire ekene ke uti ya okeke ichit chieen̄?—Kpọ agba eyi 22.
(E) Kpa mgbọ ke mkpulu onan̄a ọmọ me ubọk?—Fuk Danien 4:29-33.
(F) Keke orọ Nebukadineja me ota “ibot mgbọ jaaba” ya?—Fuk Danien 4:34-36.

ADASI NRỌ-NSO

Mkpulu

(D) Nebukadineja, Ogwu Ubọọn̄ Babilọn

Ema kpeyaka ikpulu

(E) Eyi 606 B.C.E. orakabe, Nebukadineja okakana iraak, ikayaka ikọt ikpulu me acha jaaba

Ema miyaka ibene ikikpulu

(F) Nebukadineja iyaka inọ lek kan̄ mè iyaka ibene ikikpulu

Me nrọ-nso nriran yi eyi oso iba . . .

(G) Ire ebi owa ke uti ya okeke ichit chieen̄?—Fuk Mfufuk Eyi Òso Iba 29:23.
(H) Kpa mgbọ ke mkpulu onan̄a ema me ubọk? Ike owa ke eji esa iriọọn̄ ibe ke ema kpeyaka ibene ikikpulu me mgbọ Jisọs okupbe me inyọn̄ ijọn̄?—Fuk Luk 21:24.
(I) Kpa mgbọ mè ere owa ke ema eyaka ibene ikikpulu?

NRỌ-NSO EYI OSO IBA

Mkpulu

(G) Ebi ubọọn̄ Ijeren ikekeke ichit chieen̄ mkpulu Awaji

Ema kpeyaka ikpulu

(H) Mifiat Jeruselem, mkpulu onanan̄a me ubọk ebi Ijeren me mkpọ ososo obop acha iba mè efit acha go mè akọp acha iba

Ema miyaka ibene ikikpulu

(I) Jisọs ibene ikikpulu me emen inyọn̄ kubọk Ogwu Ubọọn̄ Ama Ubọọn̄ Awaji

Ujọn̄ọ mgbọ okukup ke ibot mgbọ jaaba ya ore?

Usini ere me Baibul ikitap ubọk irọ mè eji egobo etet usini ere. Kubọk inu njeen̄, ikpa Ichichili ibe ke mgbọ ita mè okpọkọ ire usen 1,260. (Ichichili 12:6, 14) Eya orọ, mgbọ jaaba yi ibore otu ifuk mgbọ ya mgbọ iba orere, usen 2,520. Usini mgbọ me Baibul, usen ge ikikeke ichit chieen̄ acha ge. (Ijikien 4:6) Ikeya ke ikup me lek mgbọ jaaba ya ekpabe me ikpa Danien—isibi obop acha iba mè efit acha go mè akọp acha iba.

5. Inyọn̄ yi inwene karake 1914

Fit FIDIO yi.

FIDIO: Inyọn̄ Yi Inwene Karake 1914 (1:10)

Jisọs itumu inu obokibọkọ irek me inyọn̄ ijọn̄ ọmọ isikana Ubọọn̄. Fuk Luk 21:9-11, mè igbaan̄ ikpa idodo yi:

Eyi owa me lek inu chi ke okimun̄ mè iyaka ire ikinọ?

Ogwu ikwaan̄ Pọọlu ikpa mbet lek eru ebi ene ebekijeen̄ me ota mgbọ mkpulu ebilene. Fuk Timọti Eyi Òso Iba 3:1-5, mè igbaan̄ ikpa idodo yi:

Eru owa me lek eru chi ke okimun̄ ebi ene ekijeen̄ me chereyi?

6. Kè mkpulu Ama Ubọọn̄ Awaji ibieen̄ eji

Fuk Matiyu 24:3, 14, mè igbaan̄ ikpa idodo chi:

Kpasi ikwaan̄ okukup ufiak okijeen̄ ibe ke Ama Ubọọn̄ Awaji okikpulu mgbọ keyi?
Ike owa ke obokọt isa igọọk ikaan̄ uche me lek ikwaan̄ yi?

Ama Ubọọn̄ Awaji okikpulu me mgbọ keyi, sọnja mgbọ, mobene ikikpulu inyọn̄ ijọn̄ yi. Fuk Ebi Iburu 10:24, 25, mè igbaan̄ ikpa idodo yi:

Keke ke eji ge ge eberọ “mije eji eriọọn̄be ibe usen okaan̄-ene obonu okigbet enenen”?

Ire oriọọn̄ mkpọ obokọt itap ubọk inyi mè inyan̄a ebi ofifi ife, keke ke oborọ?

IRE ENE IDO IBE: “Keke orọ Ebi Ata-Ikọ Jioba ekimalek itumu mkpọ ofolek 1914?”

Obofọfọọk?

ME MGBIDIM

Nriran Baibul, mfufuk, mè inu okibọkọ irek me inyọn̄ yi ikijeen̄ ibe ke Ama Ubọọn̄ Awaji okikpulu me mgbọ keyi. Eji ekijeen̄ ibe ke eji michieek eyi sa me ikekilook ata etip mè ikekisi nkween̄mkpọ ntitiin̄.

Idodo

Keke obọkọ irek me ota ibot mgbọ jaaba etumube mkpọ ofolek me ikpa Danien?
Keke orọ ibe ochieek ojaan̄ ibe ke Ama Ubọọn̄ Awaji ibene ikikpulu me acha 1914?
Ike owa ke obosa ijeen̄ ibe ke ochieek ibe ke Ama Ubọọn̄ Awaji okikpulu mgbọ keyi?

Usen nkween̄be inu nkween̄ yi isan̄a:

Inu Obokọt Irọ

Min soon̄ irere ge me lek ebi ikilook ata etip.

Ofifi si:

Your other goal