1, 2. 1) Quiñeque ngüneneel mapu mu, ¿chumquingün tañi caiñeltubel Jehová ñi pu che? Ca taiñ pu peñi ca pu lamngen, ¿chumingün? 2) Caiñeltungelu ume, ¿chemu ayüucüleaiñ? (Eipinge quiñeque dungu pu adentun mülelu unen pagina Ti Huerquen mu).

 FAMÜLQUE mu, Jehová tañi cüdau catrütungequei doi 30 troquiñque mapu. Feichi pais mu, pu autoridad carceltucuquefingün taiñ pu peñi pu lamngen. Huelu Jehová tañi adquiñ mu chem huesa dungu rume femlaingün, papeltuqueingün Biblia müten, amuldunguqueingün, amuqueingün trahun mu ca coneltuquelaingün politica dungu mu. Caiñetungefulu rume, püntütripalaingün Jehová mu b ca poyeniefingün müten, fei ayühuelqueyu engün.

² Eimi, ¿pequepelafimi foto tüfachi peñi ca lamngen? ¿Inaduamquefimi? Ayelequeingün, ¿chemu ayüucüleingün? Püntütripanolu am engün Jehová mu, feimu Jehová ayüucülei quisu engün mu (1 Crón. 29:17a). Jesús feipi: ‘Ayühun niei pu caiñetungelu ñi femquen ti nor dungu. Rumeñma ayüucülemün, Chau Ngünechen eluaimünmeu fütra cümelcan’ (Mat. 5:10-12).

3. Hechos 4:19, 20, caiñeltungelu pu apostol ¿chumingün ca chemu?

³ Jesús tañi pu apostol ca femngechi inacangequefuingün tañi amuldungun mu, mufüque rupa pu juez Sanedrin  mu feipifingün ñi dunguhuenoal Jesús ñi üi meu (Hech. 4:18; 5:27, 28, 40). ¿Chumingün pu apostol? (papeltunge Hechos 4:19, 20). Quimnieingün Jesús, tati doi autoridad nielu, feipieyu ñi amuldunguleal engün (Hech. 10:42). Pedro ca Juan nehuencünuhuingün ñi feipiafiel pu juez ñi feyentunoafiel quisu engün, doi mai ñi feyentuafiel ta Chau Dios. Feipingün ñi fentecünunoal ñi amuldungual Jesús mu. Pu apostol raquiduamelpelafingün pu juez ¿chem pimequeimün am? ¿Doi autoridad nielu troquihuimün am Chau Dios mu?

4. Hechos 5:27-29, ¿chumingün pu apostol tañi quellubel (incabel) pu rüb cristiano ca chumngechi inayentuaiñ?

⁴ Iñchiñ pu rüfngechi cristiano inayentuniefiyiñ ñi femün pu apostol. Doi feyentuquefiyiñ ta Chau Dios pu huentru meu (papeltunge Hechos 5:27-29). Rupan huimacangelu engün ayüucülen tripai engün Sanedrin mu ¿chumngelu? “Ayüucületuingün elungelu cai ñi cutrancahual engün Jesús ñi üi meu”, fei amulefuingün ñi amuldungual engün (Hech. 5:40-42).

5. ¿Chem pu ramtun lloudunguaiñ?

⁵ Tañi femün tati pu apostol raquiduamelqueiñmu. Feimu ramtuhuafuiñ, ¿chumngechi am feyentuafuingün ta Chau Dios ca tañi feyentuafiel pu autoridad chumngechi ñi feipin Biblia? (Rom. 13:1). Iñchiñ cai, ¿chumngechi am feyentuafuiñ tati pu gobierno ca tati pu autoridad ca taiñ feyentunieafiel ta Chau Dios? (Tito 3:1).

6. 1) Romanos 13:1 ñi eipin, ¿iñi engün am pu ülmen tañi ngünenetu, ca chumabüiñ? 2) ¿Iñi am elbalbi tañi ülmencüleal engün?

⁶ (Papeltunge Romanos 13:1). Ñi feipin tüfachi texto, ¿inei am tati pu “autoridad taiñ ngünenieteu”? Fei ta com pu gobierno ngüneniefilu tati pu che. Iñchiñ taiñ cristianongen mülei  taiñ feyentuafiel feitachi pu autoridad, quisu engün cüme adniequefingün com ti dungu tañi pais mu ca hulqueingün ley dungu ñi cüme inangeal (Apoc. 12:16). Feimu mülei taiñ culliafiel engün, yamafiel ca saquiafiel. Huelu quisu engün nielaingün autoridad quisu tañi piel mu, huelu mai Jehová elueyu autoridad (Rom. 13:7). Jesús cüme quimfalcünui tüfa. Ramtucadungueteu quiñe gobernante Poncio Pilato pingelu, Jesús feipifi: “Chau Dios elunoelmu autoridad iñche meu, nielayafuimi tati” (Juan 19:11). Famülque mu, Poncio Pilato reque pu gobernante nieingün autoridad, huelu Chau Dios tañi elueteu mu müten.

7. ¿Chem dungu mu mupitulaaiñ pu ülmencülelu mapu mu, ca chem quimaingün?

⁷ Iñchiñ com feyentuquefiyiñ taiñ feipieteu pu autoridad, huelu chaftufile Chau Dios ñi huercün dungu, feyentulayaiñ. Por ejemplo, ti gobierno mandayafui com pu hueche ñi conal ejercito mu, fei ñi hueichayal. c Ca feipingeafuiñ taiñ nienoal Biblia, taiñ publicacion, taiñ trahuluuhuenoal ca taiñ amuldunguhuenoal. Pu gobernante allmalltule tañi nien mu autoridad ñi inacayafiel Jehová tañi pu che, fei Jehová ramtucadunguayu engün, quisu am com penielu (Ecl. 5:8).

8. ¿Chemu trürlai doicüleal ca alupüraleal? ¿Chemu balin-ngi tüba?

⁸ Pu autoridad cümeque dungu femafuingün, ca nieingün ta poder. Huelu fei engün huelulcauqueingün ca doicülelaingün Chau Dios mu. Chau Dios müten huelulcauquelafui ca doicülei com gobierno meu. Biblia mu, fentren rupa Jehová feipingei “ti Doi Alüpüralelu” (Dan. 7:18, 22, 25, 27).

9. Quiñeque peubaluhun mu, ¿chem pei Daniel?

⁹ Ti profeta Daniel quiñe vision mu pengelelngei Chau Jehová ñi doi alüpüralen caquelu gobierno meu. Hunelu mu, Daniel pei meli fütraque huapoque culliñ adentulelu fütraque gobierno, tüfa ta Babilonia, Medo-persia, Grecia, Roma ca Estados Unidos engu Gran Bretaña (Dan. 7:1-3, 17). Daniel ca pefi ta Chau Jehová ñi anülen quiñe ülmen huancu mu huenu mu (Dan. 7:9, 10). Ñi peel Daniel, rume falin-ngei ñi quimal pu gobernante famülque mu, ¿chumngelu? Peafiyiñ.

10. Daniel 7:13, 14, 27 tañi eipin mu, ¿Jehová iñi elubi tañi ngüneneal mapu mu, ca chem quimeltueiñmu quidu mu?

¹⁰ (Papeltunge Daniel 7:13, 14, 27). Daniel pei Chau Dios ñi müntuñmafiel tañi autoridad tati pu gobierno, ¿inei engün am elutufi? Elutufi ti autoridad ta quiñe huentru ñi fotüm reque, fei ta Jesús, ca tati “troquiñche lif mongen-ngelu ti Doi Alüpüralelu ñi adquiñ meu”, tüfa engün pu 144.000 che ngüneniealu rumel mu (Dan. 7:18). Tüfachi dungu ñi femün Jehová pengeli quisu müten tati “Doi Alüpüralelu”.

11. Jehová doi alüpüralelu com mapu mu, ¿chem huirintucui Daniel tañi pengelabel tüba?

¹¹ Petu ñi pengelelngenon tüfachi vision ta Daniel, feipi Chau Ngünechen “pu rey müntuñmafi tañi reycülehuenoal ca elcünuquefi pu rey”. Ca feipi:  “Ti Doi Alüpüralelu, Lonco Ülmencülei pu che ñi ngünenien mu, ca quisu elufi pu che tañi dulliel” (Dan. 2:19-21; 4:17). Ñi feipin Daniel, nüucülei tañi peel vision mu. ¿Quiñeque mu Jehová elcünuquefi rey cam famentuquefi? Femi llemai.

12. Eipinge chumngechi Jehová bamentubi quiñeque ülmencülelu cuibi mu (Pebinge tati adentun).

¹² Jehová, ¿chumngechi pengelquei ñi doicülen pu “autoridad” mu? Peafiyiñ cüla ejemplo. Quiñe, ti Faraón esclavo reque niequefui Jehová ñi pu che, ca piquelafui tañi lifrenentuafiel engün. Rupachi antü mu, Jehová lifrecünui tañi pu che ca ürfilfi Faraón fütra lafquen mu (Éx. 14:26-28; Sal. 136:15). Epu, Babilonia mu ti rey Belsasar pepicai quiñe fütra ilelcahun, feimu chaftufi huenu mülechi ñidol ca “püramyefi pu dios deumangelu plata ca oro meu” (Dan. 5:22, 23). Huelu Chau Dios illamcafi feitachi mallma huesa huentru. Feichi pun müten, Belsasar langümngei ca tañi gobierno elungetui pu medo ca persa (Dan. 5:28, 30, 31). Cüla, ti rey Herodes langümfalfi ta Santiago ca presuntucufi ta Pedro, ayüfui tañi langümafiel. Huelu Jehová catrütueyu tañi femnoal, “Jehová ñi cüme püllü cutraneleyu”, fei lai (Hech 12:1-5, 21-23).

13. Eipinge chumngechi Jehová hueubi pu ülmencülelu quiñeucülelu engün ume.

¹³ Chumte quiñeucülefule rume pu gobernante, Jehová doi nehuen-ngei fei engün mu. Cuifi mu, 31 reyes Canaán mu tuulu quiñehuingün ñi caiñetuafiel pu Israel che, huelu Jehová apümcaeyu engün, ca quellufi pu Israel che ñi doi nieal ta mapu engün (Jos. 11:4-6, 20; 12:1, 7, 24). Rupachi tripantu mu, ti rey Ben-Hadad quiñehui caquelu 32 reyes engün ñi quehuayafiel pu Israel che, fei Jehová quellufi pu Israel che tañi huehual engün (1 Rey. 20:1, 26-29).

14, 15. 1) Nabucodonosor ca Darío, ¿chem eipingu Jehová ñi alüpüralen mu? 2) Quiñe salmista, ¿chem eipi Jehová mu ca tañi trahunche mu?

¹⁴ Jehová fentrenque rupa pengeli ñi doicülen. Nabucodonosor ñidolcülelu  Babilonia mu mallmahui ñi doi nehuen-ngen itrofill che mu. Fei duamtulafi Jehová, fei ¿chumi Jehová? Elueyu tañi huesa lonco nietual, hueluduami ñi raquiduam. Fei yaftulu Nabucodonosor, ‘püramyefi tati Alüpüralelu’. Fei quimürpui Jehová “turpu aflayai tañi ngen-ngen itrocom dungu”. Ca feipi: “Inei no rume catrütulayafeyu ñi femal tañi ayünieel” (Dan. 4:30, 33-35). Jehová montulfilu ta Daniel pu trapial mu, fei ti rey Darío feipifi com “pu che ñi yamnieafiel Daniel tañi Ngünechen. Fei mai ti rumel mongelequeelchi Ngünechen. Ñi ngünenieel chumcaunorume teifücangelayai, rumel ngünenierpuai” pi (Dan. 6:7-10, 19-22, 26, 27).

¹⁵ Ti salmista ñi feipiel: “Jehová apümcañmaquefi pu huesaque troquiñche ñi pepicaelchi femün; catrütuquefi ñi femnoal tañi raquiduamqueel engün”. Ca feipi: “Ayühun-ngei tati troquiñche poyequefilu ta Chau Ngünechen Jehová, tati troquiñche ñi dulliel Quisungealu” (Sal. 33:10, 12). Feitaque ta fente cümei taiñ feyentuleal Jehová mu.

16. ¿Chem cüme quimniiñ ca chemu? (Pebinge tati adentun).

¹⁶ Penieiñ chem ñi rupan cuifi mu, ¿chem üngümnieiñ ñi rupayal feula? Fütra feyentuleiñ Jehová ñi montulafiel tañi cüdahuelqueteu acule ti “fütra cutrancahun” mu (Mat. 24:21; Dan. 12:1). Quiñeucülechi pu troquiñche Gog de Magog pingelu lefcontuafi Jehová tañi pu che, huelu Jehová eluñmalayayu ñi huehuafiel. Com trahuluufule rume ti 193 coneltulelu ti Naciones Unidas, hueulayafi ti Doi Alüpüralelu ca tañi hueichafe. Jehová feipicünui: “Feman llemai ñi quimürpual pu che iñche tañi doi fütra alüpüralen ca tañi yamnieaeteu engün ta iñche, ca fentren troquiñche  quimnieaeneu engün; feimu mülei ñi quimtucual engün iñche ta Jehová ngen” (Ezeq. 38:14-16, 23; Sal. 46:10).

17. ¿Chem upaai pu ülmencülelu mapu mu, ca chem llohuai pu nor piuquengelu?

¹⁷ Gog lefcontufile Jehová ñi troquiñche, conai ti hueichan Armagedón pingelu. Fei mu Jehová apümafi com ñidol huall mapu mülelu (Apoc. 16:14, 16; 19:19-21). Huelu “tati norngechi che müten müleai Mapu mu, pu nor mongen yenielu mülenagai fei mu” (Prov. 2:21).

18. Bentren rübngechi cristiano, ¿chumingün ca chemu? (Daniel 3:28).

¹⁸ Fentrenque tripantu, fentren cristiano presungeingün, quiñeque langümngeingün ñi poyefiel mu Jehová. Eluucüleingün ñi poyeniefiel Jehová rumel, tati cüla hebreo reque. Ti cüla hebreo feyentulafingün ñi chem pin pu ñidol, Jehová mai feyentufingün. Fei Jehová montuleyu (papeltunge Daniel 3:28).

19. ¿Chem dungu mu raquiduamai Jehová tañi quintucaduamabel ñi pu che, ca chumaiñ beula?

¹⁹ Salmista David feipi tunte falin-ngen poyenieafiel Jehová, feipi: “Jehová juzgayafi tati pu troquiñche. Ahuem Jehová juzgaeli, inaduamüñmaen tañi nor chengen” (Sal. 7:8). Ca huirintucui: “Cuñiutucungean tañi nor chengen mu ca tañi femquen cümeque dungu” (Sal. 25:21). Chem dungu rupale rume, iñchiñ poyenieafiyiñ Jehová ca püntütripalayaiñ quisu mu. Feimu salmista reque feipiaiñ: “Ayüucüleingün tati nor piuquengelu, pu inaquefilu Chau Jehová tañi dungu” (Sal. 119:1).