Jesús quimeltueiñmu iñchiñ mülei taiñ cümelcaucüleal caquelu che iñchiñ. Huelu quiñe rupa mu feipi: “Raquiduamquilmün iñche tañi cüpan meu ñi müleal re cümelcahun. Cüpalan tañi müleal ta cüme tüngün, huelu mai tañi müleal caiñetuhun. Cüpan tañi ‘caiñetuhual ta fotüm ñi chau engu, ca domo püñeñ ñi caiñetuhual ñi ñuque engu ca ti nanünghuen ñi ca femngechi caiñetuhual’” (Mat. 10:34, 35). ¿Chem feipicünui tüfa mu Jesús?

Jesús ayülafui püntütripayal tati pu familia. Huelu quimniefui tañi quimeltuqueel mu püntühuafui pu familia. Feimu inei rume ayüle ñi inayafiel ta Jesús ca ñi fautizahual, mülei ñi quimtucual tañi familia ayülayafui chi tañi femal. Eimi caiñetuelmu tami füta, tami domo cam quiñe tami familia, cüdautuafuimi tami inayafiel Jesús ñi dungu.

Biblia ngülamtueiñmu: “Yafüluumün tamün cümelcaucüleal itrocom che eimün” (Rom. 12:18). Huelu Jesús tañi quimeltun mu caiñetuhuafui pu familia. Quiñe che eluule ñi inayafiel ta Jesús ca ñi quimeltun, tañi pu familia ayülayafui chi, caiñetuafui cütu. Quisu tañi familia caiñetuqueyu (Mat. 10:36).

Quiñeque inaquefilu Jesús mülequeingün ca religion nielu, feimu cüdaungechi dungu mu rupayafuingün: ñi familia ayüafui ñi coneltual coilaque fiesta mu. Fei pu inaniefilu Jesús mülei ñi raquiduamal inei tañi ayühuelafiel. Jesús feipi: “Tati doi piuqueyelu tañi chau ca tañi ñuque iñche meu, coneltulelai iñche meu” (Mat. 10:37). Huelu Jesús feipilai taiñ piuqueyehuenoafiel taiñ pu chau. Huelu Jesús quimeltui chem am doi falin-ngei taiñ mongen mu. Quiñe taiñ familia caiñetueliyiñmu inayafiel ta Jesús, iñchiñ piuqueyeniefiyiñ. Huelu quimnieiñ hune mülei taiñ piuqueyeafiel ta Jehová.

Caiñetueliyiñmu taiñ familia, hueñancülafeiñmu. Huelu iñchiñ loncontucuquefiyiñ Jesús ñi feipin: “Inei rume inaelimeu, huelu eluucülenole ñi layal cütu iñche ñi duam, coneltulelai iñche meu” (Mat. 10:38). Feimu iñchiñ quimnieiñ inafiliyiñ ta Jesús, rupayaiñ caiñetuhun dungu mu cüpalu taiñ familia mu. Huelu amuleaiñ taiñ cüme femal, femngechi cacünutuafuingün tañi raquiduam ca llohuafuingün Biblia ñi quimeltun (1 Ped. 3:1, 2).