• Chau Dios dullifi. Biblia feipi: ‘Elcünufiñ tañi rey iñche ñi fütra huincul mu, [...] iñche elelafiñ com tati pu troquiñche quisungealu, cafei elelafiñ com tati mapu tañi ngen-ngeal’ (Salmo 2:6, 8).

• Tati lonco ülmen David ñi cüpanchengei. Biblia feipi: “Quiñe pichi huentru am choyüngei iñchiñngealu, quiñe fotüm elungeiñ [...]. Alün-ngequetuai tañi gobierno ca aflayai tañi cüme felen David tañi ngünenien meu, fei nor dungu mu cüme elcünungetuai tañi ngünenien” (Isaías 9:6, 7).

• Belen huaria mu choyüngei. Biblia feipi: “Tati lonco ülmen [...] ramtui cheu ñi choyüngeal ta Cristo. Fei huiñoldungungei: ‘Belén pingechi huaria Judea mapu meu. Chau Ngünechen ñi huerquen huirintucui tüfa’” (Mateo 2:4, 5).

• Pu che illamcafi ca langümfi. Biblia feipi feiti loncolealu: “Illamcangei ca falinolu troquifiyiñ. [...] chüngarngei iñchiñ taiñ culpan meu; cafei rume cutrancangei iñchiñ taiñ huelulcan mu” (Isaías 53:3, 5).

• Huiñomongelngetui ca püramyengei. Biblia feipi: ‘Eimi am Chau Dios elcünulayaen ti Rüngan mu. Eluñmalayaimi tami nor piuqueyequeteu ñi peafiel ti rüngan cüfhue. Tami man püle rumel mülequei ayühun’ (Salmo 16:10, 11).

Fütra cuifi ca fantepu mu, quiñe che meu müten femtripai com ñi feipicünuel Biblia. ¿Inei am feiti che? Jesús llemai. Petu ñi choyüngenon, quiñe cüme püllü feipi Jesús meu: “Chau Ngünechen Jehová lonco ülmencünuafi tañi chau David reque [...]. Aflayai tañi ngünenieel” (Lucas 1:31-33).

Miyaupalu mapu mu, Jesús lonco ülmen-ngequelafui. Doi mai, huenu meu loncocünungei Chau Dios ñi Reino meu, fei ñi ngünenieafiel pu che cüpalechi antü mu. Jesús müten cüme pepiluucülei taiñ ngünenieaeteu, ¿chumngechi quimafuiñ tüfa? Ngüneduamaiñ chem fempai Jesús mapu mu.

•   Jesús duamtufi pu che. Jesús itrocom che fürenefi: huentru, domongepe rume, hueche, tremchengeafui rume. Jesús inaduamlafi pu che ñi tuhun cam tunten plata ñi nieel engün (Mateo 9:36; Marcos 10:16). Quiñe rupa, quiñe cutran feipieyu: “Ayülmi mai, tremoltuafen”. Fei, ¿chumi Jesús? Cutranpiuqueyefi, fei tremoltufi ti huentru (Marcos 1:40-42).

• Jesús quimeltueiñmu chumngechi ayühuelafiel ta Chau Dios. Ngelai taiñ doyümafiel plata ta Chau Dios ñi dungu meu. Jesús ca ngülamtui chumngechi iñchiñ ayünieiñ taiñ duamniengeal, ca femngechi duamnieafiyiñ ta caquelu pu che. Jesús ca quimeltui ta Chau Dios ñi re ngüneduamquenofiel taiñ femqueel, huelu mai taiñ raquiduamqueel ca taiñ nieel ta piuque mu. Feimu taiñ ayühuelafiel ta Chau Dios, mülei taiñ ngüneafiel chem raquiduamquei taiñ piuque (Mateo 5:28; 6:24; 7:12). Jesús ca feipi chumafuiñ iñchiñ taiñ rüf ayüucüleal: quimafiyiñ chem ayüquei ta Chau Dios taiñ femürpual, fei inayafiyiñ tüfa taiñ mongen mu (Lucas 11:28).

• Jesús quimeltueiñmu taiñ piuqueyechefengeal. Tañi femün mu ca tañi feipin mu Jesús puhui pu che tañi piuque meu. Biblia feipi: “Pu che afmatulehuei tañi quimeltun mu” (Mateo 7:28, 29). Jesús ca quimeltufi pu che: “Piuqueyenieafimün tamün pu caiñe”. Fei llellipui tañi pu langümeteu mu, feipifi ta Chau Dios: “Rulpacünuñmafinge ñi femün engün, quimlaingün ñi chem chummequen” (Mateo 5:44; Lucas 23:34).

Jesús rüf piuqueyechequei ca quelluchequei, feimu rume pepiluucülei ñi cüme ngünenieafiel ti mapu. Huelu, ¿chumül am ngünenieai?