FÜTRA kuyfi mew, pu longkolechi küdawfe adkünukefi chi küdawfe kam adkünukefi itrokom ñi nieelchi chemkün tati ngen ruka.

Jakob ñi fotüm, Jose pingelu, yengey ñi küdawal Egipto mapu mu. Rupay chi antü, tati ngen ruka “longkokünufi ñi ruka mew, ka longkokünufi itrokom ñi nieelchi chemkün mew” (Gén. 39:⁠2-6). Rupalu chi tripantu, Jose falin longko ngerpuy Egipto mapu mew. Ka femngechi kidu longkokünufi kiñe küdawfe ñi adnieaetew tañi ruka (Gén. 44:⁠4).

Jesus ñi antü mu, pu ülmen che niekefuy fundo, welu epe kom ülmen mülekey waria mu. Feymu longkokünukefuyngün kiñe che, fey ñi adnieafiel ti küdaw ñi femngekefel ti fundo mu.

¿Chem che longkokünungekefuy ti küdaw mu? Kiñe wentru Roma tuwün-ngelu, Columela pingefuy, wirintukukefuy ñi femkefel pu che pu apostol ñi antü mew. Kidu feypi tati küdawfe ñi longkokünungeal mülefuy ñi kim küdawafiel ti mapu. Tüfachi longkolechi küdawfe mülefuy ñi adnieafiel pu küdawkelu ñi küme dewmayal tañi küdaw, welu ñi kutrankanoafiel feychi pu küdawfe ñi adniefiel. Ka feypi: “Doyelchi may, ti longkolechi küdawfe ngelay ñi kimkawal, doy may eluwküleay ñi kimürpual tañi pepilnoel”.

Kiñeke mu, tati Biblia trürümfi ñi femkefel pu longkolechi küdawfe tañi femngeken ti cristiano trawünche mu. Ti apostol Pedro feypifi pu cristiano Ngünechen ñi eluetew kakerume pepiluwün tañi fütra kutranpiwkeyechen mu, feymu mülefuy ñi welukonkechi kelluwal chumngechi ñi femkefel pu longkolechi küdawfe (1 Ped. 4:⁠10, TNM).

Ka femngechi kiñe rupa, Jesus entuy kiñe nütram kiñe longkolechi küdawfe mu (Luka 16:⁠1-8). Ka rupa, Jesus feypi chem ñi ruparkeafel Longko Ülmenkületule wenu mu, feypifi tañi pu inanieetew kidu ñi dulliafiel kiñeke “longko”. Tüfachi pu longko fente küme kimeltukefi pu cristiano Ngünechen tañi dungu afaelchi antü mu. Fey tüfachi pu longko “kim manelfal kona” pingekey fantepu mew (Mat. 24:⁠45-47, TNM; Luka 12:⁠42). Tüfachi kim manelfal kona elukefi fillke papel ka lifru pu cristiano wall Mapu püle mülelu, fey ñi doy maneluwküleal Jewba mu engün. ¡Rume mañumküleiñ llemay!