Isaías 46:1-13
46 Bel diosajj altʼasiwa,+ Nebo diosas altʼasirakiwa.
Idolonakapajj animalanak patjjaruw sarapjje, khumuñ uywanak patjjaruw sarapjje,+wali qarit animalanakjjaruw jathi qʼepir uñtasit sarapjje.
2 Uka diosanakajj altʼasipjjewa, juntukiw altʼasipjjaraki,janiw cargarojj* salvirjamäpkiti,jupanak pachpaw preso apat uñjasipjje.
3 “Jacobun utapankirinaka, Israelan utapat taqe jiltʼirinaka, istʼapjjeta,+khitinakarutï nasïwitpach apoyapksma, khitinakarutï purakankapkayäta ukhatpach uñjapksma ukanakajj istʼapjjeta.+
4 Jilïrëjjäta ukhasa nayajj pachpakïskäwa,+janqʼo pʼeqekëjjäta ukhasa nayajj yanaptʼaskakïmawa.
Kunjamtï nayajj lurkayätjja ukham apaskakïmawa, yanaptʼaskakïmawa, salvaskakïmawa.+
5 ¿Khitir uñtasitaw sapjjetätasa, khitimpis igualayapjjetäta?+
¿Khitjamaw sapjjetätasa, ukar uñtasitäkiristsa ukhamjja?+
6 Yaqhep jaqenakajja bolsapankir qoripjja qʼalwa tukjapjje,balanzaruw qollqe metaljja pestʼapjje.
Metalamp trabajir mä jaqeruw contratapjje, uka metal qollqjja mä diosaruw uka jaqejj tukuyi.+
Ukatjja jupanakajj altʼasipjjewa, jïsa, adorapjjarakiwa.*+
7 Jupanakajj kallachinakaparuw uka diosarojj apapjje,+ukatjja lugaraparuw uchapjje, ukanwa quedasiraki.
Kawkjankkitï uka lugaratjja janiw onjjtkiti.+
Uka diosarojj artʼasipjjewa, ukampis janiw jayskiti,janirakiw khitirus llakipat salvkaspati.+
8 Ukanakat amtasipjjam, jan ajjsarapjjamti.
Juchararanaka, taqe chuyma uk katoqasipjjam.
9 Nayra tiemponakat amtasipjjam,nayajj Diosätaj amtasipjjam, janiw yaqhajj utjkiti.
Nayaw Diosätjja, nayjam Diosajj janiw utjkiti.+
10 Qalltatpachwa nayajj kunatï paskani uk yatiyjjta,nayra tiempotpachaw nayajj kunanakatï janïr luraski ukanakat yatiyjjta.+
Nayajj akham saraktwa: ‘Amtajajj phoqasikipuniniwa,+kuntï nayajj munkta ukwa lurarakëjja’+ sasa.
11 Inti jalsutwa nayajj aycha manqʼani mä jamachʼir jawsta,+jaya markatwa amtaj phoqañapatak mä jaqer jawsta.+
Nayaw arsta, lurarakïwa.
Nayaw amtta, phoqarakïwa.+
12 Jan istʼasir chuyman jaqenaka, istʼapjjeta,kunatï cheqapäki uk lurañat wali jayankapkta ukanakajj istʼapjjeta.
13 Cheqapar uñjir Diosätaj uñachtʼaykä uka tiempojj jakʼankjjewa,janiw jayankkiti,salvación apankä uka tiempojj janiw tardkaniti.+
Sionaruw nayajj salväjja, Israelaruw kʼajkirij churäjja”.+
Notanaka
^ Ukajja, animalanakajj khumupki uka idolonakatwa parlaski.
^ Jan ukajja, “yupaychapjjarakiwa”. Hebreo arunjja, “jupa nayraqataruw altʼasipjjaraki”.