Jehová Diosajj Samuelur akham sänwa: ‘Jesé chachan utapar saram. Jupan mä wawapaw Israelan machaq reyipäni’ sasa. Samuelojj saräna ukhajja, jilïr yoqapar uñjasajj ‘juparuw Diosajj ajllpacha’ sasaw amuyäna. Ukampis Diosajj sänwa: ‘Janiw jupäkiti, nayajj janiw uñnaqaki uñjkti, jan ukasti kunjam chuymanisa ukwa uñjta’ sasa.

Jesé chachajj sojjta wawanakamp Samuelur irpkatäna. Samuelojj sänwa: ‘Jehová Diosajj janiw maynirus ajllkiti. ¿Janit yaqha wawamajj utjki?’ sasa. Jesé chachajj sänwa: ‘David sullka wawajaw faltaski, jupajj ovej awatiski’ sasa. Davidajj mantanïna ukhajja, Diosajj ‘jupawa’ sasaw Samuelur säna. Ukatwa Davidan pʼeqepat aceitempi warjjatasajj Israelan reyipäñapatak ajllïna.

Tiempompejja, israelitanakajj filisteonakampiw guerrankapjjäna. Filisteonakanjja Goliat sat mä jachʼa soldadopaw utjäna. Sapüruw israelitanakar akham sas jiskʼachäna: ‘Maynir nayamp nuwasir khitanipjjam. Atipjitanejja, nanakajj esclavomaruw tukupjjäjja. Nayatï atipjäjja, jumanakajj nanakan esclavojaruw tukupjjarakïta’ sasa.

Davidajj israelit soldadonakan campamentoparuw saräna, soldado jilanakapatakiw manqʼa aparapïna. Ukanwa Goliatar arnaqasir istʼasajj akham säna: ‘Nayaw jupampi nuwasir sarä’ sasa. Saúl reyejj sänwa: ‘Jumajj wawäsktawa’ sasa. Davidajj sarakïnwa: ‘Jehová Diosaw yanaptʼitani’ sasa.

 Saúl reyejj armadurapwa Davidar maytʼäna, ukampis jupajj sänwa: ‘Janiw aka uchantatajj nuwaskiristti’ sasa. Ukatwa qʼorawap aptasisajj jawirar saräna. Moroqʼo phesqa qalanak ajllisajj wayaqaparuw irantäna. Ukatjja Goliatan ukaruw tʼijüna. Goliatasti sänwa: ‘¡Jutam jiskʼa yoqalla, añchhitaw janchimjja jamachʼinakaru salvaje animalanakaru manqʼayäjja’ sasa. Davidasti jan ajjsartʼasaw säna: ‘Jumajj espadampi lanzampiw juttajja, nayajj Jehová Diosan sutipjjaruw jutta. Jumajj janiw nanak contrajj nuwasktati, jan ukasti Dios contraw nuwastajja. Jichhaw taqenejj yatipjjani, Jehová Diosajj espadata lanzata sipansa wali chʼamaniwa. Jupaw taqe jumanakarojj amparanakajar katuyapjjetani’ sasa.

Davidajj qʼorawapar mä qala uchasaw taqe chʼamapampi qʼorawtʼäna. Jehová Diosan yanaptʼapampisti uka qalajj wali chʼamampiw saräna, Goliatan paraparuw purirakïna. Goliatajj jiwataw liwnoqtäna. Ukatsti filisteonakajj jan jiwañ laykojj escapjjapjjänwa. ¿Jumajj Davidjamarakit Jehová Diosar confiyta?