LIBANONKIR cedro qoqanakajja, wali jachʼa, suma ukhamaw jilapjje. Olivo qoqanakasti janiw ukhamäkiti, jiskʼaki wejjru ukhamäpjjewa. Ukampis wali chʼollqhëpjjewa, 1.000 maranakaw jakapjjarakispa. Saphinakapajj wali jachʼawa ukat taqe kun aguantapjjaspa. Ukhamajja, uka qoqan troncopajj khuchhunukutäkchispasa saphipatï jakaskchejja, wasitatwa wali sum jiltaspa.

Uka uñachtʼäwejja, kuntï Diosar serviri Job chachajj siskäna ukwa amtayistu. Jupajj mä qoqatwa parläna, ukajj inas olivo qoqächïna. Akham sänwa: “Mä qoqaru khuchhunuktan ukapachajj chʼichtaniñapaw [jan ukajj wasitat jiltaniñapaw] suytʼatäski” sasa. Waña tiempon jallojj purjjati ukhajja, qoqajj wasitatwa ‘mä machaqa alïkaspas ukham chʼojjñatati’ (Job 14:7-9). ¿Kunsa ukampejj Job chachajj uñachtʼayañ munäna? Jiwjjä ukhasa, Diosajj jaktayitaniwa sasin confiyatap uñachtʼayañatakïnwa (Job 14:13-15).

Mä yapuchirejja, olivo qoqan troncop khuchhunukut uñji ukhajja, wasitat jilsuñapwa suytʼi. Jehová Diosajj ukhamarakiw servirinakapana ukat walja jaqenakan jaktanipjjañap suyaski (Mat. 22:31, 32; Juan 5:28, 29; Hech. 24:15). Jiwasajj ukhamarakiw jiwatanakan jaktanipjjañap suytanjja. ¡Uka uru purinkani ukhajj wali kusiskañapunïniwa!