¿Yatiyätati?

Mateo, Marcos, Lucas ukat Juan libronakanxa, ¿Ley yatichirinakax khitinakänsa?

Jesusan yatiyäwipat qillqatanakanxa Ley yatichirinakat walja kutiw aytasi, jupanakax janiw Jerusalén markanaki apnaqañ yanapapkänti, jan ukasti jiskʼa markanakansa ukat aldeanakansa apnaqapxarakïnwa. Jerusalén markat jayankiri jiskʼa markanakansa ukat Palestina markat jayankir jiskʼa markanakansa apnaqirit uttʼayatäpxänwa, Ley tuqitsa wali yatxattʼatäpxänwa ukat inas qillqatanakat qillqaqirinakäpxchïna (copistas) jan ukax taripirinakäpxchïna (Marcos 2:6; 9:14; Lucas 5:17-21).

Jerusalén markanxa, Ley yatichirinakax judionakan apnaqirinakapamp chikapuniw irnaqapxäna (Mateo 16:21). The Anchor Bible Dictionary, uka qillqatarjamax akham sasiwa: “saserdotenakampipuniw Ley yatichirinakax taripasa judionakan saräwinakaparjam phuqhayasa ukat Sanedrín ukan kuna lurañanakas utji uk lurasaw irnaqapxpachäna” sasa. Ukhamaxa, Ley yatichirinakat maynïrinakaxa Sanedrín ukan irnaqapxäna (tribunal supremo judío) ukat jilïr sacerdotenakas fariseonakas ukankapxarakïnwa.

Biblian aytaski Ley yatichirinakat mayninakaxa, Jesusarux wal uñisipxäna, ukampis mayninakax Jesusar arkañwa munapxarakïna. Maynïrix Jesusar akham sänwa: “arkañpun munsma kawkharutix sarkät ukaru” sasa. Ukat maynirux Jesusax akham sarakïnwa: “Diosan reinopatxa janiw jayankktati” sasa (Mateo 8:19; Marcos 12:28-34).

Biblia qillqaskäna uka tiemponakanxa, ¿kunatsa aceitempi yaqhipanakar warxatapxirïna?

Khuri nayra maranakan Oriente Medio uksanxa, pʼiqirux aceitemp warxatapxapunirïnwa, uk lurasax khuyaptʼayasirïtapa ukat munasiñamp katuqatapwa uñachtʼayapxäna. Uka aceitex olivat lurata ukat suma qʼapkir qullanakampi luratänwa. Ukat hebreonakax maynir jilïrit uttʼayañatakix acietempiw pʼiqipar warxatapxirïna, ukhamat uttʼayatätap amuyapxañapataki. Ukham lurañaruxa, unción sasaw Bibliax saraki. Amtañäni, Aaronax aceitemp pʼiqir warxattʼatäsaw jilïr sacerdotet uttʼayatäna (Levítico 8:12). Ukat David reyitxa, Bibliax akham siwa: “Samuelux jankʼakiw aceiten waxra aptasinxa, [...] uka waynarux reyïñapataki [ajllïna]. Ukat uksarusti Tatitun ajayupaw jupxankäna” sasa (1 Samuel 16:13).

Pʼiqir aceitemp warxattʼas ajlliñataki siski uka arux hebreo arun mascháj sasiwa ukat maschíaj uka arutwa juti, ukax mesías sañ muni. Ukat griego arunxa kjríō ukawa, uka arutsti kjristós uka arutwa juti, ukax cristo sañ muni. Ukhamaxa, Aaronamp Davitampix mesiasäpxanwa jan ukax ajllitäpxänwa. Moisesatxa cristonwa jan ukax ajllitänwa sasirakiwa, kunattix Jehová Diosaw Jupat parlañapataki Moisesar ajllitayna (Hebreos 11:24-26).

Nazaretankir Jesusaruxa, mä jachʼa luräwi phuqañapatakix Jehová Dios pachpaw ajllïna. Pʼiqipar aceitemp warxatañat sipansa qullan ajayupampiw ajllïna (Mateo 3:16). Jehová Diosaw Jesusarux ajllïna ukatwa Mesías jan ukax Cristo sataxa (Lucas 4:18).