Аилә вә достлуг
Чохларына инсанларла мөһкәм мүнасибәтләри горумаг чәтиндир. Ҝәлин бунунла бағлы Мүгәддәс Китабдан бир нечә фајдалы мәсләһәтә диггәт јетирәк.
ФӘДАКАР ОЛУН
МҮГӘДДӘС КИТАБ МӘСЛӘҺӘТИ: «Тәкҹә өзүнүзү фикирләшмәјин, башгаларыны да фикирләшин» (Филиппилиләрә 2:4).
МӘҒЗИ: Адәтән, гаршы тәрәфин рифаһыны дүшүнән, өзләри үчүн нәсә уммајан адамлар башгалары илә јахшы мүнасибәтләри горуја билир. Худбинлик инсанын башгалары илә мүнасибәтләрини позур. Мәсәлән, әр, јахуд арвад худбиндирсә, әввәл-ахыр һәјат јолдашына хәјанәт едәҹәк. Бундан башга, һеч ким варыјла, билији илә өјүнән адамла достлуг етмәк истәмәз. Беләликлә, бир китабда дејилдији кими, «јалныз өзүнү дүшүнән адамларын башы чох бәлалар чәкир» («The Road to Character»).
ТӘТБИГИ:
-
Башгаларына көмәк един. Мөһкәм достлуғун тәмәлиндә мәсулијјәт вә етибар дурур. Бәзи арашдырмалардан мәлум олуб ки, башгаларына көмәк едән инсанлар депрессијаја даһа аз гапылырлар вә онларда өзүнәһөрмәт һисси олур.
-
Шәфгәтли олун. Шәфгәт башгаларынын ағрысыны өз үрәјиндә һисс етмәкдир. Шәфгәтли инсан сарказмдан, јәни башгаларыны инҹитмәк мәгсәдилә дејилән аҹы, кинајәли сөзләрдән узаг олур.
Шәфгәтли олсаныз, башгаларына гаршы анлајышлы олаҹагсыныз. Беләҹә, үрәјиниздә гәрәз олмајаҹаг, һәмчинин мүхтәлиф милләтләрдән, јахуд тәбәгәдән олан инсанларла достлашаҹагсыныз.
-
Инсанлара вахт ајырын. Башгалары илә нә гәдәр вахт кечирсәниз, онлары бир о гәдәр јахшы таныјаҹагсыныз. Әсл достлар газанмаг истәјирсинизсә, дүзҝүн үнсијјәт етмәји баҹармалысыныз. Јахшы динләјиҹи олун. Достларынызын марагларына өнәм верин. Бу јахынларда апарылан бир арашдырманын нәтиҹәсиндә мәлум олмушдур ки, «мәналы үнсијјәт инсанлары даһа хошбәхт едә биләр».
ДОСТЛАРЫНЫЗЫ АҒЫЛЛА СЕЧИН
МҮГӘДДӘС КИТАБ МӘСЛӘҺӘТИ: «Пис достлар јахшы әхлагы позур» (1 Коринфлиләрә 15:33).
МӘҒЗИ: Вахт кечирдијиниз инсанлар сизә ја јахшы, ја да пис тәсир едир. Сосиологлар дејир ки, достларынызын тәсири исә сизин бүтүн һәјатыныза өз тәсирини ҝөстәрә биләр. Мәсәлән, әҝәр сиз сигарет чәкән, јахуд бошанмыш адамларла отуруб-дурурсунузса, бөјүк еһтимал ки, сиз дә сигарет чәкмәјә башлајаҹагсыныз, јахуд бошанмаг фикринә дүшәҹәксиниз.
ТӘТБИГИ: Сизин хошунуза ҝәлән, јахуд өзүнүздә јетишдирмәк истәдијиниз кејфијјәтләрә вә дәјәрләрә саһиб олан инсанларла достлуг един. Мәсәлән, нәзакәтли, һөрмәтҹил, сәхавәтли вә гонагпәрвәр инсанларла отуруб-дурун.
ДИҜӘР МӘСЛӘҺӘТЛӘР
Мүгәддәс Китаба әсасланан, әр-арвадлара, ушаглара вә јенијетмәләрә көмәк үчүн нәзәрдә тутулан видеолара бахын
АҸЫДИЛ ОЛМАЈЫН
«Дүшүнмәдән дејилән сөз гылынҹ зәрбәсинә бәнзәр, һикмәтли инсанын дили исә мәлһәмдир» (МӘСӘЛЛӘР 12:18).
СӘХАВӘТЛИ ОЛУН
«Сәхавәтли боллуға јетишәр» (МӘСӘЛЛӘР 11:25).
ИНСАНЛАРЛА АНЛАЈЫШЛА ДАВРАНЫН
«Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (МӘТТА 7:12).
