Ҝөзәл ҝәләҹәјә үмид
Аллаһ вәд едир ки, јахын ҝәләҹәкдә дүнјада чох ҝөзәл дәјишикликләр олаҹаг. О, әзаб-әзијјәтә сон гојаҹаг вә бәшәр аиләсинә јер үзүндә ҝөзәл һәјат бәхш едәҹәк (Зәбур 37:11). Буна там әмин ола биләрик, чүнки «Аллаһ инсан дејил ки, јалан данышсын» (Сајлар 23:19). Ҝәлин Аллаһын едәҹәји ишләрдән бәзиләринә нәзәр салаг.
Аллаһ пис инсанлары мәһв едәҹәк
«Писләрин алаг оту кими битмәси, бәдәмәлләрин чичәкләнмәси онлары әбәдилик мәһвә апарыр» (ЗӘБУР 92:7).
Әввәлки мәгаләдән өјрәндијимиз кими пислик ҝүнү-ҝүндән артыр. Бу бизи тәәҹҹүбләндирмәмәлидир. Ахы Мүгәддәс Китабда 2 Тимутијә 3:1—5 ајәләриндә габагҹадан јазылмышды ки, ахырзаманда инсанлар һәддән артыг корланаҹаг. Бәс ахырзаман дејиләндә нә нәзәрдә тутулур? Аллаһсыз инсанларла долу дүнјанын сону. Тезликлә Аллаһ пис әмәлләрдән әл чәкмәјән инсанлары мәһв едәҹәк. О заман јалныз јахшы инсанлар, Аллаһа итаәт едән инсанлар сағ галаҹаг. «Салеһләр јерә саһиб олаҹаг, орада әбәди јашајаҹаглар» (Зәбур 37:29).
Аллаһ Шејтаны мәһв едәҹәк
«Сүлһ мәнбәји олан Аллаһ тезликлә Шејтаны... әзәҹәк» (РОМАЛЫЛАРА 16:20).
Пис инсанлар, Шејтан вә ҹинләр мәһв едиләндән сонра јер үзүндә сүлһ бәргәрар олаҹаг. Аллаһ вәд едир ки, инсанлары «горхудан олмајаҹаг» (Микә 4:4).
Аллаһ хәстәлијә вә өлүмә сон гојаҹаг
«О [Аллаһ] онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (ВӘҺЈ 21:4).
Аллаһ Шејтанын, Адәмлә Һәвванын вә инсанларын гејри-камиллијинин сәбәб олдуғу бүтүн зәрәрләри арадан галдыраҹаг. Буна ҝөрә дә әзаб-әзијјәт вә хәстәлик олмајаҹаг. Бунлар олмадығына ҝөрә өлүм дә олмајаҹаг. Аллаһы севән, Она итаәт едән инсанлар әбәди јашајаҹаглар. Бәс дүнјамыз неҹә олаҹаг?
Аллаһ Јер күрәсини Ҹәннәтә чевирәҹәк
«Сәһра вә гураг торпаг севинәҹәк, дүзләр шадланаҹаг, зәфәрантәк чичәкләнәҹәк» (ӘШИЈА 35:1).
Аллаһ пислијин көкүнү кәсәндә јер үзү ҹәннәтә чевриләҹәк. Һәр јан ҝүл-чичәк олаҹаг, әрзаг бол олаҹаг (Зәбур 72:16). Океанлар, ҝөлләр, чајлар тәмиз олаҹаг, орада ҹанлылар гајнашаҹаг. Бәлкә дә инсанлар «чиркләнмә» сөзүнү һеч билмәјәҹәкләр! Һамы өз әли илә тикдији евдә јашајаҹаг. Евсиз-ешиксиз, аҹ, јохсул инсан олмајаҹаг (Әшија 65:21, 22).
Аллаһ өлүләри дирилдәҹәк
«Аллаһын һәм салеһләри, һәм дә гејри-салеһләри дирилдәҹәјинә үмид едирәм» (ҺӘВАРИЛӘРИН ИШЛӘРИ 24:15).
Вәфат етмиш доғмаларынызы јенидән ҝөрмәк истәјәрдиниз? Јер үзү ҹәннәтә чевриләндә һәр шејә гадир Аллаһ онлары дирилдәҹәк. Сиз онлары таныјаҹагсыныз, онлар да сизи. Тәсәввүр едирсиниз, бир-биринизә говушанда неҹә севинәҹәксиниз?! Биз Аллаһын бу вәдинә үрәкдән инана биләрик. Чүнки Мүгәддәс Китабда Аллаһын инсанлары дирилдиб, доғмаларына говушдурдуғу һадисәләр гәләмә алыныб. Үстәлик, Иса пејғәмбәр дә бир нечә дәфә чохлу инсанын ҝөзү гаршысында өлүләри дирилтмишди (Лука 8:49—56; Јәһја 11:11—14, 38—44).
You May Also Like
ОЈАНЫН!
Тәлатүмлү дүнјада үмидинизи итирмәјин
Мүгәддәс Китаб бизә һәјатын проблемләринә тап ҝәтирмәјә көмәк едир вә ҝәләҹәјә үмид верир.
МҮГӘДДӘС КИТАБА АИД СУАЛЛАРА ҸАВАБ
Дирилмә нәдир?
Кимләрин дириләҹәјини билмәк сизи тәәҹҹүбләндирә биләр.
МҮГӘДДӘС КИТАБА АИД СУАЛЛАРА ҸАВАБ
Јер үзүндә сүлһ неҹә бәргәрар олаҹаг?
Аллаһын Өз Падшаһлығы васитәсилә бүтүн дүнјада сүлһү бәргәрар едәҹәјинә даир вердији вәди неҹә һәјата кечирәҹәји барәдә өјрәнин.
