АЛМАТЫ, Газахыстан. 2017-ҹи ил мајын 2-дә Газахыстанын пајтахты Астанада кечирилән мәһкәмә мүттәһим Тејмур Әһмәдовун Мүгәддәс Китаб әсасында хошнијјәтли маарифләндирмә фәалијјәтини «дини гаршыдурмаја тәһрик» вә «[дини] ајры-сечкилик тәблиғаты» адландырараг, ону беш ил мүддәтинә һәбсә мәһкум етди. Һәмчинин һаким һәбс ҹәзасына әлавә олараг Әһмәдовун Мүгәддәс Китаб үзрә маарифләндирмә фәалијјәтиндә иштиракына үчиллик гадаға гојду. Бу гәрар ганахма илә мүшајиәт олунан шишдән әзијјәт чәкән 61 јашлы аилә башчысы, 3 өвлад атасы Тејмур Әһмәдовун һәјатыны тәһлүкә алтына гојур. Чүнки мүттәһимин мүалиҹә алмасына изин верилмир. Мүттәһим Әһмәдовун верилән гәрара етираз мүраҹиәтинә, чох ҝүман ки, мај ајынын сону, јахуд ијун ајынын әввәлиндә бахылаҹаг.

Бу гәрар 2017-ҹи ил јанварын 18-дә Газахыстан Милли Тәһлүкәсизлик Комитәсинин Тејмур Әһмәдову Ҹинајәт Мәҹәлләсинин 174.2-ҹи маддәсинин јанлыш тәтбиги нәтиҹәсиндә һәбс етмәси илә башланан һүгуги просесин нөвбәти фаҹиәви гәрары олду. Гејд едәк ки, мүттәһим Әһмәдов бир нечә ај һәбсдә сахланылыб вә мүалиҹәсинә изин верилмәјиб. Јеһованын Шаһидләринин үмумдүнја баш идарәсинин нүмајәндәси Дејвид Семониан дејир: «Бүтүн дүнјадакы Јеһованын Шаһидләри Тејмур Әһмәдова ҝөрә чох нараһатдыр. Биз үмид едирик ки, сәлаһијјәтли шәхсләр бу әсассыз иттиһамлары тезликлә ләғв едәрәк өлкәнин ганунларына табе олан бу нүмунәви вәтәндашын өз аиләсинә говушмасына вә еһтијаҹ дујдуғу тәҹили тибби јардым алмасына иҹазә верәҹәк».

Јеһованын Шаһидләри һесаб едир ки, Астана мәһкәмәсинин вердији гәрар Газахыстанын Русијанын дини дөзүмсүзлүк фәалијјәтини изләмәсинин ҝөстәриҹисидир вә чох ҝуман ки, тәзәликҹә Русија Али Мәһкәмәсинин Јеһованын Шаһидләринин Русијадакы идарә мәркәзинин гадаған олунмасы илә бағлы вердији гәрардан гајнагланыр. Дејвид Семониан ачыглама ҝәтирир: «Русијада олдуғу кими, Тејмур Әһмәдов да терроризмә гаршы мүбаризә илә бағлы ганунун ибадәтимизә әсассыз тәтбигинин гурбаныдыр. БМТ Инсан Һүгуглары Комитәси вә АБШ Дини Азадлыг үзрә Бејнәлхалг Комиссијасы дахил олмагла, диҝәр бејнәлхалг тәшкилатлар да Газахыстаны бу ганунлары јанлыш олараг динҹ ибадәт едәнләрә гаршы тәдбиг етмәјә сон гојмаға сәсләјир». О, сөзләрини белә јекунлашдырыр: «Биз Газахыстандакы бүтүн диндашларымыза ҝөрә чох нараһатыг. Үмид едирик ки, онлар бүтүн дүнјада инсанлара фајда ҝәтирмәклә танынан маарифләндирмә фәалијјәтинә ҝөрә артыг тәгиб олунмајаҹаглар. Бу ишин ҝедишаты һәр биримизи јахындан марагландырыр».

Әлагә үчүн:

Бејнәлхалг мәлумат хидмәти: Дејвид Семониан, Иҹтимаи әлагәләр шөбәси, тел.: +1 845 524 3000

Газахыстан: Бекзат Смагулов, +7 747 671 45 01