Həvarilərin işləri 1:1—26
1 Ey Teofil! Birinci hekayətdə İsanın göyə alındığı günədək gördüyü bütün işləri və təlimləri yazmışdım.+
2 O, göyə qalxmazdan əvvəl+ seçdiyi həvarilərinə*+ müqəddəs ruh vasitəsilə buyruqlar vermişdi.
3 İsa çəkdiyi əzablardan sonra sağ olduğunu bir çox danılmaz sübutlarla onlara göstərdi.+ Həvarilər onu qırx gün ərzində gördülər. İsa onlara Allahın Padşahlığı haqqında danışırdı.+
4 İsa onlarla görüşəndə bu əmri verdi: «Yerusəlimdən uzaqlaşmayın,+ Atamın vəd etdiyi+ və mənim dediyim şeyi gözləyin.
5 Çünki Yəhya su ilə vəftiz* edib, siz isə bir neçə gündən sonra müqəddəs ruhla vəftiz ediləcəksiniz».+
6 Onlar bir yerə toplaşdıqları zaman İsadan soruşdular: «Ağa, İsraildə padşahlığı indi bərpa edəcəksən?»+
7 İsa onlara cavab verdi: «Dövrləri və tarixləri təyin etmək yalnız Atanın ixtiyarındadır,+ sizin bunları bilməyinizə gərək yoxdur.
8 Amma müqəddəs ruh üzərinizə gələndə siz qüvvət alacaqsınız+ və Yerusəlimdə+, bütün Yəhudiyyədə və Səməriyyədə+, hətta yerin ucqarlarınadək+ mənim şahidim+ olacaqsınız».
9 Bunları deyəndən sonra İsa onların gözü önündə yuxarı qaldırıldı və bulud onu örtüb görünməz etdi.+
10 İsa qalxarkən onlar durub göyə baxırdılar. Bu zaman onların yanında ağ libaslı+ iki kişi peyda olub onlara
11 dedi: «Ey cəliləlilər! Niyə durub göyə baxırsınız? Sizdən göyə götürülən bu İsanın göyə necə getdiyini gördünüzsə, elə də geri gələcək».
12 Bundan sonra onlar Zeytun dağından Yerusəlimə qayıtdılar.+ Bu dağ Yerusəlimdən haradasa bir kilometr aralıda* yerləşir.
13 Onlar şəhərə gəlib üst mərtəbədə qaldıqları otağa çıxdılar. Bunlar Butrus, Yəhya, Yaqub, Andreas, Filip, Tomas, Bartolmay, Mətta, Alfayın oğlu Yaqub, Qeyrətli ləqəbi verilmiş Şimon və Yaqubun oğlu Yəhuda idi.+
14 Bəzi qadınlar,+ habelə İsanın anası Məryəm və qardaşları+ da onlarla birlikdə idi. Onların hamısı yekdilliklə və aramsız dua edirdilər.
15 O günlərdə təxminən yüz iyirmi adam bir yerə toplaşmışdı. Butrus qardaşların arasında durub dedi:
16 «Qardaşlar! Müqəddəs ruh Davudun dili ilə İsanı tutanları gətirən+ Yəhuda haqqında əvvəlcədən xəbər vermişdi.+ Bu, mütləq yerinə yetməli idi,
17 çünki o, bizlərdən biri+ idi və bu xidmətdə payı vardı.
18 (Bu adam pis əməllə qazandığı pula+ tarla aldı. Başıaşağı yıxılıb qarnı yırtıldı, bağırsaqları yerə töküldü.+
19 Yerusəlimin bütün sakinləri bu hadisədən xəbər tutdu. Buna görə də bu tarlaya onların dilində Hakeldama, yəni Qan Tarlası deyilir.)
20 Çünki Zəburda yazılıb: “Yurdu boş qalsın, orada kimsə yaşamasın”+ və “Nəzarətçi vəzifəsini başqası tutsun”.+
21 Buna görə də Aǧa İsa aramızda fəaliyyət göstərdiyi müddət ərzində həmişə bizimlə olanlardan biri
22 bizimlə birgə onun dirilməsinə+ şəhadət etməlidir. Bu adam İsanın Yəhya tərəfindən vəftiz olunduğu+ gündən ta bizdən alındığı+ günə kimi aramızda olan adamlardan biri olmalıdır».
23 Onda iki nəfər təklif edildi. Bunlardan biri Barsəbas və Yust adları ilə tanınan Yusif, o birisi Məttiya idi.
24 Həvarilər dua edib dedilər: «Ey Yehova! Sən hər kəsin ürəyini bilirsən.+ Bu iki nəfərdən kimi seçdiyini bizə göstər ki,
25 həmin adam Yəhudanın öz yolu ilə gedib imtina etdiyi bu xidməti və həvarilik vəzifəsini yerinə yetirsin».+
26 Onlar püşk atdılar+ və püşk Məttiyaya düşdü. Onu on bir həvarinin sırasına daxil etdilər.
Haşiyələr
^ Yun. apostolos. Mənası: göndərilmiş; elçi.
^ Hərfən: şənbə yolu məsafəsində. Yəhudilərə şənbə günündə bu qədər yol getmək olardı.