23 aprel 2023-cü il tarixində Cənubi Koreyada keçirilən xüsusi görüşdə Çin jest dilində Müqəddəs Kitabın «Mətta» bölməsinin işıq üzü gördüyü elan olundu. Bu, Çin jest dilində çıxan ilk Müqəddəs Kitab bölməsidir. Cənubi Koreyanın iki jestdilli yığıncağından təxminən 200 nəfər bu görüşdə iştirak etdi. Bu tərcüməni artıq jw.org saytından və «JW Library Sign Language» tətbiqindən yükləmək mümkündür.

Tərcümə qrupu Müqəddəs Kitabın bu bölməsini təbii və yığcam şəkildə tərcümə etmək üçün əlindən gələni etdi. Bununla bağlı bir tərcüməçi deyir: «Tərcümə qrupunun üç üzvündən ikisi eşitmə qüsurludur. Ona görə də biz tez-tez eşitmə qüsurlu insanların düşüncə tərzi barədə danışırdıq. Onların baxış tərzinə sahib olmağın sayəsində tərcümə işimiz daha da asanlaşdı».

Başqa bir tərcüməçi isə belə deyir: «Bu layihə üzərində işləmək mənə İsanın yer üzündə olarkən nələr etdiyini, nələrdən keçdiyini və nələr öyrətdiyini daha aydın başa düşməyə kömək etdi».

Görüşdə iştirak edən eşitmə qüsurlu bir təbliğçi deyir: «Bu nəşrdən əvvəl Çin jest dilində yalnız bir neçə ayə mövcud idi. Sanki əlimizdə pazlın cəmi bir neçə hissəsi var idi. İndi «Mətta» kitabı işıq üzü gördü və mən səbirsizliklə bütün şəkli görmək istəyirəm».

Başqa bir eşitmə qüsurlu təbliğçi isə bölüşür: «Yehovanın təşkilatı jest dilində nəşrlər dərc edir. «Mətta» kitabının Çin jest dilində nəşr olunması isə məni bir daha əmin etdi ki, Yehova eşitmə qüsurlu insanlara kömək etmək istəyir və onları çox sevir».

Bu tərcüməyə görə Yehovaya çox minnətdarıq. Onun sayəsində bacı-qardaşlarımız «ruha və həqiqətə uyğun» ibadət etməyə davam edə biləcəklər (Yəhya 4:24).