JÔM dilo mbus mabet ma Yésu i ngii, 120 ma banigil ba kodba i Yérusalem i kel Ngwa Pentékôt u Lôk Yuda i ñwii 33 N.Y. Ndi mbimba kikii mbuk mbebi nunkeñi i pak ndap yosô. Hélha jam i bôña le banigil ba kahal pot dilémp dipe ba bé yi bé. Bini bihélha bi mam bi bé kobla lelaa? Le Djob a nti banigil mbuu mpubi.

Limut li bakén ba bôt li lôlak i biloñ biloñ inyu ngwa keñi li ba mbédgé. Ni bo ba hel ngandak i nok banigil ba Yésu ba mpot dilémp tjap! Pétrô a koble bo kii ba bé tehe, a añle bo lelaa mpôdôl Yôel a kal le Djob a ga “kôp” mbuu wé, le u ti bôt ba nkôs wo ngui i boñ mam ma hélha. (Yôel 2:28, 29) Kôba i mbuu mpubi i ngii banigil i bi unda le mam ma nhéñha: Djob a nti ntôñ bikristen kona yé ngoo, ndi a ntjôô Lôk Israél. Bôdôl yokel, mut nye ki nye a bé yéñ gwélél Djob i nya i nlémél nye a bé lama yila nigil Kristô.

Nlélém ngéda, ngolba i kahal nai, baoo ba ha banigil i mog. Ndi ni juu, añgel Yéhôva i yibil makôga ma ndap mog, i kal banigil le ba waa bañ añal miñañ minlam. I mayél ma kel, ba boñ kii añgel i kal bo. Ba jôp i témpel, ba kahal añal ñañ lam inyu Yésu. Ha nyen baéga bibase ba unup ngandak, ba ti bo oda le ba añal ha bañ ki u ñañ. Baôma ba kon bé woñi, ndi ba timbhe bo le: “Di nlama nôgôl Nyambe iloo bôt.”​—Minson mi Baôma 5:28, 29.

Ndéénga i kônde keñep. Lôk Yuda ihogi i soman nigil wada le Stéfanô, ba kal le a ñôbôs jôl li Djob. Ha nyen ba ôm Stéfanô ngok letee a wo. Mange wanda le Saulô, ngwélés i nkoñ Tarsô, a bi tehe kiki ba nol Stéfanô, a nit ki nyemb yé. A yoñ njel Damaskô, a ke i gwel nu ni nu a yé nigil Kristô. Mu njel nyen, bitéé bi lôñi, mapubi ma lôlak i ngii ma bai, ma kéña nye. Ha nyen a nok kiñ i nkal nye le: “A Saulô, a Saulô u ntééngana ki me?” Ndi kii mapubi ma bi yilha nye ndim, Saulô a bat le: “We njee?” Kiñ i timbhe le: “Men me yé Yésu.”​—Minson mi Baôma 9:3-5.

Mbus dilo diaa Yésu a ep Anania, nigil wé wada, le a boñ le Saulô a tehna. Saulô a sôblana, ni nye a bôdôl añal miñañ minlam inyu Yésu ni ñem lôs. Saulô a bi sôk yiba ni jôl le ñôma Paul. A yila ki mut maként ngandak ikété likoda li bikristen.

Banigil ba Yésu ba bé añal ñañ lam u Ane Djob. Ndi ba bé añle ndik Lôk Yuda ni bôt ba Samaria. Ha nyen añgel yo i pémél ni Kornéliô, sônda i Rôma i i bé kon Djob woñi. Añgel i kal nye le a yéñ ñôma Pétrô. Ngéda Pétrô a bi lo ni bôt bape, a añle Kornéliô ni lihaa jé ñañ lam. Bôt bana ba ba bé Lôk Yuda ndi ba ba gwé hémle. Ki Pétrô a ngi podok, ha nyen mbuu mpubi u bi suhul i ngii ba bobasôna ba bé emble nye. Ni Pétrô a kal le ba sôblana i jôl li Yésu. Bôdôl ha nyen yak biloñ bipe bi kôhna botñem i niñ boga ni boga, likoda ki li ba nkôôbaga i tjam ñañ lam ni nkoñ isi wonsôna.

​—Biniigana bini bi nyôñna i kaat Minson mi Baôma 1:1–11:21.