Wemede u nyi le Bibel i ñañle bés niñ i bôt ba kôba. Ngandak mu ikété yap, bôlôm kii bôda, i bé gwélél Yéhôva. Ndi yak bo, ba bi kôhna mandutu kiki bés i len ini. Ñ, ba ‘bé yaga bôt ba binam kikii bés.’ (Yakôbô 5:17) Inyu bahogi, mandutu ni nduña yap i bééne bo mbegel ikeñi. Inyu bape, bôt bap ba lihaa tole lôk tata yap ikété likoda yon i bi unbaha bo. Ndék ipe ki, kiñ ñem yap yon i bé kéés bo inyu mahôha ba bi boñ.

Baa hala a bi tinde bo i waa gwélél Yéhôva? Heni. Ngandak i bé hoñol kiki ntôp tjémbi, nu a soohe le: “Me bi yôm wengoñle ntômba nimlaga; yéñ nkol woñ, inyule me nhôya bé me matiñ moñ.” (Tjémbi 119:176) Di nhémle le yak we u gwé minlélém mi mahoñol.

Kekikel, Yéhôva a nhôya bé bagwélél bé ba ba nyodi ikété bémba yé. Ndi a nyéñ bo. Ngim mangéda, a ngwélél lôk tata inyu boñ hala. Kii héga, Hiôb a bi kôhna ngandak mandutu: a nimis nkus wé, bon bé ba wo, a kon ki ngandak. Ndi to hala, Yéhôva a bi hôla ngwélél wé. Hiôb a bi nok ki njôghe inyule mawanda mé, ma ma bé lama nit nye, mon ma bé leñ nye bibuk bibe. Ngim mangéda, Hiôb a bé hoñol le mandutu mé ma nlôl yak Yéhôva. Ndi to hala, a bi yénag bé a kôm Yéhôva mbus. (Hiôb 1:22; 2:10) Baa lelaa Yéhôva a bi kodol mahoñol mé?

Njel yada Yéhôva a bi pohol inyu hôla Hiôb i yé le: a bi ep Elihu, nu yak nye a bé gwélél Yéhôva. Ngéda Hiôb a bi tjelel, a pahal nduña yé, Elihu a bi tibil nduk emble nye, ndi mbus a yoñ hop. Baa kii a bi kal nye? Inyu tinde Hiôb i héñha, baa Elihu a bi kéés nye tole a bi hôñlaha nye mahôha mé? Baa a bi wéha nye nyu tole a bé hoñol le a téé sép iloo Hiôb? Heni! Mbuu mpubi won u bi tinde Elihu i pot le: “Nun-ki, i bisu bi Nyambe, me ni we di téé mpom tel wada; me ki me méba ni ték lima.” Elihu a kônde ti nye makénd, a kal le: “Nun-ki, masihi mem m’a sôha bé we ñem, woo wem ki w’a hihbe bé we makeñi.” (Hiôb 33:6, 7) Ilole a kônde nôgha Hiôb njôghe, Elihu a bi pot ni gwéha inyu ti Hiôb maéba ni makénd a bééna ngôñ.

Soho, yi le yak bés di bééna minlélém mi mahôñol kii Elihu ngéda di kôôbaga man kaat nunu. Di bi bôk di boma lôk tata i bi bagla ni likoda. Di bat bo mahoñol map. Di tibil emble kii bi tagbe niñ yap ndi ba ke haa ni Yéhôva. (Bingéngén 18:13) Mbus ha, di wan Bitilna ikété masoohe inyu béñge lelaa Yéhôva a bi hôla bagwélél bé ba kôba, ngéda ba bi kôhna minlélém mi mandutu. Ndi di sôk, di léba lelaa miñañ mi, mi nhôla lôktata ipe i len ini. U ga léba mam ma momasôna ikété man kaat nunu. Jon, di nsoohe we ikété gwéha le u yoñ ngéda i añ yo. Ba nkwoog nkaa le di ngwés we ngandak.

Juu li Bakena Ntôñ u Mbôgi Yéhôva