Ngéda mahoñol moñ ma nyuu we
BAA yak we u ma tégbaha mangéda mabe kayéle u bana ha bé ngôñ i niñ? Ibale ñ, wee u nla nok i yom Adriana a bi nôgda. A bééna nduña ikeñi a kônhaga ngoo inyule a bééna bé botñem yo kiki yo. I dokta, ba bi sôk ba léba le Adriana a gwé kon u mahoñol.
Hihéga hipe hi yé hi Kaôru, nu a bé tééda bagwal bé ba ba bé kon. A ntoñol le: “Ha ngéda i, bôlô i bé yuu me ngandak, ngim mangéda, to ngôñ i je me bééna ha bé, to nañal, me bé nañal bé loñge. Me bi sôk me hoñol le i bé me nseñ le me wo.”
Ojebode, man Najéria a nkal le: “Me bé kônha ngoo, me eek hiki ngéda, jon me bi noode nitba.” Masoda le to Ojebode, to Kaôru ndi to Adriana, to wada ikété yap a bi nitba bé. Ndi, mbôgôl i didun di bôt i nitba hiki nwii.
HEE DI NLA LÉBNA MAHÔLA?
Ikété bôt ba nitba, ngandak i yé bôlôm. Libim ikété yap li bi kon ison i bat mahôla. Ndi Yésu a bi kal le bakokon ba gwé ngôñ ni matibla ma dokta. (Lukas 5:31) Jon ibale yak we u gwé kon mahoñol, u kon bañ ison i bat mahôla. Ngandak bôt i i bééna kon u mahoñol, i bi tehe le matibla ma dokta ma nla hôla bo i hônba kon wap. Ojebode, Kaôru ni Adriana ba bi kôhna mahôla ma dokta, nano mam ma nke ndék loñge.
Inyu tibil kon u mahoñol, bidokta bi nla gwélél bee, bi nla ki kwel lôñni nkokon, tole bi nla gwélél manjel ma mo ima. Bet ba gwé kon u mahoñol ba gwé ki ngôñ ni mahôla ma lihaa jap lôñni mawanda map. Yéhôva Nyambe a yé liwanda li li nlôôha ba loñge ikété mawanda mut binam a nla bana. Nyen a nti bés Bañga yé le Bibel inyu hôla bés.
LISUK LI KON U LI GA BA LELAA?
Ngim mangéda i mbéda matibla ma tôbôtôbô inyu i bet ba gwé kon u mahoñol, ba nlama ki neebe i héñha ngim bilem ikété niñ yap inyu pamba. Ndi ibale u gwé kon u mahoñol, u nla bana botñem le mam ma ga lama. Yak Ojebode a bi bana nlélém botñem, a nkal le: “Me gwé ngôñ ikeñi i tehe mbônga u u yé ntilbaga i kaat Yésaya 33:24, le kel yada i ga lo, ngéda mut to wada a’ kal bé le ‘me nkon.’” Nlélém kiki Ojebode, bana botñem le Nyambe a ga lona “hisi hi yondo,” i het “njiiha” y’a ba ha bé. (Masoola 21:1, 4) Mbônga u, u nkobla ki le makon ma mahoñol ni ma ñem ma ga ba ha bé. Njiiha inan i ga mal. Ndutu nan y’a ba ha bé kekikel inyule “[n’]a hoñol ha bé bi bi bôk, to bigda gwo miñem [minan].”—Yésaya 65:17.
