ISAÑ Yôhanes a bi sôblana kiki Mbôgi Yéhôva, hala a bé 60 ma nwii, i man tison i Gujerat, i loñ India. Yôhanes ni lôkisañ ina (munlôm wada ni bôda baa), ni nyañ wap ba bé Katôlika Rômana bobasôna, jon ba bé kolba hémle i isañ wap.

Kel yada, isañ Yôhanes a bat nye le a kee i ti liwanda jé li mbuu léta. Ndi i kegla i, Yôhanes a bi babaa i hinoo ngéda a bé yibil soso pôndi i bikei. Ndi, kiki a bé sômbôl nôgôl isañ, a bi kañ pisis libadô i hinoo hié hi hi bé yoo matjél, a ke i ti léta ni makôô.

Ngéda a bi bol nyoo, a koba nwaa nwet kaat, nu a bé Mbôgi Yéhôva. Muda a bi yoñ léta i, a tehe le Yôhanes a gwé mbabaa i hinoo, a bat nye le a yén inyu boñ le a tibil nye. A bi pémés man wé kwémbéé i bee, a jôa nye mbabaa, a ha bee mu, ndi a léb yo. Mbus, a ti nye libôndô li kofi li li bé légék, a kwélhak nye mam ma Bibel ni liyômba.

Ibôdôl ha ngéda i, ngolba Yôhanes a bééna ikolba Mbôgi Yéhôva i bi bôdôl sôs, jon a bi bat muda nu mam ima, i het biniigana bi base isañ bi bé maselna ni ma base yé​—i yi too Yésu a yé Nyambe, ni i yi too bikristen bi nlama soohe Maria. Kiki a bé yi hop ligwéé li Yôhanes, muda Mbôgi Yéhôva a bi timbhe nye ni njel Bibel, a ti ki nye man kaat nunu ni hop Pulasi le “Cette bonne nouvelle du Royaume.”

Mbus, mu kii a bé soñgol man kaat nu, Yôhanes a bi nôgda le a bé nok maliga ma Bibel inyu ngélé bisu. Jon a bi ke i tehe Pada, a bat ki nye minlélém mi mambadga ima a bat sita. Pada a unup ngandak, a leñ nye Bibel, a nyayak le: “U nyila Satan! Unda me hee homa Bibel i nkal le Yésu a ta bé Nyambe. Unda ki me hee i nkal le di nlama bé soohe Maria. Ñ, unda me!” Liboñok jé li bi lôôha tééñga Yôhanes kayéle a kal Pada le: “Me ga bii ha bé kôô wem i base i Lôk Pada kekikel.” Ibôdôl yokela, a mah ke ha bé nyoo!

Yôhanes a bi bôdôl nigil Bibel ni Mbôgi Yéhôva, a yoñ ki makidik i gwélél Yéhôva ni ntôñ wé. Mbus ngéda, ngandak bôt i lihaa jap i bi boñ nlélém. I len ini, Yôhanes a ngi gwé ndôndôô i hinoo i woo walôm i het a bi babaa nano a yé 60 ma nwii. A ngi hoñlak liboñok lilam li kristen li li bi ôt nye maliga.​—2 Korintô 6:4, 6.