“Me bi bôdôl añ Bibel, ndi i ngéda me bi tehe kiki Bibel i yé soso ni i ngéda i bé lama yoñ me inyu añ yo, hala a bi tômbôs me!”—Briana, 15 nwii.

 Baa, yak we u nôgda nlélém jam? I yigil ini i ga hôla we!

•  Inyuki di nlama añ Bibel?

•  Lelaa me nla boñ inyu añ yo?

•  WI jam bisega gwoñ bi nkal

 I ngéda u nhoñol le u nlama añ Bibel, baa hala a nwéés we? Ibale u ma hoñol hala, u ta bé wetama. Bebek inyu yoñ, Bibel i yé ndik soso kaat i i gwé iloo hikôô hi mapep, i ban-ga bé to titii to yada. I ta bé kiki télé tole bividéô mut a nla béñge!

 Noode le hégda le u nléba nlômbi nkuu u u gwé tik gwom. Baa w’a bana nga ngôñ i béñge i yom i yé mukété?

 Di nla hégda Bibel ni i nlômbi nkuu u. Bibel i gwé biloñge bi biniigana bi bi nla hôla we i niñ yoñ, kiki bo:

•   Lelaa u nla yoñ makidik malam?

•   Lelaa u nla nôgla ni bagwal boñ?

•   Lelaa u nla léba biloñge bi mawanda?

•   I nla yak hôla we i ngéda u gwé nduña

 Inyuki i nlômbi kaat unu, u nla ki ba nseñ i len ini? Inyule “Tilna yosôna i nlôl ni Nyambe.” (2 Timôtéô 3:16) Hala a nkobla le maéba ma nlôl i Bibel ma nlôl yak mut a nlôôha bana pék. Bibel i yé kiki nlômbi nkuu u u gwé ngandak tik gwom i i nla ti bés pék.

 Añ Bibel ibôdôl i bibôdle ipam lisuk. Hala a ga hôla we i yi kii Bibel i mpôdôl. Ngandak manjel i yé inyu añ Bibel, di béñge manjel ima:

•    U nla añ ibôdôl i kaat Bibôdle ipam i kaat Masoola, 66 ma bikaat.

•    U nla añ yo manoñ, manoñ, kiki mam ma bé bôña.

 Likeñge: Appendice A7 i Bibel Ngobol mbok yondo i ntoñol imbe ngéda hiki jam li bi pémél Yésu hana ’isi li bi tagbe.

 Pohol ngim ñañ u Bibel u u mpôdôl i ndutu u mboma. Kiki ’héga:

•   Baa u gwé ngôñ ni mawanda ma u nla bôdôl ñem? Añ ñañ u Yônatan bo David. (1 Samuel, bipes 18-20) I mbus, gwélél man lipep inyu ôt pék le “Comment se faire des amis fidèles” inyu ôt biniigana mu ñañ u.

•   Baa u nsômbôl yémbél manoodana? Añ ñañ u Yôsep, u tehe ki lelaa a bi yémbél manoodana. (Bibôdle, pes 39) I mbus, gwélél bon ba mapep inyu ôt pék le “Comment résister à la tentation . . . Joseph—1re PARTIE” ni “Accusé à tort! Joseph—2e PARTIE” inyu ôt biniigana mu ñañ u.

•   Baa u ngwés yi lelaa masoohe ma nla hôla we? Añ ñañ u Néhémia. (Néhémia, pes 2) I mbus gwélél man lipep inyu ôt pék le “Dieu a répondu à sa prière” inyu ôt biniigana mu ñañ u.

 Likeñge: I ngéda u nsômbôl añ Bibel, inyu boñ le u tibil nok yo, noode yén i homa a yé nwee.

 Pohol ñañ u Bibel wada tole hiémbi hiada, u añ, u ôt pék, i mbus u tehe lelaa u nla bii i mam u añ i bisélél. I ngéda u mal añ, badba mambadga mana le:

•    Inyuki Yéhôva a bi gwés le ba tila jam lini ikété Bibel?

•    Kii hala a niiga me inyu Yéhôva?

•    Lelaa yak me, me nla kôna nye?

 Likeñge: Bana ngim njômbi. Tila hilo u ngwés bôdôl añ Bibel u gwéélak ntjega di nléba i site yés internet.