Mardosa do Molo Marisap?

PANGOLU

Na didok Bibel

Memang dang hea didok di Bibel taringot marisap a manang mamakke tembakau. Alai dipaboa do di Bibel, dang lomo roha ni Debata molo taulahon akka ulaon na mambahen hita gabe marsahit. Jadi, mardosa do molo marisap.

Arga do ngolumuna. “Debata . . . mangalehon hangoluan, hosa, ro di saluhutna tu sude jolma.” (Ulaon ni Apostel 17:24, 25) Sian Debata do hangoluan. Jadi, dang olo hita mangulahon manang aha pe na mambahen hita hatop mate, umpamana marisap. Alana, godang do halak na mate alani marisap.
Haholongi ma donganmuna. “Ingkon haholonganmu do donganmu jolma doshon dirim.” (Mateus 22:39) Molo marisap hita, berarti na so holong do rohatta tu akka donganta. Alana molo jotjot sasahalak hona asap ni sigaret, boi do gabe sarupa sahit ni ibana tu halak na marisap i. Gariada umparah sian i.
Ikkon badia do hamu. “Pelehon hamu ma dirimuna gabe pelean na mangolu, na badia, jala na palashon roha ni Debata.” (Rom 12:1) “Tapaias ma dirinta sian angka na mambahen ramun pamatang dohot pingkiranta. Tahabiari ma Debata asa lam badia hita.” (2 Korint 7:1) Molo marisap sasahalak, na sengaja do ibana pamasukkon racun tu dagingna. Jadi, dang boi hita badia molo marisap.

Adong do disurat di Bibel dang boi hita marganja manang marnarkoba?

Memang dang adong disurat di Bibel taringot marganja manang marnarkoba. Alai, adong do prinsip di Bibel asa unang tapakke akka na boi mambahen hita gabe kecanduan. Taparrohahon ma hatorangan na di toru on:

Manjaga pikkiran asa toktong ias. Didok di Bibel, “Ingkon haholonganmu do Jahowa Debatam . . . sian nasa pingkiranmu.” (Mateus 22:37, 38) “Jaga hamu ma pingkiranmuna.” (1 Petrus 1:13) Molo marnarkoba sasahalak, dang boi ias pikkiranna. Gariada gabe kecanduan narkoba ma ibana. Jala holan marnarkoba ma na sai dipikkiri ibana, dang be mamikkirhon akka ulaon na denggan.—Pilippi 4:8.
Mangoloi pamarenta. Didok di Bibel, porlu do hita “unduk tu pamarenta dohot tu angka parhuaso”. (Titus 3:1) Di godang negara, dibahen do undang-undang na mangorai rakyatna asa unang mamakke narkoba dohot akka ubat na mambahen kecanduan. Jadi molo naeng tabahen las roha ni Debata, ikkon taoloi do aturan sisongon i.—Rom 13:1.

Pengaruh ni Marisap tu Kesehatan

Organisasi Kesehatan Dunia (WHO) paboahon, ganup taon adong hira-hira onom juta halak na mate ala mamakke tembakau. Termasuk ma disi lobi sian 600.000 halak na so marisap. Taida ma aha do pengaruh ni tembakau tu kesehatan ni na marisap dohot tu na hona asapna.

Kanker. Adong 50 zat karsinogenik di asap ni sigaret. On boi mambahen kanker. Encyclopædia Britannica paboahon, “adong 90 persen halak na hona kanker paru-paru” alani asap ni sigaret. Asing ni i, asap ni sigaret pe boi do mambahen halak hona kanker mulut, trakea, esofagus, tenggorokan, laring, hati, pankreas, dohot kandung kemih.

Marsahit pernapasan. Asap ni sigaret boi mambahen halak hona pneumonia (infeksi paru-paru) dohot flu. Molo jotjot dakdanak hona asap ni sigaret, olo do gabe hona asma, batuk kronis, jala sega paru-paruna.

Marsahit jantung. Molo marisap sasahalak, gabe mura ma ibana hona stroke manang marsahit jantung. Alana, karbon monoksida di asap ni sigaret mura do masuk sian paru-paru tu pembuluh darah. Gabe otik ma oksigen di pembuluh darah. Alani i, loja ma jantung mambagi oksigen tu dagingta.

Pengaruhna tu na hamil. Molo marisap halak na hamil, boi do gabe prematur anakna, dang normal berat badanna, adong cacatna, umpamana sumbing bibirna. Boi do muse sega saluran pernapasanna, manang boi gabe mate.

a Mangisap tembakau sian cerutu, pipa cangklong, manang shisha, termasuk do i marisap. Jala na dibahas dison termasuk ma mardemban, mangisap tembakau bubuk, mangisap rokok elektrik na adong nikotinna, manang mamakke akka produk sisongon i.