Jesus do ulu ni huria. (Epesus 5:23) Saonari sian surgo do Jesus mamimpin akka naposona, marhite “naposo haposan jala na marbisuk” na adong di tano on. (Jaha Mateus 24:45.) Jesus do na mamillit nasida. Jala dilehon ibana do hak tu nasida lao mambahen keputusan. Nang pe songon i, tetap do dioloi nasida Kristus jala rade do nasida mangurupi dongan sahaporseaonna. Ise do “naposo haposan” i? Jala songon dia do cara ni nasida mangurupi hita?

1. Ise do “naposo haposan jala na marbisuk” i?

Sian najolo, sai dipakke Jahowa do sahalak bawa manang sada punguan ni akka bawa lao mangalehon petunjuk tu akka naposona. (Maleaki 2:7; Heber 1:1) Dung mate Jesus, akka apostel dohot akka sintua na di Jerusalem do na mangarahon halak Kristen di tikki i. (Ulaon ni Apostel 15:2) Saonari pe, adong do sada punguan ni akka sintua na digoari Punguan na Mangaradoti Organisasi Saksi Jahowa. Nasida do na mangalehon sipanganon partondion jala na mangatur ulaon marbarita di liat portibi on. Punguan i ma ‘naposo haposan jala na marbisuk na pinillit ni Jesus’. (Mateus 24:45a) Sude anggota Punguan na Mangaradoti Organisasi i, i ma halak Kristen na dipillit marhite tondi parbadia. Dung marujung ngolu ni nasida di tano on, dipahehe Jahowa ma nasida lao mangolu di surgo. Jala nasida ma na lao mandongani Jesus mamaretta tu tano on.

2. Akka aha do sipanganon partondion na diparade naposo haposan?

Didok Jesus, naposo haposan i do na lao “mangalehon [dongan sahaporseaonna] mangan di tikkina”. (Mateus 24:45b) Molo taallang sipanganon, boi do i mambahen dagingta margogo jala tetap sehat. Dos songon i ma sipanganon partondion na marisi petunjuk na sian Hata ni Debata. Boi do i mangurupi hita asa tetap setia tu Jahowa, jala asa marhasil hita mangulahon tugas na dilehon Jesus tu hita. (1 Timoteus 4:6) Boi do tadapot sipanganon partondion i sian parpunguan, kebaktian, akka publikasi, dohot video. Sudena i mangurupi hita mangattusi lomo ni roha ni Jahowa, jala asa lam jonok hubungatta tu Ibana.

 ASA LAM TAATTUSI

3. Ikkon denggan do diatur naposo ni Jahowa

Punguan na Mangaradoti Organisasi do na mangatur ulaon ni Saksi Jahowa di liat portibi on. Jala diihutton nasida do petunjuk na sian Jesus. Songon i do halak Kristen di abad na parjolo diatur. Putar ma VIDEO.

Jaha 1 Korint 14:33, 40, dung i bahas ma sukkun-sukkun on:

• Hata na dia do sian ayat on na patuduhon, lomo roha ni Jahowa asa diatur akka Saksina?

4. Naposo haposan do na mangarahon ulaon marbarita na uli

Marbarita na uli do ulaon na paling penting na diulahon halak Kristen di abad na parjolo. Jaha Ulaon ni Apostel 8:14, 25, dung i bahas ma sukkun-sukkun on:

• Ise do na mangarahon ulaon marbarita di abad na parjolo?

• Aha do na diulahon si Petrus dohot si Johannes dung dijalo nasida petunjuk sian akka apostel na asing?

Marbarita na uli do ulaon na paling penting na diarahon Punguan na Mangaradoti Organisasi. Putar ma VIDEO.

 Dipaboa Jesus do boasa rikkot ulaon marbarita na uli i. Jaha Markus 13:10, dung i bahas ma sukkun-sukkun on:

• Boasa penting hian ulaon marbarita di Punguan na Mangaradoti Organisasi?

• Boasa ikkon diarahon “naposo haposan jala na marbisuk” hita tikki mangulahon ulaon on?

5. Dilehon naposo haposan do akka petunjuk

Dilehon Punguan na Mangaradoti Organisasi do akka petunjuk tu halak Kristen di liat portibi on. Boha do cara ni nasida mambahen petunjuk i? Taida ma boha do cara ni Punguan na Mangaradoti di abad na parjolo mambahen petunjuk. Jaha Ulaon ni Apostel 15:1, 2, dung i bahas ma sukkun-sukkun on:

• Masalah aha do na diadopi halak Kristen di abad na parjolo?

• Tu ise do si Paulus, si Barnabas, dohot akka dongan na asing mangido petunjuk lao pasaehon masalah i?

Jaha Ulaon ni Apostel 15:12-18, 23-29, dung i bahas ma sukkun-sukkun on:

• Aha do na diulahon Punguan na Mangaradoti di abad na parjolo asa boi nasida mambahen keputusan na sadalan tu lomo ni roha ni Jahowa?—Ida ayat 12, 15, dohot 28.

Jaha Ulaon ni Apostel 15:30, 31 dohot 16:4, 5, dung i bahas ma sukkun-sukkun on:

• Boha do perasaan ni halak Kristen di abad na parjolo dung manjalo petunjuk sian Punguan na Mangaradoti?

• Pasu-pasu aha do na dilehon Jahowa ala diihutton nasida petunjuk i?

Jaha 2 Timoteus 3:16 dohot Jakobus 1:5, dung i bahas ma sukkun-sukkun on:

• Sian dia do Punguan na Mangaradoti Organisasi saonari mangido petunjuk lao mambahen keputusan?

 KESIMPULAN

Punguan na Mangaradoti Organisasi do “naposo haposan jala na marbisuk” na dipillit Kristus. Nasida do na mangalehon petunjuk dohot sipanganon partondion tu halak Kristen di liat portibi on.

Tinjauan

• Ise do na mamillit “naposo haposan jala na marbisuk”?

• Boha do cara ni Punguan na Mangaradoti Organisasi mangurupi hita?

• Pos do rohamuna “naposo haposan jala na marbisuk” do Punguan na Mangaradoti Organisasi?