Akka suami istri naung mambahen komitmen manang janji, ikkon diingot nasida do perkawinan ni nasida i ikkon hot do salelengna. Molo dibahen nasida songon i boi ma sonang pakkilalaan ni nasida na dua. Gabe pos ma roha ni nasida tu dongan saripena, na jagaon ni nasida do perkawinan ni nasida i toktong togu nang pe adong masalah.

Adong do suami istri na toktong rap asa unang gabe kecewa keluargana dohot akka donganna. Alai dumenggan do molo toktong rap nasida ala na dipasangap nasida do dongan saripena jala dihaholongi nasida.

NA DIDOK BIBEL: “Sahalak suami pe, dang boi ditinggalhon ibana istrina.”​—1 Korint 7:11.

“Molo taingot do janji naung tabahen tu dongan saripetta dang mura be haccit rohatta. Gabe mura ma talupahon hasalaanna i jala hita pe olo ma minta maaf. Molo adong masalah taanggap ma i tantangan, dang na lao mambahen hita asa marsirang.”​—Si Micah.

Tikki adong masalah, suami istri na so adong komitmenna olo do gabe mandok, ‘Memang dang cocok hami.’ Dung i, gabe dilului nasida ma songon dia carana asa marsirang.

“Tikki naeng menikah, godang do halak na marpikkir molo dang bahagia annon perkawinan ni nasida, boi do nasida marsirang. On patuduhon na so adong do di nasida komitmen.”—Si Jean.

PIKKIRHON MA ON

Tikki adong masalah . . .

• Menyesal do hamu menikah tu dongan saripemuna?

• Gabe bawa manang borua na asing do na dipikkirhon hamu?

• Gabe olo do hamu mandok songon on, “Lao nama au” manang “Tumagon ma hulului halak na olo mangargai au?”

Molo songon i do pandapotmuna ikkon dipatogu hamu ma komitmenmuna sian mulai saonari.

DENGGAN MA ON HATAI HAMU

• Naung mulai lupa do hita tu komitmenta? Aha do mambahen songon i?

• Aha do na ikkon taulahon asa boi tapatogu muse komitmenta?

CARANA

• Bahen ma catatan na gelleng na paboahon holong do rohamuna tu dongan saripemuna i

• Bahen ma foto ni dongan saripemuna di meja karejomuna

• Tikki karejo hamu manang dao hamu sian dongan saripemuna, telepon ma ibana ganup ari

NA DIDOK BIBEL: “Naung dipasada Debata, dang boi sirangon ni jolma.”—Mateus 19:6.