Diida sahalak dakdanak ma kaluar timus na songon ombun sian sada pabrik. Gabe dirimpu ibana ma pabrik i mambahen ombun. Nang pe sala mangantusi ibana, mengkel do hita mamboto i. Alai, molo sala pangantusion ni halak naung magodang, balga do pangkorhonna tu parngoluon. Umpamana, molo sala hita manjaha tudutudu na adong di bungkus ni ubat, boi do parohon jea.

Umbalga dope pangkorhonna molo sala pangantusionta di partondion. Umpamana, pigapiga halak sala mangantusi ajaran ni Jesus. (Johannes 6:48-68) Ujungna, gabe ndang olo be nasida manangihon hata ni Jesus. Rugi ma nasida!

Ringgas do hamu manjaha Bibel? Sipujion do hamu molo mangulahon i. Alai parohon jea do molo sala mangantusi hita tingki manjaha Bibel? On ma na dihilala godangan halak. Taparrohahon ma tolu pangantusion ni halak na sala.

• Pigapiga halak sala mangantusi ayat ni Bibel na mandok, ”Habiari Debata.” Dirimpu nasida, ingkon mabiar hita tu Debata. (Parjamita 12:13) Alai, ndang lomo roha ni Debata hita manomba Ibana ala na mabiar tu Ibana. Didok Ibana do, ”Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho.” (Jesaya 41:10) Sasintongna lapatan ni ayat i, asa tapasangap do Ibana.

• Pigapiga halak sala mangantusi ayat na mandok, ”Martingki be do luhutna . . . na tubu dohot na mate.” Dirimpu nasida, nunga ditontuhon Debata sadihari parmate ni sasahalak. (Parjamita 3:1, 2) Sasintongna ayat on mangulas taringot ulaon ni jolma na somal diulahon siganup ari. Jala Bibel paboahon, mangkorhon do na taulahon tu ganjang ni umurta. Umpamana, didok do ”Mangoloi Jahowa, I do paganjangkon umur.” (Poda 10:27, Bibel siganup ari; Psalmen 90:10; Jesaya 55:3) Aha do lapatanna? Molo taihuthon hata ni Debata, taronjar ma rohanta pasidingkon angka ulaon na mambahen hita marsahit songon mabuk dohot mangulahon parmainanon.—1 Korint 6:9, 10.

• Pigapiga halak sala mangantusi tingki manjaha ayat na mandok, langit dohot tano on ”dipeop do, asa tu api”. Gabe dirimpu nasida do na laho tutungon ni Debata tano on. (2 Petrus 3:7) Alai didok Bibel do, ”Nunga dipaojak Ibana tano on tu angka ojahanna i, asa unang lalolalo salelenglelengna.” (Psalmen 104:5; Jesaya 45:18) Sasintongna, pamarentaon ni jolma na sursar do na laho diropukhon, ndang na tano on na laho ditutung manang ropukhononNa. Songon i do nang hata surgo boi do i patuduhon langit, inganan ni angka bintang dohot inganan ni Debata. Sudena i, ndang na laho salpuhononna.

Songon na taida sian hatorangan nangkin, jotjot do halak sala mangantusi isi ni Bibel. Alai boasa on dipaloas Debata? Olo do pigapiga halak mandok, ’Molo tutu do marbisuk Debata jala umboto saluhut, boasa ndang bahenonNa Bibel on boi mura diantusi saluhut halak? Taparrohahon ma boasa.

1. Holan angka halak na serep marroha jala na olo marsiajar do na boi mangantusi isi ni Bibel. Didok Jesus do tu Amana ”Hupuji Ho, Amang, Tuhan Sigomgom banua ginjang dohot  tano on, ala ditamondingkon Ho i sian jolo ni angka na pistar dohot na marroha, gabe dipapatar Ho i tu angka [na so parsingkola].” (Lukas 10:21) Tingki disurat Bibel, dibahen do asa holan halak na marserep ni roha na boi mangantusi. Molo ginjang roha ni ”angka na pistar dohot na marroha”, ndang boi nasida mangantusi isi ni Bibel. Alai molo serep do roha ni sasahalak nang pe ndang parsingkola, boi do ibana mangantusi hata ni Debata. Bagas situtu bisuk ni Debata tingki mambahen Bibel!

2. Holan angka halak na mangido pangurupion ni Debata do na boi mangantusi isi ni Bibel. Tangkas do dipaboa Jesus, dihaporluhon do pangurupion laho mangantusi ajaranna. Sian dia didapot pangurupion i? Didok Jesus ma, ”Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu!” (Johannes 14:26) Dilehon Debata do tondi parbadia laho mangurupi hita mangantusi isi ni Bibel. Alai ndang lehonon ni Debata tondi parbadia tu halak na so mangasahon Ibana, gabe songon sada hahomion ma Bibel di nasida. Jala ditogutogu Debata do naposoNa laho mangurupi halak na mauas male tu hasintongan.—Ulaon ni Apostel 8:26-35.

3. Holan angka halak na mangolu di sadasada tingki do na boi mangantusi pigapiga ayat ni Bibel. Umpamana, disurat si Daniel do barita taringot ari na naeng ro. Didok sada surusuruan tu ibana, ”Daniel! Tabunihon ma angka hata i, jala sahapi pustaha i, paima jumpang tingki panimpuli.” Saleleng marratus taon, godang do halak na so mangantusi tingki manjaha surat ni si Daniel. Gariada, si Daniel sandiri pe ndang mangantusi na sinuratna. Diakkui ibana do, ”Hubege do nian hata i, alai ndang dapot rohangku.” Diantusi do ujungna surirang na disurat si Daniel, alai holan angka halak na mangolu di tingki naung ditontuhon Debata do na boi mangantusi. Songon na dipatorang sada surusuruan, ”Laho ma ho, ale Daniel! Ai ingkon buni jala tarsahap angka hata i sahat ro di tingki panimpuli.” Ise ma na boi mangantusi hata ni Debata? Ndang boi antusan ni ”halak parjahat i; alai anggo halak na marroha i antusanna ma i.” (Daniel 12:4, 8-10) I do alana, ndang diantusi angka halak pigapiga ayat di Bibel sahat tu na jumpang tingki na ditontuhon Debata.

Hea do Sitindangi Ni Jahowa sala mangantusi isi ni Bibel? Hea. Alai olo do nasida pahombarhon parbinotoannasida tu pangantusion na lam tangkas sian Debata. Pos do rohanasida mangihuthon angka sisean ni Jesus na serep roha jala olo muba dung dipasingot Jesus.—Ulaon ni Apostel 1:6, 7.

Ndang apala balga pangkorhon ni pangantusion ni dakdanak na sala mangantusi taringot haroro ni ombun i. Alai balga do pangkorhon ni na diajarhon Bibel tu hita. Ringkot situtu do antusan ni sude halak isi ni Bibel na dijaha nasida. Alani i, lului ma pangurupion laho mangantusi isi ni Bibel. Lului ma pangurupion sian halak na serep marroha, na mangido pangurupion ni Debata dohot angka halak na mangantusi saonari ma tingki naung ditontuhon Debata laho mandapot gumodang pangantusion sian isi ni Bibel. Pangido ma pangurupion tu Sitindangi Ni Jahowa manang ida ma hatorangan di situs jw.org/bbc. Didok Bibel do, ”Pola tung joujou ho mangido pangantusion . . . , antusanmu ma biar mida Jahowa.”—Poda 2:3-5.