Molo taboto songon dia parange ni sasahalak, lam tatanda ma ibana, jala lam solhot ma hita tu ibana. Suang songon i ma tu Debata. Molo taboto angka parangena, lam tatanda ma Ibana, jala lam solhot ma hita tu Ibana. Sian sude parange ni Debata, adong opat na umjotjot dipatudu Ibana, i ma huaso, bisuk, tigor, dohot holongna.

“Tuhan Jahowa, ida ma nunga dijadihon ho angka langit dohot tano on marhitehite hagogoonmu na godang i.”​—JEREMIA 32:17.

Boi do taida huaso ni Debata sian angka tompaanna. Umpamana di tingki arian, tahilala do las ni mata ni ari. Sasintongna, suhu ni mata ni ari hira-hira 15.000.000°C. Sadetik energi mata ni ari, dos songon marratus juta energi bom nuklir. Jadi mata ni ari ma sada bukti huaso ni Jahowa.

Alai gelleng do mata ni ari molo dibandingkon tu martriliun bintang na asing. Angka ilmuwan mandok, ra bintang UY Scuti ma bintang na umbalga. Balga ni bintang on 1.700 hali sian balga ni mata ni ari. Jadi molo dibahen bintang UY Scuti on tu posisi ni mata ni ari, gabe sahat do balgana tu parputaran ni planet Jupiter. Ra on mangurupi hita gabe mangantusi hata ni si Jeremia na mandok, Jahowa do na manompa angka langit dohot tano on, ala mansai balga do huasona.

 Aha do laba ni huaso ni Debata tu hita? Ala ditompa Debata do mata ni ari dohot sude na adong di portibi on, gabe boi ma hita mangolu. Asing ni i, dipangke Debata do huasona laho mangurupi jolma. Umpamana di abad na parjolo, dilehon Debata do huaso tu Jesus laho mambahen mukjizat. Didok di Bibel, “Na mapitung boi marnida, na pangpang boi mardalan, na hona kusta dipamalum, na nengel marbinege, na mate dipangolu.” (Mateus 11:5) Di tingkinta saonari, dilehon Debata do “gogo tu angka na loja”. Jala didok Bibel muse, “Angka halak na tongtong marhaposan tu pangurupion ni Jahowa, sai tongtong do dipaimbaru gogonasida.” (Jesaya 40:29, 31, Bibel siganup ari) Boi do dilehon Debata ‘gogo na sumurung’ tu hita tingki mangadopi angka parsoalan na adong di ngolunta. (2 Korint 4:7) Jadi alani holong ni Debata, dipangke Ibana do huasona laho mangurupi hita. Las do rohamuna molo marale-ale tu Debata?

“Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran.”​—PSALMEN 104:24.

Lam godang taparsiajari taringot tompaan ni Debata, lam taboto ma bisukna. Umpamana, adong do sada kelompok ilmuwan na digoari biomimetik manang biomimikri. Nasida meneliti angka tompaan. Ditiru nasida do bentuk ni angka tompaan i laho mambahen angka barang. Umpamana songon bentuk ni baut dohot bentuk ni pesawat pe, na maniru tompaan ni Debata do i.

Tarida do bisuk ni Jahowa sian pamatang ni jolma. Umpamana, songon dia boi gabe adong pese-pese. Di mulana, holan sada sel do i. Di bagasan sel i adong instruksi genetik, on ma annon na membentuk angka organ tubuh. Dung i, na sada sel i gabe godang ma, alai songon na sarupa do bentukna. Lam leleng, gabe marasing-asing do bentukna. Adong na gabe sel darah, sel saraf, dohot sel tulang. Dung i, angka sel i terbentuk gabe angka organ tubuh. Jala dung sia bulan nunga marmiliar sel i, jala nunga gabe pese-pese. Alani bisuk ni Jahowa i, tontu satolop do hita tu na disurat di Bibel, “Mandok mauliate ma ahu tu Ho ala ni surung ni pambahenmu di ahu.”​—Psalmen 139:14.

Aha do laba ni bisuk ni Debata tu hita? Diboto Debata do songon dia asa boi hita marlas ni roha. Ala gok do parbinotoan ni Debata, dilehon Ibana do poda na denggan sian Bibel. Umpamana, didok do di Bibel, “Tongtong ma . . . rade ma hamu manalpuhon hasalaan ni nasida.” (Kolosse 3:13) Poda na denggan do i. Angka dokter pe mandok, molo tasalpuhon hasalaan ni halak gabe tabo ma hita modom jala ndang darah tinggion. Gabe ndang stres hita manang marsahit. Jadi dos do Debata songon donganta na marbisuk, na sai mangalehon poda na denggan tu hita. (2 Timoteus 3:16, 17) Lomo do rohamuna molo adong donganmuna na songon i?

“Holong do roha ni Jahowa mida uhum.”​—PSALMEN 37:28.

Sai tigor do sude na diulahon Debata. Didok do di Bibel, “Dao ma sian Debata anggo hajahaton, jala dao sian Nasunhinagogo i uhum hageduhon!” (Job 34:10) Tigor do carana manguhumi, songon na didok di buku Psalmen taringot Jahowa, “Tigor panguhummu di angka bangso.” (Psalmen 67:5) Na di bagasan roha do na diida Jahowa, jadi ndang boi Ibana dioto-otoi. Diboto Ibana do dia na sintong jala sai denggan do keputusan na dibahen. (1 Samuel 16:7) Jala ndang lomo roha ni Jahowa mangida hajahaton na masa di portibi on. I do alana marjanji do Ibana, “Anggo halak parjahat siap sian tano on.”​—Poda 2:22.

Alai ndang na kejam Debata, jala ndang lomo rohana laho manguhum sasahalak. Olo do Ibana patuduhon asi ni roha. Bibel mandok, “Parasi roha jala pardengganbasa do Jahowa”. Dipatudu Debata do asi ni roha tu halak na jahat molo olo nasida muba. Jala i do cara na tigor laho manguhumi.​—Psalmen 103:8; 2 Petrus 3:9.

Aha do laba ni hatigoran ni Debata tu hita? Apostel Petrus mandok, “Na so marimbar jolma di jolo ni Debata. Alai dihalomohon Debata do ganup halak na mangkabiari Ibana jala na mangulahon na sintong, sian bangso na dia pe nasida.” (Ulaon ni Apostel 10:34, 35) Ala ndang olo Debata paimbar-imbarhon halak, gabe adong ma labana tu hita. Ndang gabe soal di Jahowa halak aha pe hita, sadia timbo singkolanta, mamora manang pogos. Boi do hita jonok tu Ibana jala gabe naposona.

Lomo do roha ni Debata asa taantusi jala tadapot laba sian hatigoranna. Alani i, dilehon ma tu hita panggora ni roha. Di Bibel didok do panggora ni roha i songon patik na ‘tarsurat di rohanta’, na boi ‘mangurupi hita mamboto na sintong  manang na sala’. (Rom 2:15) Aha do laba ni i tu hita? Molo talatik panggora ni roha i, gabe ndang olo hita mangulahon na sala. Molo taulahon na sala, panggora ni roha i ma na paingothon hita, jala mambahen hita asa olo muba. Jadi molo taantusi hatigoran ni Debata, gabe diurupi ma hita jala solhot ma hita tu Ibana!

“Holong do Debata.”​—1 JOHANNES 4:8.

Nunga taboto molo Debata i marhuaso, marbisuk jala tigor. Marhite huasona, boi do Ibana mangulahon manang aha pe. Sai marbisuk do Ibana jala tigor do carana mangulahon manang aha pe. Alai, ndang adong didok di Bibel molo Debata i huaso, bisuk manang tigor. Bibel mandok holong do Debata. Boasa? Ala holong do na mambahen Ibana patuduhon angka parangena i. Jadi sian sude na diulahon Debata, tarida do holongna.

Sasintongna, ndang hurangan agia aha Jahowa. Alai alani holongna, ditompa Ibana ma angka suru-suruan di surgo dohot jolma di tano on, asa boi nasida marlas ni roha. Jala dibahen Debata do denggan portibi on asa boi taingani. Jala dipatudu Ibana do holongna tu sude jolma. “Dipabinsar Ibana do mata ni ari tu angka parjahat dohot tu na burju. Jala diparo do udan tu halak na mangulahon na sintong dohot tu halak na mangulahon na jahat.”​—Mateus 5:45.

Jala didok do, “Na parholong do Jahowa jala parasi roha.” (Jakobus 5:11) Dipatudu Ibana do holong tu angka halak na olo mananda Ibana jala na naeng marale-ale tu Ibana. Diparrohahon Debata do hita ganup marsada-sada. Sasintongna didok di Bibel, “Disarihon do hamu.”​—1 Petrus 5:7.

Aha do laba ni holong ni Debata tu hita? Las do rohanta tingki mangida bonom mata ni ari. Las do rohanta mambege engkel ni pese-pese. Jala las do muse rohanta ala adong keluarganta na mangkaholongi hita. Tutu, ndang i na mambahen hita mangolu, alai boi do gabe tamba las ni roha molo tahilala i sude.

Alani holong ni Debata, olo do Ibana manangihon hita marhite tangiang. Didok do di Bibel, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon.” Dos do Ibana songon sahalak ama na parholong. Lomo do rohana molo tapangido pangurupionna tingki adong parsoalanta. Jala marjanji do Jahowa, lehononna ma tu hita “hadameon na so boi diantusi jolma”.​—Pilippi 4:6, 7.

Nunga taulas taringot angka parange ni Debata. Marhuaso do Ibana, marbisuk, tigor, jala parholong. Tontu angka parange on mangurupi hita asa lam mananda Debata. Alai, asa lam tatanda muse Debata, taulas ma taringot aha naung diulahon Ibana jala aha na laho bahenonna tu hita.