LOBI sian 3.000 taon naung salpu, didapot si Job do parsiajaran sian angka tompaan ni Debata, umpamana angka pidong na di langit. Na somal diulahon angka pidong boi dibahen gabe tudosan. Di Bibel, godang do taringot pidong na di langit na mangajarhon angka na ringkot tu hita taringot hangoluan dohot paralealeonta tu Debata. Taida ma pigapiga umpama.

Di Jerusalem, jotjot do halak mangida leangleang, ala somalna di toru ni atap ni jabu do asarna. Asing ni i, adong do na mambahen asarna di bagas joro ni si Salomo. Angka pidong on, na ganup taon marasar di bagas joro, boi ma tarlinggomi jala boi denggan maranak.

Panurat buku Psalmen 84, i ma sada sian anak ni si Korah na marhobas di bagas joro saleleng saminggu ganup onom bulan. Hea do disurat ibana taringot asar ni leangleang i. Lomo rohana songon leangleang na tongtong tading di bagas ni Jahowa. Didok ibana, ”Dengganna i angka ingananmi, ale Jahowa Zebaot! Pola do langan jala maras rohangku dibahen lungunna di angka alaman ni Jahowa. . . . Gari amporik jumpangan jabu, jala leangleang dapotan asarna bahen inganan ni angka anakna, mandok: Angka langgatan pamelean tu Ho, ale Jahowa Zebaot, Rajangku dohot Debatangku.” (Psalmen 84:2-4) Lomo do rohanta dohot ianakhonta ringgas ro tu parpunguan jala marsada di huria?​—Psalmen 26:8, 12.

Panurirang Jeremia manurat, ”Pidong siboru tasik na martongatonga langit, diboto do tingkina.” Tangkas do diboto ibana taringot siboru tasik na jotjot pinda tu Tano Kanaan. Tingki musim semi, lobi sian 300.000 siboru tasik na bontar pinda sian Afrika tu Eropa Utara manaripari Rura Jordan. Jam biologis ni siboru tasik paingothon nasida asa mulak tu asarna tingki musim panas. Songon pidong na asing na jotjot pinda, ”diboto [siboru tasik] do tingkina laho mulak”.​—Jeremia 8:7, Bibel siganup ari.

Buku Collins Atlas of Bird Migration mandok, ”Adong do haboion ni pidong, na mambahen nasida boi pinda.” Dilehon Jahowa do haboion tu angka pidong na jotjot marpindapinda asa mamboto musim, alai dilehon do tu jolma haboion laho mamboto musim dohot tingki. (Lukas 12:54-56) Ndang songon pidong siboru tasik, parbinotoan taringot Debata do na gabe ojahan ni jolma laho mangantusi aha na masa di tingkinta saonari. Di tingki ni si Jeremia, ndang dilehon bangso Israel rohanasida tu angka na laho masa. Dipaboa Debata do alana, ”Nunga tung  dibolongkon nasida hata ni Jahowa, tung hapistaran dia ma di nasida?”​—Jeremia 8:9.

Saonari, godang do bukti na patuduhon molo hita mangolu di ”tingki parpudi”, songon na didok di Bibel. (2 Timoteus 3:1-5) Tatiru do siboru tasik jala talehon do rohanta tu angka na laho masa?

Jotjot do lali dipaboa di Bibel, jala jotjot do i diida di Tano Kanaan. Sian asarna na timbo di punsu ni dolok, dilului ibana do sipanganonna. Jala didok Bibel, boi do ibana manatap sian inganan na mansai dao. (Job 39:27-29) Ala mansai tajom do parnidaanna, boi do diida ibana kelinci sian jarak 1 kilometer.

Songon lali na boi manatap sian inganan na mansai dao, Jahowa pe boi do mangida ari na naeng ro. Nunga didok Jahowa, ”Ahu palumbahon hian sian mulamula ujungna sogot, ahu marboaboa sian na robi na so masa dope.” (Jesaya 46:10) Molo taihuthon poda ni Jahowa, tadapot ma laba sian habisukon dohot sian huasoNa.​—Jesaya 48:17, 18.

Di Bibel, dipatudos do naposo ni Debata tu lali. Didok, ”Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek.” (Jesaya 40:31) Asa boi timbo habang, dipangke lali do termal manang lintasan naik udara hangat. Tingki didapot lali termal on, dipahembang ma habongna jala dipapungu ma alogo i di toru ni habongna asa lam timbo ibana habang. Ndang mangasahon gogona sandiri lali tingki habang tu inganan na dao. Suang songon i ma nang halak na porsea tu Jahowa, boi do mangkilala ”hagogoon na sumurung” na dijanjihon Ibana.​—2 Korint 4:7, 8.

Andorang so mate, diida Jesus do Jerusalem. Didok ibana, ”Jerusalem! Jerusalem! Dibunu ho do angka panurirang jala didangguri ho do angka na sinuru manopot ho.” Didok muse, ”Nunga piga hali naeng papunguonku do nian angka anakmi, sobokkon pidong na papunguhon anakna tu toru ni habonghabongna; alai ndang dung olo hamu!”​—Mateus 23:37.

Taringot mangalinggomi anakna, unggas ma na dumenggan sian binatang na asing. Sada sian angka unggas, i ma manuk, na tongtong jaga tingki adong musu. Molo adong lali na habang di ginjangna, pintor markeok do ibana. Pintor hatop ma angka anakna marlinggom di toru ni habongna. Anak ni manuk na metmet, boi do diondingi sian mohop ni ari dohot sian udan. Songon i do nang Jesus, lomo rohana mangalehon parlinggoman di partondion tu halak Jerusalem. Saonari pe, ditogihon Jesus do hita asa mandapot hasonangan jala diondingi sian hasusaan na taadopi ganup ari.​—Mateus 11:28, 29.

Tutu ma, godang do na boi taparsiajari sian angka pidong on. Huhut taparrohahon parange ni nasida, rimangi ma angka ayat ni Bibel na paboahon taringot nasida. Songon leangleang, tongtong ma hita mangargai pangkobasionta di bagas ni Jahowa. Marhaposan ma hita tu Debata, na mangurupi hita habang songon lali. Boi ma muse hita porsea tu Jesus na mangalinggomi hita songon induk ni manuk. Siboru tasik paingothon hita asa tongtong dungo jala sai jaga mangida angka na masa di portibi on saonari.