Diajari Jesus do akka halak asa mardame tu na asing. Hape di sada tikki hea do didok ibana tu akka apostelna, “Unang dirippu hamu na mamboan dame au ro tu tano on. Dang na mamboan dame au ro, alai mamboan podang do. Mambahen parbadaan do au ro, sahalak bawa mangalo bapakna, sahalak borua mangalo omakna, jala parumaen mangalo simatuana boru.” (Mat. 10:34, 35) Aha do maksud ni Jesus disi?

Dang lomo roha ni Jesus molo marbadai akka anggota keluarga. Alai diboto Jesus do molo ajaranna boi mambahen akka keluarga dang marsada. Alani i, molo adong halak na naeng gabe sisean ni Jesus jala tardidi, ikkon diingot ibana do sai adong do anggota keluargana na menentang keputusanna i. Boi do ro tantangan i sian pasanganna na so sahaporseaon manang sian anggota keluargana na asing. Tantangan on boi mambahen sasahalak gabe maol mangihutton ajaran ni Jesus.

Didok di Bibel, ikkon ‘mardame do halak Kristen tu sude halak’. (Rom 12:18) Alai sipata songon “podang” do ajaran ni Jesus i. Adong do anggota keluarga na olo mangihutton ajaran ni Jesus, alai na asing dang olo bahkan menentang. Di tikki sisongon i ma anggota keluarga na menentang i, gabe hira “musu” di halak na marsiajar Bibel.​—Mat. 10:36.

Molo adong sahalak Saksi Jahowa na tinggal rap dohot keluargana na so sahaporseaon, sai adong do situasi na maol na manguji holongna tu Jahowa dohot tu Jesus. Contohna, tikki anggota keluargana i mangarayahon perayaan na maralo tu prinsip ni Bibel. Di tikki sisongon i ikkon diputusson ibana do naeng pasonakkon roha ni Jahowa manang roha ni keluargana. Jesus mandok, “Manang ise na umbalga holongna tu bapakna manang tu omakna sian apala tu au, dang cocok ibana gabe siseanku.” (Mat. 10:37) Dang na berarti asa cocok sasahalak gabe sisean ni Jesus, dang porlu dihaholongi ibana natua-tuana. Alai na lao diajarhon Jesus, ikkon diboto sasahalak do manottuhon dia na uppetting di ngoluna. Nang pe ikkon tetap tahaholongi anggota keluargatta, alai molo ditentang nasida ibadatta tu Jahowa, ikkon tapatudu do na umbalga holongta tu Jahowa.

Memang haccit hian do rohatta molo mandapot tantangan sian keluarga. Alai taingot ma hata ni Jesus na mandok, “Manang ise na so manuhuk hau partinaonanna jala dang diihutton ibana au, dang tama ibana gabe siseanku.” (Mat. 10:38) Molo naeng gabe sisean ni Jesus sasahalak, ikkon siap do ibana mangadopi tantangan sian keluarga. Nang pe songon i, ikkon torus do berupaya ibana patuduhon pangalaho na denggan. Anggiat sada tikki muba anggota keluargana i jala olo marsiajar Bibel alani pangalahona na denggan i.​—1 Ptr. 3:1, 2.