Sada organisasi na terkenal di Inggris, mamuji Saksi Jahowa. Alana boi do nasida mangalatik akka borua lao mamakke alat-alat berat tikki mambangun kantor cabang ni Saksi Jahowa jonok ni kota Chelmsford, Essex. Organisasi Considerate Constructors Scheme * (CCS) mandok, cara na baru do na binahen ni akka Saksi i. Alani i, dilehon organisasi i ma nilai 10 tu Saksi, i ma nilai na umtimbo. Boasa boi songon i?

Di Inggris, dang sampe 13 porsen borua na olo karejo di proyek pembangunan. Menurut survei, otik do borua na poso na olo karejo di proyek pembangunan. Alai di proyek pembangunan di Chelmsford on, 40 porsen parkarejona borua do. Jala 60 porsen sian nasida mamboan alat-alat berat.

Boasa boi akka borua i mangulahon i? Ala nungnga dilatik nasida jala diurupi. On ma dua faktor na dinilai CCS tikki karejo. Dua faktor on ma mangonjar roha ni akka parkarejo asa “mangargai donganna, marsiurupan, burju tu donganna jala mambahen pelatihan.”

Sahalak borua na margoar si Jade, dilatik mamakke traktor dohot mamboan truk. Didok ibana, “Luar biasa do on! Dang hurimpu boi huboan sisongon i. Memang dang mura mamboan on, alai gabe tamba do pengalamanku.” Si Lucy pe, disuru do mamboan alat berat. Didok ibana, “Tikki parjolo sahali au ro, dang adong dope huboto manang aha. Alai dung sahat dison, pittor dilatik do au. Jala nungnga hea au karejo di 5 tim na marasing-asing. Jadi godang do na boi huparsiajari!”

Dang holan mamakke mesin na diboto akka borua i. Sahalak pengawas na margoar si Eric mandok, “Ummalo do akka borua merawat akka peralatan sian bawa. Jala molo adong mesin na sega, pittor diboto nasida do jala pittor dipaboa.”

Si Carl na mengawasi tim alat berat mandok, “Longang do rohakku mangida akka borua on, ala malo do nasida mamakke alat-alat berat. Sipata, umlomo do rohakku molo borua na mamboan alat berat i unang apala bawa nang pe naung marpengalaman!”

Lam tamba do pos ni roha ni nasida tikki didukung akka pengawas. Songon i ma na dihilala si Therese. Ala nungnga karejo saleleng on, gabe diboto ibana ma, ikkon adong do kerja sama na denggan antara pengawas dohot parkarejo asa boi denggan mamakke alat-alat berat i. Didok ibana, “Molo didukung pengawas au, gabe lam denggan do huhilala karejokku. Ala pos do roha ni nasida tu au. Las do rohakku molo diargai halak na asing karejokku!”

Si Abigail, mamboan traktor dohot truk. Las do rohana ala didukung jala marsiurupan. Didok ibana, “Dang leas roha ni akka baoa dison tu au. Pos do roha ni nasida tu au. Jala sai rade do nasida mangurupi.”

Asing ni mamboan alat berat, dilatik do akka borua on tu akka karejo na asing. I ma lao mangukur bolak ni tano, paturehon mesin jala mamasang perancah. Si Robert, na jotjot karejo dohot akka borua mandok, molo nasida “serius, ringgas jala teliti”. Si Tom, na karejona mangukur mandok, “Akka borua na rap karejo dohot au, teliti jala ringgas. Marsitutu do nasida asa pas sude ungkuranna.”

Sahalak pengawas Proyek na margoar si Fergus mandok, “Massai rikkot do pangurupion ni akka borua di proyek pembangunan on!”