Fluwa klikli nga Piɛli klɛli’n 5:1-14
5 I sɔ’n ti’n, kɛ mɔ n ti asɔnun kpɛnngbɛn wie’n, mɔ kɛ Klisi wún ɲrɛnnɛn’n n wunnin nun wie’n, mɔ kɛ be nga be kpali be’n bé ɲán ɲrun’n, n kusu ń ɲán ɲrun wie’n ti’n,+ ń kán ndɛ yɛ’n ń klé asɔnun kpɛnngbɛn nga be nin amun o’n:
2 An nian Ɲanmiɛn i bua fa+ m’ɔ fa wlali amun sa nun’n i lika. An nian su kpa. Nán maan ɔ yo kɛ be su mian amun sa, sanngɛ maan amun yo i sɔ amun klunklo su, Ɲanmiɛn ɲrun.+ Nán maan ɔ yo kɛ amun kunndɛ kɛ amún ɲán nun like,+ sanngɛ amun tu amun klun be yo.
3 Asa ekun’n, nán an tin Ɲanmiɛn i sran m’ɔ fa be wlali amun sa nun’n be su,+ sanngɛ an yo sa ng’ɔ ti kpa’n naan be nian su.+
4 I liɛ’n, kɛ bé wá yí bua tafuɛ’m be su kpɛn’n+ i nglo’n, bé fá famiɛn kle m’ɔ bo mianmianmian’n, m’ɔ saciman’n, bé mán amun.+
5 I wafa kunngba’n, gbanflɛn mun, maan amun ɲin yi kpɛnngbɛn mun.*+ Maan amun kwlaa amun lo amun wun man amun wiengu.* Afin Ɲanmiɛn nin be nga be tu be wun’n be lɛ i. Sanngɛ ɔ yo wun ase kanfuɛ’m be ye.+
6 I sɔ’n ti’n, an kan amun wun ase Ɲanmiɛn m’ɔ kwla like kwlaa yo’n i bo, naan sɛ i blɛ’n ju’n w’a man amun su.+
7 Yɛ an fa amun su sa’n* kwlaa wlɛ i Ɲanmiɛn sa nun,+ afin amun ndɛ lo i.+
8 An yo akunndanfuɛ titi, an nian amun wun su kpa!+ Afin Suɛn Tɔnfuɛ m’ɔ ti amun kpɔfuɛ’n, ɔ ti kɛ asɔmɔli m’ɔ wlanwlan sin m’ɔ kpan’n sa. Ɔ kunndɛ kɛ ɔ́ dí sran.*+
9 Sanngɛ maan amun jrɛn i ɲrun kekle,+ an lafi Ɲanmiɛn su kpa. Afin amun si kɛ ɲrɛnnɛn kunngba ng’ɔ o amun su’n, ɔ o amun niaan kwlaa nga be o mɛn wunmuan’n nun’n be su wie.+
10 Sanngɛ kɛ amun ko fɛ kan’n, Ɲanmiɛn m’ɔ ti aklunyefuɛ dan’n, m’ɔ flɛli amun kɛ amun nin Klisi be kaci sran wunmuan’n naan amun ɲan ɲrun tititi’n,+ i bɔbɔ ɔ́ gúa amun like klelɛ’n i bo. Ɔ́ yó maan amún yó yakpafuɛ,+ ɔ́ yó maan amún ɲán wunmiɛn,+ yɛ ɔ́ yó maan amún jrán kekle.
11 Maan kwlalɛ’n yo i liɛ tititi. Maan ɔ yo sɔ.
12 Silvɛn*+ m’ɔ ti Ɲanmiɛn sufuɛ kpa’n yɛ n seli i kɛ ɔ klɛ ndɛ kan nga naan be fa ko man amun-ɔn. N klɛli ndɛ sɔ’n kɛ ń fá wlá amun fanngan, naan ń sé amun kɛ Ɲanmiɛn w’a yo amun ye dan sakpa. Maan amun tra ye sɔ’n i kekle kpa.
13 Bla* ng’ɔ o Babilɔnin wa mɔ be kpɛli i sieli kɛ amun sa’n, ɔ́ yó amun like. Min wa Marki+ kusu yó amun like wie.
14 Maan amun yo amun wiengu like aklunjɔɛ su.
Maan amun kwlaa nga amun nin Klisi o nun’n amun wun jɔ amun fɔuun.
Ja ngua lɔ ndɛ mun
^ Annzɛ “asɔnun kpɛnngbɛn mun.”
^ Annzɛ “an fa be wun ase kanlɛ’n wla amun wun kɛ tralɛ sa.”
^ Annzɛ “ngokɔɛ’n.”
^ Annzɛ “Ɔ su kunndɛ sran naan ɔ́ dí i.”
^ Be flɛ i ekun kɛ Silasi.
^ Atrɛkpa’n “bla” sɔ’n yɛle asɔnun kun i nunfuɛ mun.
