Zɔbu 42:1-17
42 Yɛ Zɔbu tɛli Zoova su kɛ:
2 “Siɛn’n, n si kɛ a kwla like kwlaa yo.Ɔ leman like kun mɔ a klo kɛ á yó mɔ a kwlá yoman-ɔn.+
3 A seli kɛ: ‘?Wan yɛ ɔ siman like fi mɔ sanngɛ ɔ sanngan ajalɛ nga n fali’n nun-ɔn?’+Nanwlɛ, n ijɔli sanngɛ m’an wunmansa wie’m be wlɛ, be tra min kpɛn. N siman nun ndɛ.+
4 A seli kɛ: ‘Yaci, sie ɔ su maan n kan ndɛ.Ń má úsa ɔ sa, nga n simɛn i’n, kan kle min.’+
5 Ɔ su ndɛ’n guali min su’n nun,sanngɛ siɛn’n, min ɲinma’n wun wɔ.
6 I sɔ’n ti’n, n su kanman sɔ kun.+Maan n tran ndutre’n nin nzuɛn’n nun, ndɛ nga n kannin’n yo min nsisɔ.”+
7 Kɛ Zoova kannin ndɛ sɔ mun kleli Zɔbu’n, Zoova wa seli Elifazi m’ɔ ti Temanfuɛ’n kɛ:
“M’an fa wɔ nin ɔ janvuɛ nɲɔn mun amun wun ya dan kpa.+ Afin min su ndɛ nga amun kannin’n timan nanwlɛ+ kɛ Zɔbu m’ɔ ti min sufuɛ’n i liɛ’n sa.
8 I sɔ’n ti, amun fa nannin tola nso nin bua ɲin nso naan amun ko to min sufuɛ Zɔbu lɔ. Amun fa yi tɛ nga kɛ bé yí’n be yra nnɛn’n i kɔlikɔli’n amun fa kpata amun ti. Kpɛkun min sufuɛ Zɔbu srɛ́ amun ti.+ Saan ń tɛ́ i srɛlɛ sɔ’n su.* Ɔ maan amun sinnzin nga amun dili’n, n su nianman su n yoman amun like. Afin min su ndɛ nga amun kannin’n, ɔ timan nanwlɛ kɛ Zɔbu liɛ’n sa.”
9 Yɛ Elifazi m’ɔ ti Temanfuɛ’n, nin Bildadi m’ɔ ti Sua i osu’n nunfuɛ’n, ɔ nin Zofaa m’ɔ ti Naamafuɛ’n be ɔli-ɔ. Be ko yoli like nga Zoova seli be kɛ be yo’n. Yɛ Zoova tɛli Zɔbu i srɛlɛ’n su-ɔ.
10 Kɛ Zɔbu srɛli i janvuɛ’m be ti’n,+ Zoova yili ɲrɛnnɛn ng’ɔ o Zɔbu su’n.+ Kpɛkun ɔ yoli maan ɔ kacili aɲanbeunfuɛ kɛ laa’n sa.* Ninnge nga Zoova wa mɛnnin i’n, ɔ tra laa liɛ’n kpɛ nɲɔn.+
11 I niaan bian nin i niaan bla’m be kwlaa, nin i janvuɛ ng’ɔ le be laa’n+ be kwlaa be wa toli i. Be nin i be dili like i awlo lɛ, be yoli i yako, kpɛkun be fɔnvɔli i sa kwlaa nga Zoova kplinnin su mɔ be tɔli i su’n ti. Be tinuntinun be mɛnnin i sika mma kun nin sika ɔkwlɛ nga kun.
12 Zɔbu i agualiɛ su’n, Zoova wa yrɛli i su dan trɛli i bo bolɛ’n nun’n.+ Zɔbu wa ɲannin bua akpiakpi blu-nin-nnan (14.000), nin ɲɔnngɔnmin akpi nsiɛn (6.000), nin nannin nɲɔnnɲɔn sɔ akpi kun (1.000), ɔ nin aflunmun bla akpi kun (1.000).+
13 Asa ekun’n, ɔ wa wuli ba yasua nso ekun nin ba bla nsan ekun.+
14 Ɔ flɛli i wa bla klikli’n kɛ Zeminma, i nɲɔn su’n kɛ Kezia, yɛ i nsan su’n kɛ Kerɛnin-Apiki.
15 Be mɛn’n nun lɔ bla fi timan klanman kɛ Zɔbu i wa bla mun sa. Be si mannin be aja like kɛ be niaan bian’m be liɛ’n sa.
16 Kɛ ɔ yoli sɔ’n, Zɔbu dili afuɛ ya kun afuɛ ablanan (140) ekun. Ɔ wunnin i mma mun, nin i anunman mun, nin i anunman siansian mun.
17 I sin’n, Zɔbu wuli. Ɔ cɛli kpa, yɛ ɔ dili ye lele naan w’a wu.*
Ja ngua lɔ ndɛ mun
^ Ebr., “Saan ń mɛ́n i ɲrun’n su.”
^ Ebr., “Zoova yoli maan tralɛ nga be trali Zɔbu’n, ɔ kacili.”
^ Ebr., “Ɔ yoli oke, yɛ i cɛn’m be juli i.”
