SRAN kaka si kɛ be kunnin Zezi waka kun su awiefuɛ nɲɔn be afiɛn. (Mat. 27:35-38) Sanngɛ kɛ Biblu’n se kɛ be fɛli i fuɛn’n ko sieli i asieliɛ kun nun’n, sran wie’m be lafiman su.—Mar. 15:42-46.

Be nga be suan Zezi i su ndɛ nga Matie, nin Marki, nin Liki nin Zan be klɛli’n i su like’n, be nun wie’m be waan Rɔmunfuɛ’m be su manman atin kɛ be sie sran kun mɔ be kunnin i waka su’n. Be flɛ fluwa klɛfuɛ kun kɛ Ariɛli Sabaa. Ɔ kannin sa nga ti yɛ sran wie’m be se sɔ’n i ndɛ seli kɛ: “Blɛ sɔ’n nun’n, sa tɛ yofuɛ mun yɛ be bobo be waka su-ɔ. Fluwa sifuɛ wie’m be waan be bumɛn i kɛ Rɔmunfuɛ’m be kwla kplin su kɛ be sie sran sɔ mun. Afin sɛ be yo sɔ’n, nn ɔ ti kɛ b’a bu be sran dan sa.” Rɔmunfuɛ’m be kunndɛ kɛ bé gúa sa tɛ yofuɛ sɔ’m be ɲin ase. Ɔ maan be yaci be fuɛn mun waka’n su naan nnɛn’m be di be. Kpɛkun be ko sie be onga’n sa tɛ yofuɛ’m be ndia kun nun.

Sanngɛ be nga be fufu asiɛ’n be kunndɛ laa ninnge mun’n, be wunnin like kun mɔ nin ndɛ nga fluwa sifuɛ sɔ’m be kan’n, be sansan be wun-ɔn. Afuɛ 1968 nun’n, be wunnin Zifu bian kun mɔ be kunnin i Klisifuɛ klikli’m be blɛ su’n i owie mun. Be wunnin owie sɔ mun Zifu’m be asieliɛ kun nun, Zerizalɛmun i wun koko lɛ. Be o alaka kun nun. Be ja ngbabua owie kun o nun wie. Ɔ sende waka kun su. Kpɛngbɛ kun m’ɔ ju santimɛtri 11 nin sin’n yɛ be fa boboli i ja nun-ɔn. Sabaa seli kɛ: “Bian kun mɔ be flɛ i kɛ Yeokanan’n i ja ngbabua owie-ɔ. Owie sɔ’n kle kɛ Zezi i sielɛ’n i su ndɛ nga be kannin’n kwla yo nanwlɛ. Yeokanan i owie sɔ’n kle kɛ Zezi blɛ su’n, Rɔmunfuɛ’m be man Zifu’m be atin kɛ be sie be nga be boboli be waka su’n be nun wie mun.”

Owie sɔ mɔ be wunnin i’n ti’n, wafa nga be boboli Zezi’n i su ndɛ nga sran’m be kan’n ti fanunfanun. Sanngɛ ng’ɔ ti cinnjin’n yɛle kɛ owie sɔ’n kle kɛ be sieli sa tɛ yofuɛ nga be boboli be waka su’n be nun wie mun. I sɔ’n kle weiin kɛ, kɛ Biblu’n se kɛ be sieli Zezi’n, i sɔ’n ti nanwlɛ. Like nga be wunnin i’n, ɔ suan ndɛ nga Biblu’n dun mmua kannin’n i bo.

Sanngɛ ng’ɔ ti cinnjin kpa’n, yɛle kɛ Zoova bɔbɔ dun mmua seli kɛ bé síe Zezi aɲanbeunfuɛ kun i asieliɛ’n nun. Kusu sran fi kwlá yoman naan ndɛ nga Zoova kan’n w’a kpɛnman su.—Eza. 53:9; 55:11.