Aja sunman saci ?Ngue ti ɔ?

“Farizifuɛ’m be bali [Zezi] i wun lɛ, be waan bé kɛ́n i nían ti be usɛli i kɛ: ‘?Yasua kun lɛ atin kɛ ɔ́ yrɛ́ i yi sa wie ti?’”​—Matie 19:3.

ZEZI i blɛ sufuɛ wie’m be usɛli i sɛ aja’n kwla cɛ, annzɛ kusu ɔ fata kɛ ɔ cɛ o. Yɛ Zezi seli be kɛ: “Kɛ Nyanmiɛn yí sran’n, ɔ yili yasua nin bla naan w’a se kɛ: ‘I sɔ’n ti yɛ maan yasua kpáci i si nin i nin yɛ ɔ́ fɛ́ i wun mɛ́ntɛn i yi yɛ be nnyɔn’n bé káci sran wunmuan nin-ɔn.’ ?An nian kɛnngɛn-mɛn i le? Kɛ ɔ ko yo sɔ’n, be ti-man sran nnyɔn kun, sanngɛ be ti sran wunmuan. Ɔ maan like nga Nyanmiɛn kan be bo nun’n, nán maan sran fi ti be nun.” * (Matie 19:4-6) Ɔ ti weiin kɛ Ɲanmiɛn w’a sunnzunman kɛ sran kun nin i yi’n be aja’n saci.

Andɛ’n, nvle kaka nun’n, sɛ a fa be nga b’a ja’n be nun 100, be nun 40 annzɛ 40 tra su’n, be nin be yi’n annzɛ be wun’n be ‘ti nun’ kan. Yɛ i agualiɛ su’n, be yra. ?Aja’n i su afɔtuɛ nga Biblu’n man’n, be te di su? ?Kɛ ɔ́ jú mɔ sran kaka be aja’n saci’n, nán aja bɔbɔ ba’n yɛ ɔ ti like tɛ ti ɔ?

Maan e fa sunnzun ase kun e nian: Sran nɲɔn be to loto kunngba’n. Kun nian i loto liɛ’n i lika. Yɛ ɔ yo i cɛcɛ. I sɔ’n ti’n, i loto’n liɛ’n o i osu’n nun. Sanngɛ bian kun liɛ’n, ɔ niɛnmɛn i loto’n i lika. Yɛ ɔ yomɛn i cɛcɛ. I agualiɛ su’n, i loto liɛ’n w’a kpɔngbɔ. Be fa ɔ, ɔ yoman ye kun. ?Wan yɛ maan i loto’n sacili ɔ? ?I bɔbɔ yɛ, annzɛ loto’n niɔn? Nga liɛ’n, ɔ ti weiin kɛ bian’n yɛ ɔ sacili loto’n niɔn.

I kunngba’n niɔn. Andɛ’n, aja kaka saci. I sɔ’n kleman kɛ aja bɔbɔ ba sa’n ti like tɛ. I kpa bɔbɔ’n, sran ko ju akpinngbin ko yo wie be aja liɛ’n yo ye. Kɛ ɔ ko yo sɔ’n, be di aklunjuɛ yɛ be ɲin kan ase. Asa kusu’n, be awlobofuɛ mun nin be mantanfuɛ mun, yɛ sran uflɛ wie mun ekun be di ye kunngba sɔ’n wie. I yo, sɛ be kunndɛ kɛ loto kun cɛ’n, be niɛn i lika kpa titi. I sɔ kunngba’n yɛ ɔ fata kɛ sran kun nin i yi’n be yo naan be aja’n w’a taka kpa titi ɔ.

Biblu’n man be nga b’a ja’n be afɔtuɛ naan b’a tran klanman naan be aja’n w’a taka kpa. Kannzɛ amun aja’n w’a cɛ o, annzɛ ɔ nin a cɛman’n o, afɔtuɛ sɔ’m be kwla uka amun kpa. Ndɛ nga bé bá lɛ nun’n, an sie be nun wie’m be nzɔliɛ.

[Ja ngua lɛ ndɛ’n]