Sran lufle dilɛ’n ɔ́ wíe!

“Fa ɔ wla gua Anannganman su, fɛ i atin’n su. [...] Klunwifuɛ’m be nunnunlɛ’n ɔ́ yó ɔ nyrun.”​—JUE MUN 37:34.

?ƆYO ɔ kɛ sran’m bé ká be wiengu lufle dilɛ’n su sa trilili? Sran kpanngban bu i sɔ. Sɛ ɔ yo ɔ sɔ wie’n, ɔ ti su. Kɛ mɛn’n fa boli i bo lele andɛ’n, famiɛn dilɛ wafawafa kwlaa nga sran’m be kwla taka’n, be takali. Sanngɛ w’a yoman ye. Andɛ nin andɛ be te di sran lufle te kɔ. ?Ɔ maan, e kwla lafi su kɛ cɛn wie lele’n, sran’m bé yáci be wiengu lufle dilɛ’n?

Biblu’n gua e awlɛn su nzue kɛ ɔ́ yó sɔ! Ɔ kle kɛ ɔ ka kaan Ɲanmiɛn wá núnnún ayeliɛ tɛ sɔ’n i osu mlɔnmlɔnmlɔn. ?Wafa sɛ yɛ ɔ́ yó i sɔ ɔ? Yɛle kɛ Ɲanmiɛn i Sielɛ’n wá káci ninnge’n kwlaa uflɛ. Sielɛ sɔ’n yɛ Zezi seli i sɔnnzɔnfuɛ’m be kɛ be srɛ naan i blɛ’n ju’n niɔn. Matie 6:9-13 nun’n, ɔ seli be kɛ be srɛ i Si Ɲanmiɛn be se kɛ: “Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa.”

Ɲanmiɛn fa sielɛ’n wlɛli i Zezi Klist sa nun. Biblu’n kannin sa nga Zezi wá yó’n i ndɛ seli kɛ: “Sɛ nyrɛnnɛnfuɛ’n kpan flɛ i’n, ɔ́ dé i. Ɔ de yalɛfuɛ b’ɔ lɛ-man wie’n. Sran b’ɔ kwla-man nun’n ɔ nin nyrɛnnɛnfuɛ’n bé yó i annvɔ. Ɔ́ dé be. Ɔ́ dé be mianmianlɛ nin yalɛ klelɛ nun.” (Jue Mun 72:12-14) Ndɛ sɔ’n kle kɛ Zezi si be nga be di be lufle’n be aunnvuɛ, naan ɔ́ wá dé be be nga be mianmian be’n be sa nun. ?Nán ndɛ fɛ ɔ?

Famiɛn sɔ’n m’ɔ le tinmin’n, m’ɔ si sran aunvuɛ’n, yɛ ɔ́ wá yó maan sran’m be wiengu lufle dilɛ’n ɔ́ wíe mlɔnmlɔn ɔn. ?Wafa sɛ yɛ ɔ́ yó i sɔ ɔ? Yɛle kɛ sa nsan nga be nin sran lufle dilɛ’n ba’n, ɔ́ núnnún be.

Sa tɛ m’ɔ o e nun’n

Kɛ é sé yɛ’n, e kwlaa e nin sa tɛ’n m’ɔ o e nun’n, e te kun. Sa tɛ sɔ’n ti yɛ e buman sran uflɛ’m be ndɛ’n niɔn. (Rɔmfuɛ Mun 7:21-23) Sanngɛ sran wie’m be o lɛ, be kunndɛ kɛ bé fá atin kpa’n su. Be lafi su kɛ Zezi i wie’n kwla to be ti. Ɔ maan Ɲanmiɛn kwla yaci be wun sa’n cɛ be. * (1 Zan 1:7, 9) Kɛ nga Zan 3:16 fa kan sa’n, Ɲanmiɛn yoli sa dan kun fa yili i sran klolɛ’n i nglo. Sran sɔ’m bé  kwlá ɲán su ye wie. Zan 3:16 se kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.”

Ɲanmiɛn wá yó like ɲɛnmɛn kpa kun mɛn i sufuɛ kpa mun. Yɛle kɛ mɛn uflɛ ng’ɔ́ bá lɛ’n nun’n, ɔ́ wá yó naan fɔ’n wie be nun blɛblɛblɛ, naan be yo sran kpa. (Ezai 26:9; 2 Piɛr 3:13) Be su timɛn i kun kɛ fɔ o sran kun nun naan se kɛ w’a di i wiengu lufle. Kɛ Famiɛn Zezi wá síe asiɛ’n, Ɲanmiɛn i sufuɛ’m be kwlaa bé ɲán be ti. Sran fi su diman be lufle kun.

Mɛn nga e wo nun yɛ’n

Sran wie’m be ɲinfu be yo be wiengu’m be tɛ. Be di yalɛfuɛ’m be lufle. Kpɛkun be su be wiengu’m be bo kɛ be yo kɛ be sa. Be ti yɛ Biblu’n se kɛ: “Maan sran ng’ɔ bu-man Ɲanmiɛn nin i ndɛ’n be like fi’n, ɔ yaci i atin tɛ’n i su falɛ. Maan sran nga i nzuɛn’n ti tɛ’n, ɔ yaci akunndan tɛtɛ’m be bulɛ’n.” Biblu’n se kɛ sɛ sran sɔ’m be kaci be sa’n, Ɲanmiɛn ‘yáci be wun sa’n cɛ́ be weiin.’—Ezai 55:7.

Sanngɛ be nga sa tɛ’n yɛ ɔ ti be nzue yɛ be nɔn’n, mɔ be kaci ɔ ɔ kaciman’n, Ɲanmiɛn tú be bo. Ɲanmiɛn Sielɛ’n maan ndɛ yɛ m’ɔ o Biblu’n nun’n, ɔ́ kpɛ́n su. I waan: “Fa ɔ wla gua Anannganman su, fɛ i atin’n su. [...] Klunwifuɛ’m be nunnunlɛ’n ɔ́ yó ɔ nyrun.” (Jue Mun 37:34) Kɛ klunwifuɛ’m be osu ko nunnun mlɔnmlɔn’n, sran fi su kwlá diman Ɲanmiɛn i sufuɛ kpa’m be lufle kun.

Mmusu’m be si Satan

Sa tɛ yofuɛ’m be nun ketewafuɛ kpli’n yɛle Satan. Ɔ yo ye mɔ ɔ ka kaan Zoova wá trɛ́ i ase ɔ. Ɔ maan ɔ su kleman sran’m be yalɛ kun. I sin’n, ɔ́ núnnún i mlɔnmlɔnmlɔn. Klunwifuɛ wlɛfuɛ sɔ’n su kwlá wlawlaman sran mun kun naan b’a yo sa tɛ.

Kɛ Ɲanmiɛn se kɛ ɔ́ yó naan sran’m be wiengu lufle bulɛ’n w’a wie’n, ɔ kwla yo kɛ ndɛ fɛ sa ngbɛn. Atrɛkpa’n, amun kwla se amun wun kɛ: ‘?Sɛ ɔ ti kɛ Ɲanmiɛn kwlɛ i sɔ’n yo’n, ngue ti yɛ w’a yomɛn i sɔ lalaa ɔ?’ Amun usa sɔ kusu ɔ, ɔ ti su. Biblu’n kusu tɛ su klanman kpa. * É srɛ́ amun kpa kɛ amun suan Biblu’n nun like, naan amun a wun like nga ɔ ka kaan Ɲanmiɛn wá yó’n. Blɛ sɔ’n nun’n, be wiengu lufle bulɛ’n ɔ́ wíe sekeseke.

[Ja ngua lɛ ndɛ mun]