Ɲanmiɛn sulɛ wafa wie’m be flɛ Misɛli kɛ “Sɛn Misɛli.” Ka naan Zezi w’a ba asiɛ’n su’n ɔ nin kɛ ɔ ɔli ɲanmiɛn su’n, dunman sɔ’n yɛ be fa flɛ i-ɔ. a Kɛ Moizi wuli’n, Misɛli nin Satan be kplili i fuɛn’n. Asa’n, Misɛli ukali anzi kun naan w’a kwla kan Ɲanmiɛn nuan ndɛ w’a kle Ɲanmiɛn nuan ijɔfuɛ Daniɛli. (Daniɛli 10:13, 21; Zidi 9) Dunman Misɛli’n i bo’n yɛle kɛ “?Wan yɛ ɔ ti kɛ Ɲanmiɛn sa-ɔ?” Misɛli kusu kleli kɛ ɔ nin dunman sɔ’n fata, afin ɔ kplili Ɲanmiɛn i ti yɛ ɔ nin Ɲanmiɛn i kpɔfuɛ’m be kunnin.—Daniɛli 12:1; Sa Nglo Yilɛ 12:7.

 Nian like nga ti yɛ e se kɛ Zezi yɛ ɔ ti anzi’m be su kpɛn Misɛli’n.

•   Misɛli yɛ ɔ ti “anzi’m be su kpɛn’n” niɔn. (Zidi 9) Ndɛ “anzi’m be su kpɛn’n,” ɔ o Biblu’n nun ndɛ mma nɲɔn nun cɛ. Ndɛ mma nɲɔn sɔ’m be nun’n, be se kɛ “anzi’m be su kpɛn’n” be seman kɛ “anzi’m be su kpɛn mun.” I sɔ’n kle kɛ anzi kunngba ndɛ yɛ be kan-ɔn. Ndɛ mma sɔ’m be nun kun se kɛ, kɛ e Min Zezi “ɔ́ wá fín ɲanmiɛn su lɔ ɔ́ jrá’n, ɔ́ kpán kekle kpa, i nɛn’n tɛ́ kɛ anzi’m be su kpɛn sa.” (1 Tesalonikifuɛ Mun 4:16) Zezi i nɛn’n tɛ kɛ “anzi’m be su kpɛn sa.” Afin i yɛ ɔ ti anzi’m be su kpɛn Misɛli-ɔ.

•   Misɛli sie anzi nga be o ɲanmiɛn su lɔ’n. Biblu’n se kɛ: “Misɛli nin i anzi mun, be nin dragɔn’n be kunnin.” Dragɔn sɔ’n yɛle Satan. (Sa Nglo Yilɛ 12:7) Misɛli le kwlalɛ dan ɲanmiɛn su lɔ. Afin Biblu’n nun’n be flɛ i ekun kɛ “kpɛnngbɛn nga be le ɲrun kpa’n be nun kun” ɔ nin “siefuɛ danfuɛ’n.” (Daniɛli 10:13, 21; 12:1) Be flɛ bian kun m’ɔ suan Aenguɛ Uflɛ’n i su like’n kɛ Davidi Onun. Ɔ seli kɛ dunman sɔ’m be kle kɛ Misɛli ti “anzi’m be kwlaa be su kpɛn.”

   Sɛ e fa Misɛli e sie bue kun’n, sran kunngba nga Biblu’n kɛn i ndɛ kɛ ɔ le kwlalɛ anzi’m be su’n yɛle Zezi. Ɔ se kɛ: ‘Bé wá yí e Min Zezi i nglo, yɛ ɔ nin i anzi kwlafuɛ’m bé fín ɲanmiɛn su bé bá. Ɔ́ bá sin m’ɔ jue vlanwunvlanwun’n nun. Ɔ́ tú i klunngbɔ.’ (2 Tesalonikifuɛ Mun 1:7, 8; Matie 16:27) Biblu’n se ekun kɛ Zezi ‘ɔli ɲanmiɛn su lɔ. Kɛ é sé yɛ’n, ɔ sie anzi mun nin be nga be le kwlalɛ’n, ɔ nin be nga be le tinmin’n be kwlaa.’ (1 Piɛli 3:21, 22) Ɲanmiɛn kwlá sieman Zezi anzi’m be su kpɛn naan i kunngba’n w’a sie Misɛli anzi’m be su kpɛn ekun. I sɔ’n kle weiin kɛ Zezi yɛ be flɛ i Misɛli-ɔ.

•   Misɛli “wá jáso” ‘ɲrɛnnɛn dan kun i blɛ’n nun.’ (Daniɛli 12:1) Daniɛli fluwa’n nun’n, kpɛ sunman’n kɛ be se kɛ famiɛn kun w’a jaso’n, i bo’n yɛle kɛ famiɛn sɔ’n su wa yo like cinnjin kpa kun. (Daniɛli 11:2-4, 21) Zezi Klisi mɔ be flɛ i kɛ “Ɲanmiɛn Ndɛ’n” mɔ i kunngba’n ti “famiɛn’m be Famiɛn’n” wá yó like cinnjin kpa kun. Yɛle kɛ ɔ́ núnnún i kpɔfuɛ mun sanngɛ ɔ́ sásá Ɲanmiɛn i sufuɛ mun. (Sa Nglo Yilɛ 19:11-16) ‘Ɲrɛnnɛn dan mɔ kɛ ɔ fɛ i mɛn’n i bo bolɛ’n nun lele andɛ’n, i wunsu nin-a juman le, yɛ i wunsu su juman kun le’n’ i blɛ’n nun yɛ ɔ́ wá yó sɔ-ɔ.—Matie 24:21, 42.