Ezekiel 9:1-11
9 Dangan nadangog ko siyang nagkurahaw, na sinasabi: “Padigdiha an mga mapadusa sa siyudad, asin darahon kan kada saro sa sainda an saiyang armas na panglaglag!”
2 Nakahiling ako nin anom na lalaki na nagdadangadang hali sa direksiyon kan itaas na trangkahan+ na nakaatubang sa norte, asin an kada saro sa sainda may kapot na armas na pangrunot; asin may saro sindang kaibanan na lalaki na nakasulot nin lino, na may tintero nin sekretaryo* sa saiyang habayan, asin naglaog sinda tapos nagtindog sa may gilid kan altar na tanso.+
3 Dangan an kamurawayan kan Diyos nin Israel+ nag-itaas hali sa ibabaw kan mga kerubin kun sain iyan nag-untok asin nagpasiring sa may pintuan kan harong,+ asin inapod niya an lalaking nakasulot nin lino na may tintero nin sekretaryo sa habayan.
4 Sinabi sa saiya ni Jehova: “Maglibot ka sa siyudad, sa Jerusalem, asin markahan mo an angog kan mga tawong napupurisaw* saka nag-aagrangay+ dahil sa gabos na makababalding bagay na ginigibo sa siyudad.”+
5 Asin nadangog kong sinabi niya sa iba pa: “Magsunod kamo sa saiya sa paglibot sa siyudad, asin manggadan kamo nin mga tawo. Dai kamo mahirak, asin dai kamo magmakulog.+
6 Gadanon nindo an gurang na lalaki, hoben na lalaki, daraga, sadit na aki, asin mga babayi.+ Pero dai kamo magrani sa siisay man na may marka.+ Magpuon kamo sa sakuyang santuwaryo.”+ Kaya nagpuon sinda sa kamagurangan na nasa atubangan kan harong.+
7 Dangan sinabi niya sa sainda: “Ramugan nindo an harong asin panuon nin mga ginadan an mga patyo.+ Sige na, magduman na kamo!” Kaya naghali sinda asin nanggadan nin mga tawo sa siyudad.
8 Mantang ginagaradan ninda an mga tawo, ako na sana an natada, asin suminubsob ako sa daga asin nagkurahaw: “O Soberanong Kagurangnan na Jehova! Lalaglagon mo daw an gabos na natatada sa Israel mantang inuula mo sa Jerusalem an saimong grabeng kaanggutan?”+
9 Kaya sinabi niya sako: “Magabaton nanggad an pagkakasala kan nasyon* nin Israel saka Juda.+ Pano nin pinabulos na dugo an kadagaan,+ asin pano nin karatan an siyudad.+ Sinasabi kaya ninda, ‘Binayaan na ni Jehova an kadagaan, asin mayong nahihiling si Jehova.’+
10 Kaya ako, dai mahihirak an sakuyang mata; dai man ako magmamakulog.+ Ipapasapar ko sa sainda an mga konsekwensiya kan saindang mga gibo.”
11 Dangan nahiling kong nagbalik an lalaking nakasulot nin lino na may tintero sa saiyang habayan, asin sinabi niya: “Ginibo ko na an ipinagbuot mo sa sako.”
