Namumutan ming kapagtubod:

Arog kan aram mo, manungod sa mga tawo an kadaklan na mababasa sa Bibliya. An dakul sa sainda maimbod na mga lalaki asin babayi na napaatubang sa mga problema na kapareho kan sa sato. Sinda may ‘mga pagmati na siring kan sa sato.’ (Santiago 5:17) An nagkapira sa sainda nasakitan huli sa mga problema saka kahaditan. An iba nakulgan na marhay kan mga kapamilya o kapagtubod. Dakul man an nakonsiyensiya huli sa nagibo nindang sala.

Huli sa arog kaiyan na mga dahilan, may mga naparayo ki Jehova. Pero, biyo na daw nindang binayaan si Jehova? Dai. Dakul sa sainda an arog kan salmista na namibi: ‘Naglagaw-lagaw ako arog sa karnerong nalagalag. Hanapa an saimong uripon, huli ta dai ako nakalingaw kan saimong mga tugon.’ (Salmo 119:176) Arog man daw kaiyan an namamatian mo?

Nungkang linilingawan ni Jehova an mga lingkod niya na naparayo sa organisasyon niya. Sa kabaliktaran, naghihinguwa siyang tabangan sinda—sa parati paagi sa mga kapagtubod ninda. Halimbawa, pag-isipan kun paano tinabangan ni Jehova an lingkod niyang si Job, na nag-agi nin kadakul na kasakitan—kaiba na an problema sa pinansiyal, pagkagadan nin mga namumutan, asin grabeng hilang. Tinios man ni Job an makulog na mga tataramon kan mga dapat kutanang nagpakusog sa saiya. Pero dai niya tinalikdan si Jehova, dawa ngani nag-isip man siya nin sala. (Job 1:22; 2:10) Paano tinabangan ni Jehova si Job na maitanos an saiyang kaisipan?

An sarong paagi iyo an pagtabang kan kapagtubod ni Job na si Elihu. Kan sabihon ni Job an nasa buot niya, nagdangog si Elihu asin napahirong magtaram. Ano an sasabihon niya? Kikritikaron daw niya si Job, o pagmamaigutan na itama an kaisipan ni Job paagi sa pangongonsiyensiya o panunupog? Inisip daw ni Elihu na mas urog siya ki Job? Dai nanggad! Sa paggiya kan banal na espiritu, sinabi ni Elihu ki Job na magkapareho man sinda sa atubangan nin Diyos, huling ‘linalang man siya hali sa laboy.’ Dangan pinakusog niya si Job: ‘Dai ka makubhanan. An sakuyang kamot dai man saimo makakagabat.’ (Job 33:6, 7) Imbes na dagdagan pa an kasakitan ni Job, mamumuton siyang sinadol asin pinakusog ni Elihu.

Arog man tabi kaiyan an namamatian mi kaya ginibo mi an brosyur na ini. Dinangog mi nguna an pira sa mga naparayo ki Jehova asin maingat na kinonsiderar an kamugtakan asin sabuot ninda. (Talinhaga 18:13) Dangan kinonsulta mi an Kasuratan asin may pamimibing siniyasat an mga salaysay kun paano tinabangan ni Jehova an mga lingkod niya kaidto kan mapaatubang sinda sa arog kaiyan na sitwasyon. Pagkatapos, pinagsararo mi an mga salaysay na iyan sa Kasuratan saka an mga eksperyensiya sa presenteng panahon tanganing mabilog an brosyur na ini. Basahon tabi asin pag-isipan an laog kaini. Akuon tabi an samong sinserong pagkamuot sa saimo.

Namamahalang Grupo kan Mga Saksi ni Jehova