AN SARONG lalaking taga-Nueva York (E.U.A.) nagsaysay: “An aki kong si Jonathan sinosongko an mga katood nia mga pirang milya an rayo. An agom ko, si Valentina, habo na pumaduman sia. Sia perming nahahandal manongod kan trapik. Pero gustong-gusto kan aki an elektronika, asin an saiyang mga katood igwa nin pahirahayan kun saen sia puwedeng makakua nin mapakikinabangan na eksperyensia. Nasa harong ako sa solnopan nin Manhattan, Nueva York. An agom ko nasa pagsongko sa saiyang pamilya sa Puerto Rico. ‘Aroatyan mapuli na si Jonathan,’ an inisip ko. Dangan nagtanog an tililing sa pinto. ‘Siertong sia na iyan.’ Bako. Pulis asin paramediko idto. ‘Midbid mo ining lisensia sa pagmaneho?’ an ihinapot kan pulis. ‘Iyo, sa aki ko iyan, ki Jonathan.’ ‘May mamondo kaming bareta saindo. Nagkaigwa nin aksidente, asin . . . an saindong aki, . . . an saindong aki nagadan.’ An enot kong reaksion, ‘Bakong totoo iyan!’ An nakasusustong pangyayaring idto nakalugad sa samong puso na nagpipila pa sagkod ngonyan, minsan dakol nang taon an nakaagi.”

 An sarong ama sa Barcelona (España) nagsurat: “Sa España kaidtong mga taon nin 1960, kami sarong maogmang pamilya. Yaon sinda María, an agom ko, asin an samong tolong aki, si David, Paquito, asin Isabel, na an kanya-kanyang edad 13, 11, asin 9.

“Sarong aldaw kan Marso 1963, si Paquito nagpuli hale sa eskuwelahan na irinireklamo an grabeng kolog nin payo. Nariribong kami kun ano an dahelan—pero dai nahaloy. Pakalihis nin tolong oras sia gadan na. Pagdugo sa hotok an biglang tuminapos sa saiyang buhay.

“An pagkagadan ni Paquito nangyari kaidtong labi nang 30 taon an nakaagi. Minsan siring, an hararom na kolog kan pagkagadan na idto nagdadanay samo sagkod ngonyan. Dai nanggad puwedeng mawaran nin aki an mga magurang asin dai makamate na may nawara sa saindang sadiri—dawa kun guranong panahon an uminagi o pira pa an ibang aki ninda.”

 An duwang eksperyensiang ini, na an mga magurang nawaran nin mga aki, nag-iilustrar kun gurano kararom asin nagdadanay an lugad kun may aking nagadan. Totoo nanggad an mga tataramon nin sarong doktor na nagsurat: “An pagkagadan nin sarong aki parateng mas makamomondo asin makolog kisa sa pagkagadan nin mas maedad na huli ta an aki iyo an ultimong persona sa pamilya na linalaoman na magadan. . . . An pagkagadan nin siisay man na aki nagrerepresentar sa pagkawara nin mga pangatorogan sa ngapit, relasyon [aking lalaki, manugang na babae, mga makoapo], eksperyensia . . . na dai pa nakamtan.” Asin an pakamateng ini nin grabeng kawaran puwede man na mangyari sa siisay man na babae na nawaran nin omboy huli ta nakuanan.

An sarong nagadanan na agom na babae nagpaliwanag: “An sakong agom, si Russell, naglingkod bilang katabang nin doktor sa ralaban sa Pasipiko durante kan Guerra Mundial II. Sia nakaheling asin nakaligtas sa nagkapirang makatatakot na ralaban. Nagbalik sia sa Estados Unidos asin sa mas trangkilong buhay. Kan huri naglingkod sia bilang ministro kan Tataramon nin Dios. Sa edad niang labi pa sanang 60 nagpoon siang magkaigwa nin mga sintomas nin helang sa puso. Naghingoa siang magin aktibo an saiyang buhay. Dangan, sarong aldaw kan Hulyo 1988, nag-agi sia nin grabeng atake sa puso asin nagadan. An saiyang pagkagadan nakapanluluya sa boot. Dai man lamang ako nakapaaram. Sia bako sanang agom ko. Sia an sakong pinakamarahay na amigo. Kuwarentang taon nin buhay an samuyang pinag-ibanan. Ngonyan garo baga kaipuhan kong atubangon an sarong napapalaen na kamondoan.”

Pipira sana ini sa rinibong trahedya na minatama sa mga pamilya sa bilog na kinaban aroaldaw. Siring sa sasabihon saindo nin kadaklan na tawong nagmomondo, kun kuanon nin kagadanan an saindong aki, saindong agom, saindong magurang, saindong katood, iyan tunay nanggad na siring sa pagkaapod dian kan Kristianong parasurat na si Pablo, “an ultimong kaiwal.” Puwedeng pagpainda an parateng enot na natural na reaksion sa nakakukubhan na bareta, “Bakong totoo iyan! Dai ako naniniwala dian.” An iba pang reaksion parateng minasunod, siring sa satong maheheling.​—1 Corinto 15:25, 26.

Alagad, bago niato konsideraron an pakamate nin kamondoan, simbagon niato an nagkapirang mahalagang hapot. An kagadanan daw nangangahulogan kan katapusan kan tawong iyan? Igwa daw nin ano man na paglaom na maheling liwat niato an satong mga namomotan?

An parasurat sa Biblia na si Pablo nagtao nin paglaom na makaginhawa sa “ultimong kaiwal” na iyan, an kagadanan. Sia nagsurat: “An kagadanan paparaon.” “An ultimong kaiwal na paparaon iyo an kagadanan.” (1 Corinto 15:26, The New English Bible) Taano ta nakaseseguro kaiyan si Pablo? Huli ta tinokdoan sia kan saro na ibinangon hale sa mga gadan, si Jesu-Cristo. (Gibo 9:3-19) Iyan man an dahelan na si Pablo nakapagsurat: “Mantang an kagadanan huli sa sarong tawo [si Adan], siring man an pagkabuhay liwat kan mga gadan huli sa sarong tawo [si Jesu-Cristo]. Huli ta kun paanong an gabos nagagadan dian ki Adan, siring man an gabos bubuhayon dian ki Cristo.”​—1 Corinto 15:21, 22.

Si Jesus namondong gayo kan masabatan nia an sarong balong taga-Nain asin maheling an gadan na aki kaini. An tala sa Biblia nagsasabi sato: “Kan [si Jesus] nagdadangadang na sa tata kan siudad [nin Nain], tara, uya! ilinuluwas an sarong gadan, an bugtong na aki kan saiyang ina. Laen pa kaiyan, sia balo. Kaiba man nia an dakulang kadaklan hale sa siudad. Asin kan maheling sia kan Kagurangnan, naherak sia sa saiya, asin sia nagsabi sa saiya: ‘Ontok na sa pagtangis.’ Dangan sia nagdolok asin dinootan an andas, asin nag-orontok an mga nagbuburulig, asin sia nagsabi: ‘Barobata, ako nagsasabi sa saimo, Bangon!’ Asin an gadan nagbangon asin nagpoon na magtaram, asin itinao nia sia sa saiyang ina. Ngonyan nagkatarakot sinda gabos, asin nagpoon sindang magpamuraway sa  Dios, na an sabi: ‘Sarong dakulang propeta an pinatindog sa tahaw niato,’ asin, ‘An Dios nagtao kan saiyang atension sa saiyang banwaan.’” Mangnoha kun paano naherak si Jesus, kaya binuhay nia liwat an aki kan balo! Imahinara kun ano an ilinaladawan kaiyan para sa ngapit!​—Lucas 7:12-16.

Duman, sa atubangan kan mga nakaheling, si Jesus naggibo nin dai malilingawan na pagbuhay liwat. Idto garantiya kan pagbuhay liwat na saiya nang ihinula kaidto bago kan pangyayaring ini, pagkabuhay liwat digdi sa daga sa irarom nin “bagong kalangitan.” Sa okasyon na idto si Jesus nagsabi: “Dai kamo magngalas kaini, huli ta an oras maabot na an gabos na nasa mga lolobngan nin girumdoman makadadangog kan saiyang tingog asin maruluwas.”​—Kapahayagan 21:1, 3, 4; Juan 5:28, 29; 2 Pedro 3:13.

Kabale si Pedro sa iba pang nakaheling sa pagbuhay liwat, kaiba an nagkapira pa sa 12 na kaibaiba ni Jesus sa saiyang mga pagbiyahe. Aktuwal nindang nadangog an binuhay liwat na si Jesus na nagtataram sa tampi kan Dagat nin Galilea. An tala nagsasabi sato: “Si Jesus nagsabi sainda: ‘Madia, mamahaw na kamo.’ Mayo ni saro sa mga disipulo an nagkaigwa kan kosog nin boot na maghapot saiya: ‘Siisay ka?’ huli ta aram ninda na idto an Kagurangnan. Si Jesus nagdolok asin kinua an tinapay asin itinao iyan sa sainda, asin siring man an sira. Ini na an ikatolong beses na si Jesus nagpaheling sa mga disipulo pakatapos na ibangon sia hale sa mga gadan.”​—Juan 21:12-14.

Kun siring, si Pedro makakasurat na may makosog na kombiksion: “Pag-omawon an Dios asin Ama kan satong Kagurangnan na si Jesu-Cristo, huli ta sono sa saiyang dakulang pagkaherak tinawan nia kita nin bagong pagkamundag sa buhay na paglaom paagi sa pagkabuhay liwat ni Jesu-Cristo hale sa mga gadan.”​—1 Pedro 1:3.

Si apostol Pablo nagpahayag kan saiyang may pagsarig na paglaom kan sia magsabi: “Nagtutubod ako sa gabos na bagay na nasa Pagboot asin nasusurat sa Mga Propeta; asin may paglaom ako sa Dios, paglaom na yaon man sa mga tawong ini, na magkakaigwa nin pagkabuhay liwat an mga matanos asin an mga bakong matanos.”​—Gibo 24:14, 15.

Minilyon kun siring an puwedeng magkaigwa kan marigon na paglaom na maheling an saindang mga namomotan na buhay giraray digdi sa daga pero sa irarom nin laen na marhay na mga kamugtakan. Ano an mga kamugtakan na iyan? An dugang pang detalye kan paglaom na basado sa Biblia para sa satong gadan nang mga namomotan ipapaliwanag sa ultimong kabtang kan brochure na ini, na may titulong “Sarong Seguradong Paglaom Para sa mga Gadan.”

Pero pag-olayan nguna niato an tibaad mga hapot nindo kun ipinagmomondo nindo an pagkagadan nin sarong namomotan: Normal daw na magmondo nin arog kaini? Paano ko makakaya an sakong kamondoan? Ano an puwedeng gibohon nin iba tanganing tabangan akong makaya iyan? Paano ko puwedeng tabangan an iba na nagmomondo? Asin sa pangenot, Ano an sinasabi kan Biblia manongod sa sarong seguradong paglaom para sa mga gadan? Maheheling ko pa daw liwat an sakong mga namomotan? Asin saen?