Mga Hapot Hale sa mga Parabasa

Taano ta sinasabi kan Isaias 30:21 na an tataramon ni Jehova hale sa “likod mo,” mantang an sinusundan na bersikulo ilinalaag si Jehova sa atubangan sa pagsabing, “An saimong mga mata maninigong mga mata na nakakaheling sa saimong Kaharohalangkaweng Paratokdo”?

Sinasabi kan Isaias 30:20, 21: “Dai na itatago kan saimong Kaharohalangkaweng Paratokdo an saiyang sadiri, asin an saimong mga mata maninigong mga mata na nakakaheling sa saimong Kaharohalangkaweng Paratokdo. Asin an saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.”

Kun sasaboton nin literal an teksto, naheheling kan nagbabasa si Jehova, an Kaharohalangkaweng Paratokdo, sa atubangan nia alagad nadadangog an Saiyang tingog sa likod. Minsan siring, an mga tataramon piguratibo asin maninigong saboton sa paaging iyan.

An pananaram na may piguratibong kahulogan na ilinaladawan sa isip kan bersikulo 20 iyo an sarong lingkod na nag-aasikaso sa saiyang kagurangnan, na pirmeng andam na gibohon an mga instruksion kan kagurangnan. Arog nin sarong lingkod na atentong inoobserbaran an ginigibo kan saiyang kagurangnan tanganing mamansayan an ipinaparisa kan saiyang kabotan, an banwaan ni Jehova ngonyan maingat na itinuturuhok an saindang mga mata sa progresibong mga instruksion na basado sa Biblia na itinatao ni Jehova paagi sa saiyang daganon na organisasyon. (Salmo 123:1, 2) Iyo, ginigibo ninda an saiyang instruksion, na listo sa ano man na ipinaririsa ni Jehova paagi sa “fiel asin may diskresion na oripon.”​—Mateo 24:45-47.

Kun siring, ano an tataramon na nadadangog sa likod kan saiyang mga lingkod? Rasonable sanang ikonklusyon na an tingog sa likod iyo an tingog nin Dios kan nakaagi, na nagtataram paagi sa saiyang nasusurat na Tataramon mantang ipinasasabot iyan paagi sa saiyang “fiel na mayordomo.” (Lucas 12:42) Nadadangog kan mga lingkod nin Dios sa presenteng aldaw an saiyang tingog paagi sa maigot na pag-adal sa Biblia asin paagi sa pag-aplikar kan mga prinsipyo kaiyan sa saindang buhay sa tabang kan mga publikasyon na iinandam kan “fiel asin may diskresion na oripon,” “an fiel na mayordomo.” Paagi sa pagsarig sa, pagigin listo sa, napapanahon na pagdirehir na itinatao kan Kaharohalangkaweng Paratokdo asin paagi sa pag-adal sa Tataramon nin Dios, na isinurat kaidtong nakaaging mga siglo, naheheling sia kan saiyang mga lingkod sa piguratibong paagi sa atubangan ninda asin nadadangog an saiyang tingog hale sa likod.​—Roma 15:4.